ކުޑަކުދިންގެ މަޝްހޫރު ފިލްމު "ދަ ލަޔަން ކިންގް" ގެ ރީމޭކްގެ ޓްރެއިލަރ ޑިޒްނީއިން އާންމުކޮށްފިއެވެ.

މި ޓްރެއިލަރ ވެގެން ގޮސްފައިވަނީ ޑިޒްނީއިން މިހާތަނަށް ނެރުނު އެންމެ ކާމިޔާބު ޓްރެއިލަރއަށެވެ. 24 ގަޑިއިރުގެ ތެރޭގައި 224.6 މިލިއަން ފަހަރު މި ޓްރެއިލަރ ބަލާފައިވެއެވެ. މިއީ "އެވެންޖާސް: އިންފިނިޓީ ވޯ" އާއި ޖެހިގެން އެންމެ ގިނައިން ބެލި ޓްރެއިލަރއެވެ.

ފިލްމުގެ ތަރިންގެ ތެރޭގައި ޑޮނާލްޑް ގްލޯވަރ، ބިޔޯންސޭ އަދި ޖޯން އޮލިވަރ ހިމެނެއެވެ. މީގެ އިތުރުން ފުރަތަމަ ބަޔަށް އަޑު އެޅި ބައެއް ތަރިން މި ފަހަރުގެ ފިލްމުންވެސް ފެނިގެންދާނެއެވެ، މިގޮތުން މުފާސާގެ ބައި އެ ފިލްމުގައި ކުޅުނު ޖޭމްސް އާލް ޖޯންސް ފާހަގަކޮށްލެވެއެވެ.

މި ފިލްމު ޑައިރެކްޓް ކުރަން ހަމަޖެހިފައި ވަނީ ޖަންގަލް ބުކްގެ ރީމޭކް ވެސް ޑައިރެކްޓު ކުރި ޖޯން ފެވްރޯއެވެ. ސިނަމާގައި މި ފިލްމު އަޅުވަން ހަމަޖެހިފައިވަނީ އަންނަ އަހަރު ޖުލައި މަހުގެ 19 ވަނަ ދުވަހުއެވެ.