ޖަޕާނުން 24 ފަޔަރ ވެހިކަލް އެމްއެންޑީއެފްއަށް ހަދިޔާކޮށްފި އެވެ.   

ފަޔަރ ވެހިކަލްތައް ހަވާލުކުރުމަށްޓަކައި ކަޅުތުއްކަލާކޮށީގައި އަންގާރަ ދުވަހު ހަވީރު ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވީ ޖަޕާނުގެ ބޮޑުވަޒީރުގެ ޚާއްޞަ މުޝީރު ކެންޓާރޯ ސޮނޯރާއެވެ. މިނިސްޓްރީ އޮފް ޑިފެންސް މާރިއާ އަހުމަދު ދީދީ ވެސް ބައިވެރިވެ ވަޑައިގެންނެވި މި ރަސްމިއްޔާތުގައި އެމްއެންޑީއެފް ފަރާތުން ތަކެއްޗާ ހަވާލުވެލެއްވީ ޗީފް އޮފް ޑިފެންސް ފޯސް މޭޖަރ ޖެނެރަލް އަޙްމަދު ޝިޔާމެވެ.

 ޖަޕާނު ސަރުކާރުން އެމްއެންޑީއެފްއާށް ހަދިޔާކުރި ތަކެއްޗަކީ ރާއްޖެއަށް ދިމާވެދާނެ ކާރިސާތަކުން ރައްކާތެރިވުމަށްޓަކައި ކާރިސާތަކަށް އިޖާބަ ދިނުމުގެ ޤާބިލިއްޔަތުކަން އިތުރުކޮށްދިނުމުގެ ގޮތުން ޖަޕާން ސަރުކާރުގެ ނޮން ޕްރޮޖެކްޓް ގްރާންޓް އެއިޑްގެ ދަށުން ހަދިޔާކޮށްފައިވާ ތަކެއްޗެވެ.  ޖަޕާނުން ދިން  ފަޔަރ ނިވާ 24 ވެހިކަލްގެ ތެރޭގައި 13 ފަޔަރ ފައިޓިންގ ވެހިކަލް، 9 ކެމިކަލް ޓެންޑަރ (ފޯރމް ޓެންޑަރ) ވެހިކަލް އަދި ރެސްކިއު އަށް ބޭނުންކުރާ ދެ ވެހިކަލް ހިމެނޭ ކަމަށް އެމްއެންޑީއެފް އިން މައުލޫމާތު ދެއެވެ. އެ ވެހިކަލްތަކުގެ އިތުރުން 300 ފަޔަރ ފައިޓިންގ ސޫޓް ހަދިޔާކުރި އެވެ.

ޑިފެންސް މިނިސްޓަރު އަލްއުސްތާދާ މާރިޔާ އަހުމަދު ދީދީ ވިދާޅުވީ ޖަޕާނުން ހަދިޔާ ކުރި ފަޔާ ލޮރީތަކުގެ ސަބަބުން، އަލިފާން ނިންވުމަށް މިހާރު ކުރާ މަސައްކަތަށް ލުޔެއް ލިބޭނެ ކަމަށެވެ. މިނިސްޓަރު ވަނީ ޖަޕާނު ސަރުކާރުން ވެދެއްވަމުންދާ އެހީތެރިކަމަށް ޝުކުރުއަދާކުރައްވައިފަ އެވެ.