ފަލާހު ހުށަހެޅި އިސްލާހު ނެގުމުން، ވެރިކަމަށް ކުރިމަތިލާ އުމުރު ކަނޑައަޅަން އަނެއްކާވެސް ހުށަހަޅައިފި

އުމުރުން 65 އަހަރުވުމުން ވެރިކަމަށް ކުރިމަތި ކުރިމަތިނުލެވޭ ގޮތަށް ގާނޫނު އަސާސީއަށް ޕީޕީއެމް ޕާލަމެންޓްރީ ގްރޫޕުގެ މެމްބަރު އިބްރާހިމް ފަލާހު ހުށަހެޅުއްވި އިސްލާހު އަނބުރާ ގެންދިއުމުން، އަނެއްކާވެސް ޕީޕީއެމުން އެ އިސްލާހު މަޖިލީހަށް ހުށަހަޅައިފިއެވެ.

ވެރިކަމަށް ކުރިމަތިލެވޭ އުމުރު ކަނޑައެޅުމަށް އަނެއްކާވެސް މަޖިލީހަށް ހުށަހެޅުއްވީ ކެލާ ދާއިރާގެ މެމްބަރު އަލީ އާރިފެވެ. އޭނާ ހުށަހެޅުއްވި ބިލުގައި ބުނެފައި ވަނީ އުމުރުން 35 އަހަރުވުމުން ވެރިކަމަށް ކުރިމަތިލެވޭނެ ކަމަށެވެ. އޭނާ ހުށަހެޅުއްވި ބިލުގައި ވެރިކަމަށް ކުރިމަތިލެވޭ އެންމެ ދޮށީ އުމުރު ކަނޑައަޅާފައެއް ނުވެއެވެ.

ގާނޫނުއަސާސީއަށް މިހާރު ގެނެސްފައިވާ ބަދަލުގައި ބުނެފައި ވަނީ ރައީސުލްޖުމްހޫރިއްޔާގެ މަގާމަށް ކުރިމަތިލެވޭނީ އުމުރުން 30 އަހަރާއި 65 އަހަރާ ދެމެދުގެ މީހުންނަށް ކަމަށެވެ. އެގޮތަށް ގާނޫނުއަސާސީ އިސްލާހު ކުރީ ޕީޕީއެމުންނެވެ. ޓޫރިޒަމް މިނިސްޓަރަކަށް ހުންނެވި އަހުމަދު އަދީބު ނައިބު ރައީސްގެ މަގާމަށް ގެނައުމަށް، ގާނޫނުއަސާސީއަށް ގެނައި ފުރަތަމަ އިސްލާހުގެ ގޮތުގައި، އެ ބިލު މަޖިލީހުން ފާސްކުރީ 2015 ވަނަ އަހަރުގެ ޖޫން މަހުގެ 24 ވަނަ ދުވަހު 78 މެމްބަރުންގެ އަގުލަބިއްޔަތުންނެވެ.

ވެރިކަމަށް ކުރިމަތިލާ އުމުރު ކަނޑައަޅަން އާރިފު އަންގާރަ ދުވަހު ހުށަހެޅި އިސްލާހުގެ ފުރަތަމަ ކިޔުން މަޖިލީހަށް އިއްވުމަށްފަހު، ބަހުސްގެ މަރުހަލާ ވެސް ކުރިއަށް ގެންދިޔައެވެ. އެ ބިލު މަޖިލީހަށް ހުށަހަޅުއްވަމުން އާރިފު ވިދާޅުވީ ހާލަތު ބަދަލުވަމުން އައިސް، 65 އަހަރުވުމުން ވެރިކަމަށް ކުރިމަތިނުލެވޭ ގޮތަށް އޮތްއޮތުން ބާތިލު ކުރުމަށް އޭނާއަށް ފެންނަ ކަމަށެވެ.

ބަހުސް މަރުހަލާގައި ވާހަކަފުޅު ދައްކަވަމުން ކަނޑިތީމު ދާއިރާގެ މެމްބަރު މުހައްމަދު ހުސައިން ވިދާޅުވީ އިންތިހާބީ މަގާމުތަކަށް ކުރިމަތިލެވޭ އެންމެ މަތީ އުމުރު އެހެން ގައުމުތަކުގައި ކަނޑަައަޅާފައި ނުވާ ކަމަށާއި ނަމަވެސް ކުރިމަތިލެވޭ އެންމެ ހަގު އުމުރު ކަނޑައަޅާފައިވާ ކަމަށެވެ. އޭނާ ވިދާޅުވީ ވެރިކަމަށް ކުރިމަތިލެވޭ އުމުރަކީ 25 އަހަރު ކަމުގައި ކަނޑައެޅުމަށް ފެންނަ ކަމަށެވެ.

"އިންތިހާބުތަކުގައި ކުރިމަތިލެވޭ އެންމެ ދަށް އުމުރެއް ކަނޑައެޅުމުގެ ގޮތުން. އެއްވެސް ހާލަތެއްގައި އެންމެ މަތީ އުމުރެއް ކަނޑައަޅައި، ސީލިންގއެއް އޮތުމަކީ ޑިމޮކްރަޓިކް މުޖުތަމައުތަކުގައި އަމަލު ކުރާ ގޮތެއް ނޫން. އެހެންވީމަ އަޅުގަނޑު ދަންނަވާލާނީ ރައީސުލްޖުމްހޫރިއްޔާކަމުގެ މަގާމަށް ކުރިމަތިލާ އުމުރަކީ އުމުރުން 25 އަހަރު ފުރިފައިވާ މީހަކު ކަމުގައި ހެދުމަށް،" ޖުމްހޫރީ ޕާޓީއާ ދާދިފަހުން ގުޅިވަޑައިގެންނެވި މުހައްމަދު ހުސައިން ވިދާޅުވިއެވެ.