ޤުރުއާން މުބާރާތުގެ ނަތީޖާ ފާޅުކުރުމުގައި ބައިވެރިވެ ވަޑައިގަތުމަށް ނާއިބު ރައީސް ދިއްދޫ އަށް
މިއީ މަޤާމާއި ހަވާލުވެ ވަޑައިގެން ފަހުން އަތޮޅުތެރެ އަށް ކުރައްވާ ފުރަތަމަ ދަތުރުފުޅު
ނާއިބު ރައީސް ފައިސަލް ނަސީމް: އެ މަނިކުފާނު ދިއްދޫ އަށް ވަޑައިގެންނެވީ ޤުރުއާން މުބާރާތެއްގެ ނަތީޖާ ފާޅުކުރުމުގެ ރަސްމިއްޔާތުގައި ބައިވެރިވެވަޑައިގެންނެވުމަށް
ރައީސުލްޖުމްހޫރިއްޔާގެ ނާއިބު ފައިސަލް ނަސީމް، ހއ. ދިއްދު އަށް ކުރައްވާ ދަތުރުފުޅެއްގައި ހުކުރުދުވަހުގެ ރޭ ފުރާވަޑައިގެންފިއެވެ.
ރައީސް އޮފީހުން ބުނީ، ނާއިބު ރައީސް ފައިސަލްގެ މިދަތުރުފުޅަކީ އަމިއްލަ ފަރާތަކުން އިންތިޒާމު ކޮށްގެން ދިއްދޫގައި ބޭއްވި ޤުރުއާން މުބާރާތެއްގެ ނަތީޖާ ފާޅުކުރުމުގެ ރަސްމިއްޔާތުގައި ބައިވެރިވެ ވަޑައިގަތުމަށްޓަކައި ކުރައްވާ ދަތުރުފުޅެއް ކަމަށެވެ.
އަދި މިދަތުރުފުޅުގައި، ނާއިބު ރައީސް ފައިސަލްގެ އަރިހުގައި މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ވެސް ބައިވެރިވެ ވަޑައިގަންނަވާ ކަމަށް ރައީސް އޮފީހުން ވަނީ ބުނެފައެވެ.
ޤުރުއާން މުބާރާތެއްގެ ނަތީޖާ ފާޅުކުރުމުގައި ބައިވެރިވެ ވަޑައިގަތުމަށް ކުރައްވާ މި ދަތުރުފުޅަކީ މަޤާމާއި ހަވާލުވެ ވަޑައިގެންނެވި ފަހުން އަތޮޅު ތެރެއަށް ނާއިބު ރައީސް ފައިސަލް ކުރައްވާ ފުރަތަމަ ދަތުރުފުޅެވެ.
މި ދަތުރުފުޅު ނިންމަވާ ލެއްވުމަށްފަހު ނާއިބު ރައީސް ފައިސަލް އެނބުރި މާލެ ވަޑައިގެންނެވުމަށް ހަމަޖެހިފައި ވަނީ ހޮނިހިރު ދުވަހުއެވެ.
