އިންޓަނެޓްގެ އަގު ހެޔޮ ކުރުމަށް މަޝްވަރާ ކުރަނީ
9 ޑިސެމްބަރު 2018 | އާދީއްތަ 03:09އަގު ހެޔޮ ވުމުން ރާއްޖޭގެ އިގްތިސާދުގެ ދުވެލި އިތުރަށް ބާރުވެގެން ދާނެ
ކޮމިއުނިކޭޝަންސް މިނިސްޓަރ މަލީހު (ވ)
ރާއްޖޭގައި ބޭނުން ކުރާ އިންޓަނެޓުގެ އަގު ހެޔޮ ކުރުމަށް މަޝްވަރާ ކުރަމުންދާކަމަށް މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މުހައްމަދު މަލީހު ޖަމާލު ވިދާޅުވެއްޖެއެވެ.
މަލީހު ވިދާޅުވީ އެމަނިކުފާނު މަގާމުގެ މަސްއޫލިއްޔަތާއި ހަވާލުވެވަޑައިގެން އެންމެ ފުރަތަމަ ވެސް ފެއްޓެވި މަސައްކަތަކީ ރާއްޖޭގައި ފޯރުކޮށްދޭ އިންޓަނެޓްގެ އަގުހެޔޮކުރުމާ ގުޅޭގޮތުން މަޝްވަރާ ކުރެއްވުންކަމަށެވެ.
ރާއްޖޭގައި އިންޓަނެޓްގެ ޚިދުމަތްދޭ ކުންފުނިތައް ކަމަށްވާ ދިރާގާއި އުރީދޫ އަދި ކޮމިއުނިކޭޝަން އޮތޯރިޓީ އޮފް މޯލްޑިވްސްގެ ބޭފުޅުންނާއި ބައްދަލުކޮށް، އިންޓަނެޓްގެ އަގު ހެޔޮކުރެވޭނެ ގޮތްތަކާ ގުޅޭގޮތުން މަޝްވަރާ ކުރައްވާފައިވާކަމަށް މަލީހު ވިދާޅުވިއެވެ. އެގޮތުން ކުރެވުނު މަޝްވަރާތަކުގައި އިންޓަނެޓުގެ އަގު ހެޔޮ ކުރެވޭނެ އުއްމީދު އެބައޮތްކަމަށްވެސް މަލީހު ވިދާޅުވިއެވެ.
"އެންމެ ބޮޑު އިސްކަމެއްދޭނީ ހަލުވި އިންޓަނެޓު އަގުހެޔޮކޮށް ރައްޔިތުންނަށް ފޯރުކޮށްދިނުމަށް." މަލީހު ވިދާޅުވިއެވެ.
އިންޓަނެޓަކީ ރާއްޖޭގެ އިގްތިސާދީކުރިއެރުން ބަރޯސާ ވެފައިވާ އެއް މުވާސަލާތީ ޚިދުމަތްކަމަށް ފާހަގަ ކުރައްވާ މަލީހު ވިދާޅުވީ އިންޓަނެޓް އަގުހެޔޮވެ އަވަސް ވުމަކީ ރާއްޖޭގެ އިގްތިސާދީ ދުވެލިވެސް ހަލުވި ވެގެން ދާނޭކަމެއް ކަމަށެވެ.
ސަރަހައްދީ ގައުމުތަކަށް ބަލާއިރު ރާއްޖެއަކީ ނިސްބަތުން މުވާސަލާތީ ޚިދުމަތްތަކުގެ އަގު ބޮޑު ގައުމެއް ކަމަށާއި, ވިޔަފާރިވެރިންނާއި ޒުވާނުންގެ ކަންބޮޑުވުންތަކަށް ހައްލު ހޯއްދަވައި ދެއްވުމަށް މަސައްކަތްޕުޅު ކުރައްވަމުން ގެންދަވާކަމަށްވެސް މަލީހު ވިދާޅުވިއެވެ.
