މޫސުމަށް އަންނަ ބަދަލުތަކުގެ ސަބަބުން އިޤްތިސާދަށް އަސަރުކުރާ ކަމަށް ޓްރަމްޕް ޤަބޫލެއް ނުކުރައްވާ
27 ނޮވެމްބަރު 2018 | އަންގާރަ 07:06އެތައް ބިލިއަން ޑޮލަރުގެ ގެއްލުން އެ ޤައުމުގެ އިޤްތިސާދަށް ކުރިމަތިވާނެކަމަށް ލަފާކުރެވޭ
އެމެރިކާގެ ރައީސް ޑޮނަލްޑް ޓްރަމަޕް
މޫސުމަށް އަންނަ ބަދަލުތަކުގެ ސަބަބުން އިޤްތިސާދަށް އަސަރުކުރާނެކަން ބަޔާންކޮށް އެމެރިކާގެ ސަރުކާރުން ނެރެފައިވާ ރިޕޯރޓް ޤަބޫލުފުޅު ނުކުރައްވާކަމަށް އެޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ހޯމަދުވަހު ޓްރަމްޕް މިހެން ވިދާޅުވެފައިވާއިރު، މޫސުމަށް އަންނަމުންދާ ބޮޑެތި ބަދަލުތަކުގެ ސަބަބުން އެމެރިކާގެ އިޤްތިސާދަށް ފޫނުބެއްދޭނެ ވަރުގެ ބޮޑެތި ގެއްލުންތަކެއް ލިބޭނެ ކަމަށާއި، މި ޤަރުނުގެ ނިޔަލަށް އެތައް ބިލިއަން ޑޮލަރުގެ ގެއްލުން އެ ޤައުމުގެ އިޤްތިސާދަށް ކުރިމަތިވާނެ ކަމަށް ލަފާކުރެވޭ ކަމަށް މި ރިޕޯރޓްގައި ފާހަގަކުރައްވާފައިވެއެވެ.
މީގެ އިތުރުން ޤުދުރަތީ ތަފާތު ކާރިސާތައް ދިމާވުމުގެ ސަބަބަކީވެސް މޫސުމަށް އަންނަމުންދާ ބަދަލުތައް ކަމަށާއި، މިފަދަ ކާރިސާތައް ހިނގާ މިންވަރު ނިސްބަތުން އިތުރުވަމުން ދިއުމަކީ ބޮޑު ނުރައްކަލެއްގެ ގޮތުގައި މި ރިޕޯރޓްގައި ސިފަކުރައްވާފައި ވެއެވެ.
އެމެރިކާގެ ސަރުކާރުގެ އިސް އޮފިޝަލުންނާއި ތަޖުރިބާކާރުންގެ އެހީގައި ތައްޔާރުކޮށްފައިވާ މި ރިޕޯރޓް ޤަބޫލުފުޅު ނުކުރައްވާ ކަމަށް ޓްރަމްޕް ވިދާޅުވެފައިވާއިރު، އެމަނިކުފާނު ވަނީ މިދިޔަ އަހަރުވެސް މޫސުމަށް އަންނަ ބަދަލުތައް މަދުކުރުމާއި ގުޅޭގޮތުން އދ ގެ ޤައުމުތަކުން އެއްބަސްވެފައިވާ "ޕެރިސް ޑީލް"އިން އެމެރިކާ ވަކިކުރުމަށް މަސައްކަތް ކުރައްވާފައެވެ. ނަމަވެސް އދ އާއެކު ވެވިފައިވާ އެކިއެކި މުއާހަދާތަކުގެ ސަބަބުން ޓްރަމްޕްއަށް މި އެއްބަސްވުމުން ވަކިނުވެވުނީއެވެ.
