ކޯލިޝަން އެއްބަސްވުމާއި ގުޅޭގޮތުން އަދާލަތާއެކު މަޝްވަރާކުރީ އެމްޑީޕީން އެއްބަސްވުމާއި ހިލާފުވުމުން: އެމްއާރުއެމް

ކޯލިޝަން ދެމެހެއްޓުމާއި ގުޅޭ ގޮތުން އަދާލަތު ޕާޓީ އާއިއެކު މަޝްވަރާކުރީ އެމްޑީޕީން އެއްބަސްވުމާއި ހިލާފުވުމުން ކަމަށް މައުމޫން ރިފޯރމް މޫވްމަންޓް (އެމްއާރްއެމް) އިން ބުނެފި އެވެ.

ރާއްޖެ.އެމްވީއަށް މައުލޫމާތުދެއްވަމުން އެމްއާރުއެމްގައި އިސްކޮށް ހަރަކާތްތެރިވެވަޑައިގަންނަވާ އަބްދުލް އަލީމް ވިދާޅުވީ ކޯލިޝަން ދެމެހެއްޓުމާއި ގުޅޭ ގޮތުން ދެ ޕާޓީގެ ދެމެދުގައި ކުރެވުނު މަޝްވަރާތަކުގެ ތަފްސީލް މީޑިޔާއަށް ހާމަކޮށްދެވެންނެތް ކަމަށެވެ. އަލީމް ވިދާޅުވީ ކޯލިޝަން ދެމެހެއްޓުމަށްޓަކައި ދެ ޕާޓީގެ ދެމެދުގައި މަޝްވަރާކުރަންޖެހުނީ ކޯލިޝަން އެއްބަސްވުމާއި އެމްޑީޕީން ހިލާފުވެފައިވާތީ ކަމަށެވެ. އަލީމް ވިދާޅުވީ ރައްޔިތުންގެ މަޖިލީހުގެ 87 ދާއިރާއަށް ކުރިމަތިލާނެ ކަމަށް އެމްޑީޕީން އިއުލާންކޮށްފައިވަނީ ހަތަރު ޕާޓީގެ ދެމެދުގައި ވެފައިވާ އެއްބަސްވުމާއި ހިލާފަށެވެ.

ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި އެމްއެމްއާރްއެމްއިން ވާދަކުރުމަށް ހަމަޖެހިފައިވަނީ 17 ދާއިރާއަށެވެ. އަދާލަތު ޕާޓީން ވަނީ ރައްޔިތުންގެ މަޖިލީހުގެ އިންތިހާބުގައި އެ ޕާޓީން 13 ދާއިރާއަކަށް ކުރިމަތިލާނެ ކަމަށް 2 ޑިސެމްބަރުގައި އިއުލާންކޮށްފައެވެ.

އަދާލަތު ޕާޓީން މަޖިލީހަށް ވާދަކުރަން ނިންމާފައިވަނީ ކެލާ ދާއިރާ، ވައިކަރަދޫ ދާއިރާ، ކުޅުދުއްފުށީ އުތުރު ދާއިރާ، މަކުނުދޫ ދާއިރާ، އިނގުރައިދޫ ދާއިރާ، ކާށިދޫ ދާއިރާ، މަހިބަދޫ ދާއިރާ، މުލަކު ދާއިރާ، ނިލަންދޫ ދާއިރާ، ގަމު ދާއިރާ، ފުވައްމުލަކު ދެކުނު ދާއިރާ، ފޭދޫ ދާއިރާ އަދި މާފަންނު ދެކުނު ދާއިރާއެވެ.

އެމްޑީޕީން ވަނީ ރައްޔިތުންގެ މަޖިލީހުގެ 87 ދާއިރާއަށް އެ ޕާޓީން ކުރިމަތިލާނެ ކަމަށް އިއުލާންކޮށްފައެވެ.