ދިވެހިރާއްޖޭގެ ގައުމީ ޔުނިވާރސީޓީގެ އަތޮޅުތަކުގެ ކެމްޕަސް ތަކުގަ އާއި މާލޭގައި ޕްރީ ޔުނިވަރސިޓީ ކެރިއަރ ގައިޑެންސް އިވެންޓެއް ބޭއްވުމަށް ހަމަޖެހިފައިވާ ކަމަށް އެ ޔުނިވާރސިޓީގެ މާކެޓިން މެނޭޖަރ ނަޖުމުﷲ ޝަރީފު ވިދާޅުވެއްޖެއެވެ.

ނަޖުމުﷲ ވިދާޅުވީ ރާއްޖޭގެ ސްކޫލްތަކުން މިފަހަރު އޯލެވެލް އިމްތިހާނާއި އޭލެވެލް އިމްތިހާން ހެދި ދަރިވަރުންނާއި، މަތީ ތައުލީމް ހާސިލް ކުރުމަށް ބޭނުންވާ ކުދިންނަށް އަމާޒު ކޮށްގެން ބާއްވާ މި އިވެންޓްގައި އެ ޔުނިވަރސީޓީގެ ލެކްޗަރަރ އިން އިވެންޓްގައި ބައިވެރިވާ ދަރިވަރުންނަށް މައުލޫމާތު ދިނުމަށް ހަމަޖެހިފައިވާ ކަމަށެވެ.

އެގޮތުން މައުލޫމާތު ދޭ ދާއިރާ ތަކުގެ ތެރޭގައި ޓުއަރިޒަމް ހޮސްޕިޓަލިޓީ، ޖަރނަލިޒަމް، ޕޮލިޓިކަލް ސައިންސް، ބިޒްނަސް، އެކައުންޓިން، ޓީޗިން، ނަރސިން، ސައިކޮލޮޖީ، ހެލްތް ސައިންސް، އާރކިޓެކްޗަރ، އިންޓީރިއާރ ޑިޒައިން، އިންފޮމޭޝަން ޓެކްނޮލޮޖީ، މެރިން ސައިންސް، މެރިޓައިމް ސްޓަޑީޒް، ޝަރީއާ، ލޯ އަދި މެޑިސިން ހިމެނޭކަމަށެވެ.

"ގައުމީ ޔުނިވާރސިޓީއަކީ ހަމައެކަނި ކިޔަވައިދޭ ތަނެއްނޫން އިނގޭތޯ. ގައުމީ ޔުނިވާރސިޓީގެ ޑިގްރީ އަކީ އެހެން އެކްސްޕީރިއަންސްތަކާއި ވަރަށްގިނަ އަޚްލާގީ ސިފަތައް ލިބިގެން ދަރިވަރަށް އަޅުގަނޑުމެން ދޭ ޑިގްރީ އެއް" ނަޖުމުﷲ ޝަރީފް ވިދާޅުވިއެވެ.

މީގެ އިތުރުން ގައުމީ ޔުނިވާރސިޓީއަކީ ދިރާސާ ކުރުމަށް ޚާއްސަ ސަމާލްކަމެއް ދީގެން ފަންނީ، އިލްމީ ދިރާސާތައް އިތުރު ކުރުމަށް މަސައްކަތް ކުރަމުންދާ ޔުނިވާރސިޓީ އެއް ކަމަށާއި ރިސަރޗަށް ޝައުގުވެރިވާ ކުދިންނަށް މި އިވެންޓަކީ މުހިންމު އިވެންޓަކަށް ވެގެން ދާނެ ކަމަށްވެސް ނަޖުމުﷲ ވިދާޅުވިއެވެ.

މި އިވެންޓްގައި ހދ. ކުޅުދުއްފުށި، ލ ގަން، ގދ. ތިނަދޫ، ސ. ހިތަދޫގެ ކެމްޕަހުގެ އިތުރުން ޔުނިވާރސީޓީގެ އެމްއެންޔޫ ބިޒްނަސް ސްކޫލް ކެމްޕަހުގެ ހުރިހާ ފެކަލްޓީތަކަކުން ދަރިވަރުން މި އިވެންޓް ގައި ބައިވެރިވާނެ ކަމަށް އޭނާ ވިދާޅުވިއެވެ. އިވެންޓް ކުރިއަށް ދާނީ ހޮނިހިރު ދުވަހު 16:00 ން 22:00 އަށެވެ.

ރާއްޖޭގެ ގައުމީ ޔުނިވާރސިޓީގައި 12 ދާއިރާއަކުން 250 ލެކްޗަރަރއިން ކިޔަވައިދެއްވައެވެ.

"ކުދިންގެ އިންޓްރެސްޓް ހުންނަނީ ހަމައެކަނި ކިޔެވުމަކަށް ނޫން. ކިޔެވުމާއި އެކު ރިސާރޗް ކުރުން ވެސް ހިމެނޭނެ. އެހެން ވީމަ މިހުރިހާ ވަސީލަތްތަކެއް ލިބެން ހުރީ ހަމައެކަނި ގައުމީ ޔުނިވާރސިޓީން. އެހެންކަމުން ޔުނިވާރސީޓީގެ ޒިއްމާ އެއް އޯލެވެލް އަދި އޭލެވެލް ނިންމާ ކުދިންނަށާއި މަތީ ތައުލީމް ކިޔަވަން ބޭނުންވާ ކުދިންނަށާއި އަދި މަތީ ތައުލީމަށް ދާން ބޭނުންވާ ކުދިންނަށް މިމައުލޫމަތުތައް ހިއްސާކުރުން" ނަޖުމުﷲ ވިދާޅުވިއެވެ.