ޖުޑީޝަލް އެޑްމިނިސްޓްރޭޓަރަކަށް ޑރ. ނަޒީރު އައްޔަންކޮށްފި

ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ އިދާރީ ހިންގުމުގެ އެންމެ އިސް ފަރާތްކަމަށްވާ ޖުޑީޝަލް އެޑްމިނިސްޓްރޭޓަރުގެ މަޤާމަށް ޑރ. ޢަބްދުﷲ ނަޒީރު އައްޔަންކޮށްފި އެވެ.

ނަޒީރަކީ ރައީސް އަބްދުﷲ ޔާމީންގެ ސަރުކާރުގައި އެޑިއުކޭޝަން މިނިސްޓްރީގެ ސްޓޭޓް މިނިސްޓަރެވެ. އޭނާ ވަނީ ރައީސް ވަހީދުގެ ސަރުކާރުގައި ކެބިނެޓް ސެކަރެޓަރީގެ މަގާމު ވެސް ފުރުއްވާފައެވެ.

ޖުޑީޝަލް އެޑްމިނިސްޓްރޭޓަރަކީ ސުޕްރީމް ކޯޓުގެ ފަނޑިޔާރުންގެ މަޖިލީހުން ޢައްޔަން ކުރާ މަގާމެކެވެ. ނަޒީރު ޖުޑީޝަލް އެޑްމިނިސްޓްރޭޓަރުގެ މަގާމަށް އައްޔަންކޮށްފައި ވަނީ ސުޕްރީމް ކޯޓުގެ ފަނޑިޔާރުންގެ މަޖިލީހުން ބުދަ ދުވަހު ބޭއްވި ބައްދަލުވުމެއްގައެވެ.

ނަޒީރު އެ މަގާމަށް އައްޔަން ކުރެއްވީ، ޖުޑީޝަލް އެޑްމިނިސްޓްރޭޓަރަކަށް ކުރިން ހުންނެވި ހަސަން ސައީދު އެ މަގާމުން ވަކިކުރުމުންނެވެ. ގުޅިފައިވާ ޕާޓީތަކުގެ މެނިފެސްޓޯގައި ބުނެފައި ވަނީ ޖުޑީޝަލް އެޑްމިނިސްޓްރޭޓަރު އައްޔަން ކުރުމުގެ ބާރު މަޖިލީހަށް ދޭންޖެހޭ ގޮތަށް ގާނޫނު ބަދަލު ކުރާނެ ކަމަށެވެ. ގުޅިފައިވާ ޕާޓީތަކުގެ މެނިފެސްޓޯގައި ބުނެފައި ވަނީ ޑީޖޭއޭ ސުޕްރީމް ކޯޓުގެ އިހްތިސާސުގެ ދަށުން ވަކިކުރާނެ ކަމަށެވެ.

ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނަކީ ޝަރުޢީ ދާއިރާގެ އާންމު އިދާރީ އެންމެހައި ކަންތައްތައް އިންތިޒާމްކޮށް ބެލެހެއްޓުމުގެ މަސްއޫލިއްޔަތު މަތިކޮށްފައިވާ އިދާރާއެވެ. އެ އިދާރާ ޤާއިމުކުރެވިފައި ވަނީ، ދިވެހިރާއްޖޭގެ ސުޕްރީމް ކޯޓުގެ ބެލުމުގެ ދަށުން މަސައްކަތް ކުރާ އިދާރާއެއްގެ ގޮތުގައެވެ. މި އިދާރާ ހިނގަމުންދަނީ ސުޕްރީމް ކޯޓުގެ ފަނޑިޔާރުންގެ މަޖިލީހުން ކަނޑައަޅާ ސިޔާސަތުތަކާއި އުޞޫލުތަކާ އެއްގޮތްވާ ގޮތުގެ މަތިންނެވެ.