ޗައިނާ އިން އުމްރާނީ ތަރައްގީގެ ބޮޑެތި މަޝްރޫއުތައް ހިންގަމުން ގެންދަނީ މާ ބޮޑު އަގުގައި ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ރަސްމީ ދަތުރުފުޅެއްގައި މި ވަގުތު އިންޑިއާގައި ހުންނެވި އަމީރު، އެ ގައުމުގެ ނޫސްވެރިންނާއި ވާހަކަ ދައްކަވަމުން ވިދާޅުވީ ނުއަގުގައި މަޝްރޫއުތަކަށް ހިންގާފައި ހުރި ނަމަވެސް، ބައެއް މަޝްރޫއުތައް ނިމިފައި ހުރުމުން ފައިސާ ދައްކަން މަޖުބޫރު ވެފައިވާ ކަމަށެވެ.
"އަޅުގަނޑުމެންނަށް މި އެއްބަސްވުންތައް އަލުން މުރާޖަޢާކޮށް އާ އެއްބަސް ވުންތަކެއް އެކުލަވާލަން ކުރުވޭނެ މާ ބޮޑު ކަމެއް ނެތް، މަގްސަދަކީ ކުރިއަށް އޮތް ތަނުގައި ހިންގޭ މަޝްރޫއުތަކައް ކުރެވޭ ހަރަދު ކުޑަކުރުން،" އަމީރު ވިދާޅުވިއެވެ.
އަމީރު އިތުރަށް ވިދާޅުވެފައި ވަނީ މި ސަރުކާރުން ފުރަތަމަ ހަފްތާގެ ތެރޭގައި، ކުރީގެ ސަރުކާރުގެ ލޯނުތަކާއި، އެ ލޯނުތަކުގެ ސޮވަރިންގ ގެރެންޓީ އާއި ބެހޭ މައުލޫމާތު ހޯދައި އަދަދުތައް ދިމާކުރުމުގެ މަސައްކަތް ކޮށްފައިވާ ކަމަށެވެ.
ޗައިނާ އިން ވަނީ ފާއިތުވެ ދިޔަ ފަސް އަހަރު ރާއްޖޭގެ ތަރައްގީގެ ބޮޑެތި މަޝްރޫއުތަކެއް ހިންގާފައެވެ. އަދި މި ހުރިހާ މަޝްރޫއުތަކުގެ އަމަލީ މަސައްކަތް ވެސް ކޮށްފައި ވަނީ ޗައިނާގެ ކުންފުނި ތަކުންނެވެ. އޭގެ ތެރޭގައި ސިނަމާލެ ބްރިޖް އަދި އެއަރޕޯޓު ތަރައްގީގެ މަޝްރޫއުތައް ހިމެނެއެވެ. އެމް.އެމް.އޭ އިން ވަނީ މި މަޝްރޫއުތަކުގެ ސަބަބުން ޗައިނާ އަށް 1.5 ބިލިއަން ޑޮލަރަށް ދަރަނިވެރި ވެފައިވާކަން ޔަގީންކޮށްދީފައެވެ.
