ކެނެޑާގެ ކުރީގެ ޑިޕޮލޮމެޓެއްކަމަށްވާ މައިކަލް ކޯވްރިގް ޗައިނާއިން ހައްޔަރުކޮށްފައިވާ ކަމަށް ރިޕޯޓްތައް ބުނެފިއެވެ.
ރިޕޯޓްތައް ބުނާގޮތުގައި އޭނާ ހައްޔަރު ކޮށްފައި ވަނީ އަންގާރަ ދުވަހުގެ ވަގުތެއްގައިއެވެ.
މައިކަލް އަކީ އިންޓަނޭޝަނަލް ކްރައިސިސް ގުރޫޕުގެ އެޑްވައިޒަރެއްގެ ގޮތުގައި މަސައްކަތް ކުރާ ކެނެޑާގެ ރައްޔިތެކެވެ.
މައިކަލް ހައްޔަރުކުރުމާ ބެހޭ ގޮތުން އިތުރު މައުލޫމާތު ހޯދަމުންދާކަމަށާއި އޭނާ މިނިވަން ކުރުމަށް މަސައްކަތްކުރަމުންދާ ކަމަށް އެ ޖަމާތުން ވަނީ ބުނެފައިއެވެ.
އޭނާ ހައްޔަރު ކޮށްފައިވާ ސަބަބެއް އެއްވެސް ފަރާތަކުން ހާމަކޮށްފައެއް ނުވެއެވެ. މައިކަލް ހައްޔަރުކޮށްފައި ވާއިރު، ޗައިނާގެ އެންމެ ބޮޑު އެއް ކުންފުނި ވާވޭ ޓެލެކޮމްގެ ސީއެފްއޯ މެންގް ވަންޖޫ ވަނީ ކެނެޑާގެ އެއާޕޯޓުން މި މަހުގެ ފުރަތަމަ ދުވަހު ހައްޔަރު ކޮށްފައިއެވެ.
ޗައިނާގެ ފޮރިން މިނިސްޓްރީގެ އިތުރުން ޗައިނާގާއި ހުންނަ ކެނެޑާ އެމްބަސީއިން މިހާތަނަށް މިކަމާބެހޭ ގޮތުން އެއްވެސް އެއްޗެއް ބުނެފައެއް ނުވެއެވެ.
އިންޓަނޭޝަނަލް ކްރައިސިސް ގުރޫޕުގައި ކޯވްރިގް މަސައްކަތް ކުރަންފަށާފައި ވަނީ 2017 އިން ފެށިގެންނެވެ. އޭގެ ކުރިން އޭނާވަނީ ޑިޕޮލޮމެޓެއްގެ ގޮތުގައި ބެއިޖިންގެ އިތުރުން ހޮންކޮންގުގައި މަސައްކަތްކޮށްފައެވެ.
