ޖަޕާނުން އެހީ ދޭނެ ދާއިރާތަކާބެހޭ ގޮތުން މަޝްވަރާ ކޮށްފި
4 ޑިސެމްބަރު 2018 | އަންގާރަ 21:42ޚާއްސަކޮށް މިނިސްޓްރީ އޮފް ޑިފެންސަށް އެހީތެރިކަން ބޭނުންވާ ދާއިރާތަކާއި ބެހޭ ގޮތުން މަޝްވަރާ ކުރައްވާފައިވޭ
ޖަޕާނުގެ ބޮޑުވަޒީރާއެކު ބޭއްވި ބައްދަލުކުރެއްވުމުގެ ތެރެއިން
ޖަޕާނު ސަރުކާރުގެ ފަރާތުން ދިވެހިރާއްޖެއަށް އެހީތެރިކަން ފޯރުކޮށްދެވޭނެ ދާއިރާތަކާބެހޭ ގޮތުން މަޝްވަރާ ކޮށްފިއެވެ.
އެ މަޝްވަރާތައް ކުރިއަށް ގެންގޮސްފައިވަނީ ރާއްޖެ ވަޑައިގެން އުޅުއްވާ ޖަޕާނުގެ ބޮޑުވަޒީރުގެ ޚާއްސަ މުޝީރު ކެންޓެރޯ ސެނައުރަ، ޑިފެންސް މިނިސްޓަރު މާރިޔާ އަޙްމަދު ދީދީއާ އެކު އަންގާރަ ދުވަހު ބޭއްވި ބައްދަލުކުރެއްވުމުގައެވެ.
މި ބައްދަލުކުރެއްވުމުގައި ދެޤައުމުގެ ދެމެދު އޮތް ގާތް ގުޅުމާއި ބެހޭގޮތުންނާއި, ގުޅުން އިތުރަށް ބަދަހިކޮށް ދަމަހައްޓާނެ ގޮތާއި ބެހޭ ގޮތުން މަޝްވަރާ ކުރައްވާފައިވެއެވެ. އަދި ޖަޕާނު ސަރުކާރުގެ ފަރާތުން ދިވެހިރާއްޖެއަށް އެހީތެރިކަން ފޯރުކޮށްދެވޭނެ ދާއިރާތަކާއި ގުޅޭ ގޮތުންނާއި، ޚާއްސަގޮތެއްގައި މިނިސްޓްރީ އޮފް ޑިފެންސަށް އެހީތެރިކަން ބޭނުންވާ ދާއިރާތަކާއި ބެހޭ ގޮތުން ވަނީ މަޝްވަރާކުރައްވާފައެވެ.
މިބައްދަލުވުމުގައި ޗީފް އޮފް ޑިފެންސް ފޯސް މޭޖަރ ޖެނެރަލް އަޙްމަދު ޝިޔާމްގެ އިތުރަށް ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަހުމަދު ޝާހިދު އަދި މިނިސްޓްރީ އޮފް ޑިފެންސްގެ އިސް ބޭފުޅުން ބައިވެރިވެވަޑައިގެންނެވިއެވެ.
