ސަރުކާރު ވައްޓާލަން އުޅުނު ކަމުގެ ތުހުމަތަށް އަދާލަތު ނަޒީރު ވެސް ފުލުހަށް

ޤާނޫނާ ޚިލާފަށް ސަރުކާރު ވައްޓާލަން އުޅުނު ކަމުގެ ތުހުމަތުގައި އަދާލަތު ޕާޓީގެ މީޑިއާ ކޮމެޓީގެ ޗެއާ އަލީ ނަޒީރު ފުލުސް އޮފީހަށް ހާޒިރު ކޮށްފި އެވެ.

ހޮނިހިރު ދުވަހުގެ ރޭ 9 ޖެހިއިރު ނަޒީރު ފުލުހަށް ހާޒިރުކޮށްފައި ވަނީ ކުއްލި ގޮތަކަށް ޗިޓް ހަވާލުކޮށްގެންނެވެ.

ނަޒީރު ހަޒިރުކޮށްފައި ވަނީ ކުއްލި ނުރައްކަލުގެ ޙާލަތު އިއުލާންކޮށްފައިވަނިކޮށް މިދިޔަ ހުކުރު ދުވަހު ބޭއްވި ޕްރެސް ކޮންފަރެންސެއްގައި، ރާއްޖޭގެ ހުރިހާ ރަށްތަކަކުން މަގުތަކަށް މީހުން ނުކުތުމަށާއި ސަރުކާރާ ދެކޮޅަށް އަޑުއުފުލައި މުޒާހަރާ ކުރުމަށް ހިތްވަރުދީ ވާހަކަ ދައްކާފައިވާ ކަމަށް ތުހުމަތު ކުރެވޭތީ ކަމަށެވެ.

ފުލުސް އޮފީހަށް ހާޒިރުވުމަށްފަހު ނުކުމެވަޑައިގެން ނޫސްވެރިންނަށް މައުލޫމާތު ދެއްވަމުން ނަޒީރު ވިދާޅުވީ ޗިޓް ލިބުނީ ހޮނިހިރު ދުވަހުގެ ރޭ 8 ޖެހިއިރު ކަމަށާއި އެހެންކަމުން ވަޑައިގެންނެވީ ޤާނޫނީ ވަކީލަކާ ނުލައި ކަމަށެވެ. އަދި ވަކީލަކާއެކު އާދީއްތަ ދުވަހު ހާޒިރުވުމަށް އަންގާފައިވާ ކަމަށެވެ.

ނަޒީރު ވިދާޅުވީ ތަހުގީގު އަދި ކުރިއަށް ނުދާ ކަމަށާއި ހަމައެކަނި އެނގިފައިވާ މިންވަރަކީ ޤާނޫނާ ޚިލާފަށް ބާރުގެ ބޭނުންކޮށްގެން ސަރުކާރު ވައްޓާލަން އުޅުމުގެ ތުހުމަތުގައި ހާޒިރު ކުރެވުނުކަން ކަމަށެވެ.

"ތަހުގީގު އަދި ނުއެއް ފެށޭ. ހަމައެކަނި އެނގިފައި އޮތް މިންވަރަކީ ބާރުގެ ބޭނުންކޮށްގެން ޤާނޫނާ ޚިލާފަށް ސަރުކާރު ވައްޓާލަން އުޅުމުގެ ތުހުމަތު މިކުރެވެނީ،" ނަޒީރު ވިދާޅުވިއެވެ.

ނަޒީރަކީ ފަހަކަށް އައިސް ގުޅިފައިވާ ޕާޓީތަކުން ބާއްވާ ޕްރެސް ކޮންފަރެންސްތަކުގައި ޢަދާލަތު ޕާޓީގެ ފަރާތުން ބައިވެރިވެވަޑައިގެން ސަރުކާރަށް ވަރަށް ބޮޑަށް ފާޑު ވިދާޅުވާ ބޭފުޅެކެވެ.