ހެނދުނުގެ ނާސްތާ ލިބޭނީ ގްރޭޑް 1 ފެށިގެން 7ގައި ކިޔަވަމުންދާ ދަރިވަރުންނަށް

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސަރުކާރުން ސްކޫލު ކުދިންނަށް ދިނުމަށް ވައުދުވެފައިވާ ހެނދުނުގެ ނާސްތާ ގްރޭޑް އެކަކުން ފެށިގެން ގްރޭޑް ހަތެއްގައި ތައުލީމް ހާސިލު ކުރަމުންދާ ކުދިންނަށް ލިބޭނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

އަމީރު ވިދާޅުވީ ދުނިޔޭގެ ގައުމުތަކުގައި ހެނދުނުގެ ނާސްތާ ދެމުން އަންނަނީ ފުދުންތެރިކަން ނެތް އާއިލާތަކަށް ކަމަށެވެ.

ކޮމެޓީގެ ބައްދަލުވުމަށްފަހު، "ރާއްޖެއެމްވީ"އާ ވާހަކަ ދައްކަވަމުން އަމީރު ވިދާޅުވީ ފުދުންތެރިކަން ނެތް އާއިލާތަކުގެ ދަރިވަރުންނަށް އެކަނި ނާސްތާ ދިނުމުގެ ވިސްނުމެއް ނެތް ކަމަށާއި ގްރޭޑް އެކަކުން ފެށިގެން ހަތެއްގެ ހުރިހާ ދަރިވަރުންނަށް ނާސްތާ ދޭނެ ކަމަށެވެ.

އަމީރު ވިދާޅުވީ ހެނދުނުގެ ނާސްތާ ސްކޫލް ކުދިންނަށް ދިނުމަށް އުސޫލްތަކެއް ކަނޑައެޅޭއިރު، ބެލެނިވެރިންގެ އަތަށް ފާއިސާ ދިނުމުގެ ވިސްނުމެއް ނެތް ކަމަށެވެ.

އަމީރު ވިދާޅުވީ ބެލެނިވެރިންގެ އަތަށް ފާއިސާ ދީފިނަމަ ހުރިހާ ކުދިންނަށް ހެނދުނުގެ ނާސްތާ ލިބިގެންދާނެ ސަރުކާރަށް ކަށަވަރެއް ނުކުރެވޭނެ ކަމަށެވެ. އަދި ނާސްތާ ދޭނެ އުސޫލެއް ނޫނީ އޮނިގަނޑެއް ކަނޑައެޅުމުގެ ދިރާސާތައް މިހާރު ކުރަމުން އަންނަ ކަމަށެވެ.

އަމީރު ވިދާޅުވީ ސަރުކާރުގެ ފުރަތަމަ 100 ދުވަހުގެ ތެރޭގައި ކުދިންނަށް ހެނދުނުގެ ނާސްތާ ދޭނެ ގޮތެއް މުޅިން ފައިނަލްކޮށް އެ މައްސައްކަތް ފެށޭނެ ކަމަށެވެ.

"ބެލެނިވެރިނަށް ފައިސާ ދީގެން އެކަން ކުރުމުގެ ވިސްނުމެއް އަޅުގަނޑުމެންގެ ނެތް. އޭރުން އަޅުގަނޑުމެންނަށް އެންޝުއާއެއް ނުކުރެވޭ ކުދިންނަށް އެ ލިބޭ ކަމެއް." މިނިސްޓަރު އަމީރު ވިދާޅުވި އެވެ.

އަމީރު ވިދާޅުވީ ދުނިޔޭގެ އެހެން ބައެއް ގައުމުތަކުގައިވެސް އެކަންކުރާ ގޮތަށް ސްކޫލު ކެންޓީނަށް ނުވަތަ ކްލާސް ރޫމަށް ގެންގޮސްގެން އެކަން ކުރަން ވިސްނަމުންދާ ކަމަށެވެ.

ސުކޫލު ކުދިންނަށް ހެނދުނުގެ ނާސްތާ ދިނުމަށް 50 މިލިއަން ރުފިޔާ ވަނީ ބަޖެޓުގައި ހިމަނާފައެވެ.