"ސްޓޫޑޭންޓް އޮފް ދި އިޔާ 2" ގެ ފުރަތަމަ ޕޯސްޓަރު އާންމުކޮށްފި

މިދިޔަ ދުވަސްތަކުގައި ބޮލީވުޑްގައި އެންމެ ގަދައަށް ފެތުރެމުން ދިޔަ ހަބަރަކީ ކަރަމް ޖޯހަރު އުފެއްދުމަށް ތައްޔާރުވަމުން އަންނަ ފިލްމް "ސްޓޫޑެންޓް އޮފް ދި އިޔާ 2" ގެ ވާހަކައެވެ.

"ސްޓޫޑެންޓް އޮފް ދި އިޔާ 2" ގެ ފުރަތަމަ މަންޒަރަށް ގިނަ ބަޔަކު އިންތިޒާރު ކުރަމުން ދަނިކޮށް ކަރަން ޖޯހަރު މި ވަނީ ފިލްމުގެ ފުރަތަމަ ޕޯސްޓަރު އޭނާގެ ފޭނުންނަށް ދައްކާލާފައެވެ.

ފުރަތަމަ ޕޯސްޓަރުގައި ފެނިގެން ދަނީ ފިލްމުގެ ލީޑް އެކްޓަރު ޓައިގާ ޝްރޮފް އޮށޯވެލައިގެން އޮންނަ މަންޒަރެވެ.

"ސްޓޫޑެންޓް އޮފް ދި އިޔާ 2" ގެ ފުރަތަމަ ޕޯސްޓަރު ބެލުންތެރިންނާ ހަމަ އަށް ގެނެސްދީފައި ވަނީ ޓައިގާ ޝްރިފްއެވެ. އެގޮތުން އޭނާ ކުރި ޓުވިޓެއްގައި ބުނެފައި ވަނީ އެންމެ "ކޫލް" ސްކޫލުން އެޑްމިޝަން ހޯދައިދިން ކަމަށްޓަކައި ކަރަން ޖޯހަރު އަށް ޝުކުރު އަދާ ކުރާ ކަމަށެވެ.

ޓައިގާ ޝްރޮފްގެ އިތުރުން ކަރަން ޖޯހަރު ވެސް ވަނީ ފިލްމުގެ ފުރަތަމަ ޕޯސްޓަރު އޭނާގެ ފޭނުންނާ ހިއްސާ ކޮށްފައެވެ. އަދި ޕޯސްޓަރު ހިއްސާ ކުރުމަށް ފަހު ކަރަން ބުނެފައި ވަނީ "ސްޓޫޑެންޓް އޮފް ދި އިޔާ 2" ކުރިއަށްދާނެ ކަމަށެވެ.

ސްޓޫޑެންޓް އޮފް ދި އިޔާ 2 ގެ ފުރަތަމަ ޕޯސްޓަރު އާންމުކޮށްފައި ވާއިރު ފިލްމުގެ ލީޑިން އެކްޓްރެސް އަދި ހާމަކޮށްފައެއް ނުވެއެވެ. ނަމަވެސް ރިޕޯޓްތައް ބުނާ ގޮތުގައި ޓައިގާ ޝްރޮފްއާއެކު ފެނިގެން ދާނީ ސައިފް އަލީ ޚާންގެ އަންހެން ދަރި ސާރާ އަލީ ޚާން ކަމަށެވެ. ހަމަ އެހެންމެ ފިލްމުގެ ލީޑުގެ އެކްޓްރެސްއެއްގެ ގޮތުގައި ދިށާ ޕަޓާނީއާއި ޗަންކޭ ޕާންޑޭގެ އަންހެން ދަރި އަނަނިޔާ ޕާންޑޭ ވެސް ފެނިގެން ހިގައިދާނެ ކަމަށް ރިޕޯޓްތައް ބުނެއެވެ. ނަމަވެސް ކަރަން މިކަމާ ބެހޭ ގޮތުން އެއްވެސް އެއްޗެއް ހާމަކޮށްފައެއް ނުވެއެވެ.

ކަރަން ޖޯހަރުގެ "ސްޓޫޑެންޓް އޮފް ދި އިޔާ 2" ރިލީޒް ކުރުމަށް ހަމަޖެހިފައި ވަނީ އަންނަ އަހަރުގެ ކުރީކޮޅުއެވެ. ނަމަވެސް ވަކި ތާރީހެއް ކަރަން ޖޯހަރު ހާމަކޮށްފައެއް ނުވެއެވެ.