އިޝާ އަންބާނީގެ ކައިވެނީގައި ބައިވެރިވުމަށް ބިޔޯންސޭ އިންޑިއާގައި

އިންޑިއާގެ މަހުޖަނެއް ކަމަށްވާ މުކޭޝް އަންބާނީގެ އަންހެން ދަރިފުޅު އިޝާ އަންބާނީގެ ކައިވެނީގެ ހަފްލާގައި ބައިވެރިވުމަށް އެމެރިކާގެ ޕޮޕް ލަވަކިޔުންތެރިޔާ ބިޔޯންސޭ ނޯލްސް އިންޑިއާ އަށް ގޮސްފިއެވެ.

އާދިއްތަ ދުވަހު މެންދުރު އުދައިޕޫރު އެއަރޕޯޓުން ޕަޕަރާޒީންނަށް ވަނީ ބިޔޯންސޭ ފެނިފައެވެ.

ޕިންކް ވިލާގައި ރިޕޯޓްކޮށްފައިވާ ގޮތުގައި ބިޔޯންސޭގެ ޓީމްގައި ހިމެނޭ 60 ނެށުންތެރިން ވަނީ ބިޔޯންސޭގެ ކުރިން އުދެއިޕޫރަށް ގޮސްފައެވެ.

އަދި އީޝަގެ ކައިވެނީގެ ކުރިން، އާދިއްތަ ދުވަހުގެ ރޭ އޮންނަ ހަފްލާއެއްގައި ބިޔޯންސޭ ޕާރފޯމް ކުރުމަށް ހަމަޖެހިފައިވާ ކަމަށާއި އެނާ އެނބުރި އެމެރިކާއަށް ދިއުމަށް ހަމަޖެހިފައި ވަނީ ހޯމަ ދުވަހު ކަމަށް ރިޕޯޓްތައް ބުނެއެވެ.

އިޝާ އަންބާނީގެ ކައިވެނީގެ ސަންގީތު ހަފްލާ ވަނީ ހޮނިހިރު ދުވަހުގެ ރޭ ބާއްވަފައެވެ. އެ ހަފްލާގައި ބޮލީވުޑްގެ ބޮޑެތި ގިނަ ފަންނާނުން ވަނީ ބައިވެރިވެފައެވެ. މި ހަފްލާގައި ބައިވެރިވި މަޝްހޫރު ފަންނާނުންގެ ތެރޭގައި ޕްރިޔަންކާ ޗޯޕްޅާ، ނިކް ޖޯނަސް، އާމިރު ޚާން، އައިޝްވަރިޔާ ރާއީ ބައްޗަން، ވިދްޔާ ބާލަން، ކްރިކެޓް ކުޅުންތެރިޔާ ސަޗިން ޓެންޑުލްކަރް، އަދި ވިޔަފާރިވެރިޔާ އެލް އެން ނިއްތަލް ހިމެނެއެވެ. މި ފަރާތްތަކާ އިއެކު ގާތްގަނޑަކަށް 1200 ގެސްޓުން ވަނީ އެޕާޓީ އަށް ގޮސްފައެވެ.

މިދިޔަ ހުކުރު އަދި ހޮނިހިރު ދުވަހު ގިނަ މެހެމާނުން މި ހަފްލާ އަށް ގޮސްފައި ވަނީ ޗާޓަރޑް 48 ފްލައިޓްގައި ކަމަށް މިހަފްލާ ރާވައި ހިންގުމަށް އުޅުނު މީހަކާއި ހަވާލާދީ އިންޑިއާގެ ނޫސްތަކުން ރިޕޯޓްކޮށްފައިވެއެވެ.

މުކޭޝް އަދި ނީތާ އަންބާނީގެ އަންހެންދަރިފުޅު އިޝާ އާއި އަޖޭ އަދި ސްވާތީ ޕިރަމަލްގެ ފިރިހެން ދަރިފުޅު އާނަންދު ކައިވެނި ކުރުމަށް ހަމަޖެހިފައި ވަނީ މިހިނގާ ޑިސެމްބަރު މަހުގެ 12 ވަނަ ދުވަހު މުމްބާއީގައެވެ.