ޖަލު ހުކުމް ތަންފީޒުކުރައްވަމުން ގެންދަވަނިކޮށް ހާލު ދެރަވެ، ހޮސްޕިޓަލްގައި އެޑްމިޓް ކޮށްފައިވާ ކުރީގެ ނައިބުރައީސް އަޙުމަދު އަދީބްގެ ހަށިގަނޑަށް ސްޓެންޓެއް ލައްވާފައިވާތީ އަދީބަށް ބޭނުންވާ މާހައުލާއި އާއިލާގެ އެހީ ލިބޭނެހެން ގޭބަންދަށް ބަދަލުކުރުމަށް ހިއުމަން ރައިޓްސް ކޮމިޝަން އޮފް ދި މޯލްޑިވްސްއިން މޯލްޑިވްސް ކަރެކްޝަނަލް ސަރވިސްއަށް އަންގައިފިއެވެ.
މައުލޫމާތު ލިބިފައިވާ ގޮތުގައި އެޗްއާރްސީއެމްއިން އަދީބް ގެއަށް ބަދަލުކުރުމަށް ކަރެކްޝަނަށް އަންގާފައިވަނީ ބުރާސްފަތި ދުވަހުއެވެ. ނަމަވެސް މިހާތަނަށް އަދީބް ގޭބަންދަށް ބަދަލުކޮށްފައެއް ނުވެއެވެ.
ހޮސްޕިޓަލުގައި އެޑްމިޓްކޮށްގެން އަދީބަށް ފަރުވާދޭން ފަށާފައިވަނީ އެމަނިކުފާނުގެ ވައަތު ކިޑްނީ ހިމެނޭ ހިސާބުން ހަށިގަނޑަށް އިންތިހާއަށް ތަދުވާތީއެވެ. ހޮސްޕިޓަލުގައި އެޑްމިޓްކޮށް، ހެދި ތަހުލީލުތަކުން އެނގުނު ގޮތުގައި އަދީބްގެ ވައަތު ކިޑްނީގައި އުފެދިފައިވާ ހިލަ، އޭރު ވަނީ ކިޑްނީ އާއި ބްލެޑާރ އާއި ދެމެދުގައިވާ ހޮޅި (ޔުރެޓަރ) އަށް ފައިބައި އެ ހޮޅީގައި ތާށިވެފައެވެ. ބޭސްދީގެން ޔުރެޓަރގައި ތާށިވެފައިވާ ހިލަ ނައްތާލުމަށް ކުރި މަސައްކަތް ނާކާމިޔާބު ވުމުން، މި ހަފްތާގެ ހޯމަ ދުވަހު ޑޮކްޓަރުން ވަނީ ލޭޒަރ ބޭނުންކޮށްގެން އެ ހިލަ ނައްތާލުމަށް މަސައްކަތް ކޮށްފައެވެ.
މި ސަރޖަރީ ކާމިޔާބުވި ނަމަވެސް، އެ ހިލަ އާއި އަދި އަދީބްގެ ކަނާތު ކިޑްނީގައި އުފެދިފައިވާ ހިލަ ނައްތާލުމަށް އިތުރު ފަރުވާ ދޭން ޖެހޭކަމަށް ޑޮކްޓަރުން ވަނީ ބުނެފައެވެ. ސަރޖަރީއަށްފަހު އަދީބްގެ ކިޑްނީ އާއި ބްލެޑަރ އާއި ދެމެދުގައިވާ ހޮޅިއަށް ސްޓެންޓެއް ލައްވާފައިވާއިރު، ސަރޖަރީއަށްފަހު އަދީބްގެ ހަށިގަނޑުގައި އިންފެކްޝަނެއް އުފެދި، މިހާރު ޑޮކްޓަރުން ދަނީ ބާރުގަދަ އެންޓިބައޮޓިކްއެއް ދީގެން އަދީބަށް ފަރުވާ ދެމުންނެވެ.
ސަރޖަރީއަށްފަހު އަދީބްގެ ހަށިގަނޑުގައި އުފެދުނު އިންފެކްޝަނުގެ ސަބަބުން އަދީބްގެ ހާލު ވަރަށް ދެރަވެ، އަދީބަށް ގިނަ އުނދަގޫތަކެއް ވަމުންދާ ކަމަށް އަދީބްގެ އާއިލާއިން ވަނީ ބުނެފައެވެ.
އަދީބްގެ ހާލަތާއި ގުޅިގެން، އެޗްއާރްސީއެމްއިން އާއިލާގެ މެންބަރެއްގެ އެހީ އަބަދުމެ ލިބޭނެ ފަދަ މާހައުލެއް ފޯރުކޮށްދިނުމުގެ ގޮތުން ގޭބަންދަށް ބަދަލުކުރުމަށް އަންގާފައިވާއިރު، މަޢުލޫމާތު ލިބޭ ގޮތުގައި މި އެންގުން ތަންފީޒު ކުރުމަށް ކަރެކްޝަންސްއިން މިހާތަނަށް މަސައްކަތް ކޮށްފައެއް ނުވެއެވެ.
ދައުލަތުގެ ކަމާއި ބެހޭ ފަރާތްތަކުން އަދީބްގެ ފަރުވާއަށް އިހުމާލުވެ، އަދީބްގެ ހާލު ދެރަވެގެން ހޮސްޕިޓަލުގައި އެޑްމިޓްކޮށްފައިވާއިރު، އަދީބަށް ފަރުވާ ބޭނުންވާ އިތުރު ބައެއް ކަންކަންވެސް އާއިލާއިން ދަނީ ފާހަގަކުރަމުންނެވެ. އެގޮތުން އަދީބްގެ ކަނާއަތު ކިޑްނީގައި އުފެދިފައިވާ ހިލަ އާއި، އަދީބްގެ ހަށިގަނޑުގައި އުފެދިފައިވާ ސިސްޓްތަކާއި، އަދީބްގެ ލޮލަށް ޖެހިފައިވާ ގްލޮކޯމާއަށް ފަރުވާދިނުމަށް އަދީބްގެ އާއިލާއިން ކެނޑިނޭޅި ދަނީ އެދެމުންނެވެ. އަދި މީގެ ތިން އަހަރެއްހާ ދުވަސްކުރިން އަދީބްގެ ކެންސަރ ސްކްރީނިންގއެއް ހެދުމަށް ޑޮކްޓަރުން އަންގާފައިވާއިރު، މިހާތަނަށް އެ ސްކްރީނިން ހެދުމުގެ ފުރުސަތުވެސް އަދީބަށް ދީފައެއް ނުވެއެވެ.
އަދީބާއި މެދު ޖަލުގައި އެތައް ތަފާތުކުރުންތަކެއް ގެންގުޅޭކަމުގެ ތުހުމަތު ކުރެވޭއިރު، މިއަދު ސަރުކާރުގައި ތިއްބެވި އިސް ވެރިން ވަނީ އެކި ތަންތާނގައި އަދީބަކީ ސިޔާސީ ފަރާތްތަކުގެ ތެރެއިން ޖަލުގައި އެންމެ ބޮޑު އަނިޔާއެއް ލިބެމުންދާ ފަރާތް ކަމަށް ވިދާޅުވެ ވާހަކަފުޅު ދައްކަވާފައެވެ.
