ފޮރިންގ މިނިސްޓަރ ޝާހިދާއިއެކު ސަރުކާރުގެ އިސް ވަފުދެއް އިންޑިއާއަށް
23 ނޮވެމްބަރު 2018 | ހުކުރު 15:54ވަފުދުގައި މިނިސްޓަރ އަމީރާއި މިނިސްޓަރ ފައްޔާޒްވެސް ހިމެނިވަޑައިގަންނަވާ
އިންޑިއާއަށް ފުރާވަޑައިގަތުމުގެ ކުރިން ފޮރިން މިނިސްޓަރ ޝާހިދާއި ފޮރިން މިނިސްޓްރީގެ ބައެއް އިސް ވެރިން ވެލާނާ އިންޓަރނޭޝަނަލް އެއާޕޯޓްގެ ވީއައިޕީ ލޯންޖްގައި
މަޤާމާއި ހަވާލުވެވަޑައިގެން ކުރައްވާ ފުރަތަމަ ރަސްމީ ދަތުރުފުޅުގައި ފޮރިންގ މިނިސްޓަރ ޢަބްދުﷲ ޝާހިދު އަވަށްޓެރި އިންޑިއާއަށް ވަޑައިގެންފިއެވެ.
މި ދަތުރުފުޅުގައި މިނިސްޓަރ ޝާހިދާއި އެކު މިނިސްޓަރ އޮފް ފައިނޭންސް އިބްރާހިމް އަމީރާއި، މިނިސްޓަރ އޮފް އިކޮނޮމިކް ޑިވެލޮޕްމެންޓް އަލްއުސްތާޛް ފައްޔާޒް އިސްމާއިލްގެ އިތުރުން، މިނިސްޓަރ އޮފް ސްޓޭޓް ފޯ ފޮރިން އެފެއާޒް އަޙުމަދު ޚަލީލާއި، ފޮރިން ސެކްރެޓަރީ ޢަބްދުލްޣަފޫރު މުޙައްމަދު އަދި ފޮރިން މިނިސްޓްރީގެ އިސް ބޭފުޅުންވެސް ވަނީ އިންޑިއާއަށް ވަޑައިގެންފައެވެ.
ފޮރިންގ މިނިސްޓަރ ޝާހިދާއި، ސަރުކާރުގެ އިސް ބޭފުޅުން ބައިވެރިވެވަޑައިގަންނަވާ މި ދަތުރުފުޅުގައި އިންޑިއާގެ އެކްސްޓަރނަލް އެފެއާޒް މިނިސްޓަރ ސުޝްމާ ސްވަރާޖާއި، އެކި ދާއިރާތަކުން އިންޑިއާ ސަރުކާރުގެ އިސް ފަރާތްތަކާއި ބައްދަލުކުރައްވާނެއެވެ.
ފޮރިންގ މިނިސްޓްރީއިން ބުނީ މި ދަތުރުފުޅުގައި ބޭއްވޭ އެކި ބައްދަލުވުންތަކުގައި އެކި ދާއިރާތަކުން ރާއްޖެއާއި އިންޑިއާ އާއި ދެމެދު ގުޅުން ބަދަހި ކުރުމަށް މަޝްވަރާ ކުރެވޭނެ ކަމަށެވެ.
ޒަމާނުއްސުރެ ދިވެހިރާއްޖެ އާއި އިންޑިއާ އާއި ދެމެދު ގާތް ގުޅުމެއް އޮތް ނަމަވެސް ވޭތުވެދިޔަ މަދު އަހަރުތަކުގެ ތެރޭގައި އެ ގުޅުން ވަނީ ހީނަރުވެގެން ގޮސްފައެވެ. ހީނަރުވެފައިވާ މި ގުޅުން އަލުން ބަދަހިކުރުމަކީ ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހާއި، ސަރުކާރު ހިންގާ ކޯލިޝަނުން އިސްކަންދޭ ކަމަކަށް ވާއިރު، ރައީސް ސޯލިހު ރައީސުލްޖުމްހޫރިއްޔާ ކަމުގެ ހުވާ ކުރެއްވި ރަސްމިއްޔާތުގައި އިންޑިއާގެ ބޮޑުވަޒީރު ނަރެންދްރަ މޯދީ ވަނީ ބައިވެރިވެވަޑައިގެންފައެވެ.
