65 އަހަރުވުމުން ވެރިކަމަށް ކުރިމަތިނުލެވޭ ޝަރުތު ބާތިލު ކުރަން ފާސްކޮށްފި

އުމުރުން 65 އަހަރުވުމުން ވެރިކަމަށް ކުރިމަތިނުލެވޭ ގޮތަށް ގާނޫނުއަސާސީއަށް ގެނެސްފައިވާ ޝަރުތު ބާތިލު ކުރުމަށް، ހުށަހެޅި ބިލު ރައްޔިތުންގެ މަޖިލީހުގެ ބޮޑު އަގުލަބިއްޔަތަކުން ފާސްކޮށްފިއެވެ.

ގާނޫނުއަސާސީއަށް ގެނައި ފުރަތަމަ އިސްލާހު ބާތިލު ކުރުމަށް ހުށަހެޅި ބިލު، ރައްޔިތުންގެ މަޖިލީހުން ފާސްކުރީ ބުދަ ދުވަހު ބޭއްވި ޖަލްސާއަށް ހާޒިރުވެ، ވޯޓުގައި ބައިވެެރިވަޑައިގެންނެވި 72 މެމްބަރުންގެ އިއްތިފާގުންނެވެ. އެ ބިލު ފާސްކުރަން އެންމެ މަދުވެގެން ބޭނުން ވަނީ 64 މެމްބަރުންގެ ވޯޓެވެ. ގާނޫނުއަސާސީއަށް އިސްލާހެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެމްބަރުންގެ ހަތަރުބައިކުޅަ ތިންބައިގެ އަގުލަބިއްޔަތުން ކަމަށް ގާނޫނުއަސާސީގައި ބުނެފައިވެއެވެ.

ވެރިކަމަށް ކުރިމަތިލެވޭ ދޮށީ އުމުރާއި އެންމެ ހަގު އުމުރު ކަނޑައެޅީ 2015 ވަނަ އަހަރު ޕީޕީއެމުންނެވެ. ގާނޫނުއަސާސީއަށް ބަދަލުތަކެއް ގެނެސްގެން، އެގޮތަށް ކަނޑާއަޅާފާފައި ވަނީ އޭރު ޓޫރިޒަމް މިނިސްޓަރަކަށް ހުންނެވި އަހުމަދު އަދީބު ނައިބު ރައީސްގެ މަގާމަށް ގެނައުމަށެވެ. އުމުރުން 33 އަހަރުގެ އަދީބު ނައިބު ރައީސްގެ މަގާމަށް ގެނައުމަށް ގާނުނުއަސާސީއަށް ގެނެސްފައިވާ ބަދަލުގައި ބުނެފައި ވަނީ ރައީސުލްޖުމްހޫރިއްޔާގެ މަގާމަށާއި ރައީސުލްޖުމްހޫރިއްޔާގެ ނައިބުގެ މަގާމަށް ކުރިމަތިލެވޭނީ އުމުރުން 30 އަހަރާއި 65 އަހަރާ ދެމެދުގެ މީހުންނަށް ކަމަށެވެ.

އޭގެ ކުރިން ގާނޫނުއަސާސީގައި ބުނެފައި ވަނީ އެ މަގާމުތަކަށް ކުރިމަތިލެވޭނީ އުމުރުން 35 އަހުރުވުމުން ކަމަށެވެ.

ބުދަ ދުވަހު މަޖިލީހުން ފާސްކުރި ބިލުގައި ވެސް ބުނެފައި ވަނީ ވެރިކަމަށް ކުރިމަތިލެވޭނީ އުމުރުން 35 އަހަރުފުރުމުން ކަމަށެވެ. އެ ބިލު މަޖިލީހަށް ހުށަހެޅީ ކެލާ ދާއިރާގެ މެމްބަރު އަލީ އާރިފެވެ.

އުމުރުން 65 އަހަރުވުމުން ވެރިކަމަށް ކުރިމަތިނުލެވޭ ގޮތަށް ގާނޫނުއަސާސީއަށް ގެނެސްފައިވާ ބަދަލު، ބާތިލު ކުރުމުގެ ބިލު ރައީސުލްޖުމްހޫރިއްޔާ ތަސްދީގު ކުރައްވައިފިނަމަ، ޖުމްހޫރީ ޕާޓީގެ ލީޑަރު، އަދި ރައްޔިތުންގެ މަޖިލީހުގެ ރައީސް ގާސިމް އިބްރާހިމަށް ވެރިކަމަކަށް ކުރިމަތިލެވޭނެއެވެ. ގާސިމްގެ އުމުރަކީ 67 އަހަރެވެ.