އާމިރާ ސީއެސްސީއަށް އައްޔަން ކުރަން މަޖިލީހުން ފާސްކޮށްފި
އޭނާއަށް 73 މެމްބަރުން ވޯޓު ދެއްވި
ސ. ފޭދޫ ކުމުންޒާނިގެ ފާތިމަތު އާމިރާ
ރާއްޖޭގެ ތައުލީމީ ދާއިރާގައި ގިނަ ދުވަސްތަކެއް ވަންދެން ހިދުމަތް ކުރެއްވި ސ. ފޭދޫ ކުމުންޒާނިގެ ފާތިމަތު އާމިރާ ސިވިލް ސާވިސް ކޮމިޝަން (ސީ.އެސް.ސީ)ގެ މެމްބަރު ކަމަށް އައްޔަން ކުރަން ރައްޔިތުންގެ މަޖިލީހުން ފާސްކޮށްފިއެވެ.
ސެންޓަރ ފޯ ހަޔަރ ސެކަންޑަރީ އެޑިއުކޭޝަން (ސީ.އެޗް.އެސް.އީ)ގެ ކުރީގެ ޕްރިންސިޕަލްގެ މަގާމާއި އެޑިއުކޭޝަން މިނިސްޓްރީގެ މަގާމުތަކެއް ފުރުއްވި އާމިރާ ސީއެ.ސް.ސީ އަށް އައްޔަން ކުރަން ފާސްކުރީ 73 މެމްބަރުންގެ އިއްތިފާގުންނެވެ.
ސީ.އެސް.ސީގެ މެމްބަރު ކަމަށް ކުރިމަތިލެއްވި ބޭފުޅުންގެ ތެރެއިން، ކޮމެޓީން އިންޓަވިއު ކުރެއްވި ފަރާތްތަކުގެ ތެރެއިން އެންމެ މަތިން މާކްސް ލިބިވަޑައިގެންނެވީ ވެސް އާމިރާއަށެވެ. ތައުލީމާއި ތަޖުރިބާ އާއި ނަޒާހަތްތެރިކަމާއި ލީޑަރޝިޕަށް ބެލުމަށްފަހު މިނިވަން މުއައްސަސާތަކުގެ ކޮމެޓީން އާމިރާއަށް ދެއްވާފައި ވަނީ 89 ޕަސެންޓް މާކްސްއެވެ.
ސީ.އެސް.ސީއަށް އާމިރާ އައްޔަން ކުރަން މަޖިލީހުން ފާސްކުރީ، އެ ކޮމިޝަންގެ މެމްބަރެއްގެ ގޮތުގައި ހުންނެވި ފާތުމަތު ރީނީ އަބްދުއްސައްތާރުގެ ދައުރު ބުދަ ދުވަހަށް ހަމަވުމުންނެވެ. އެ މަގާމަށް ކުރިމަތިލާން ހުޅުވާލުމުން 14 ބޭފުޅަކު ވަނީ އެކަމަށް އެދި ކުރިމަތިލާފައެވެ.
