ބަޖެޓް 30 ބިލިޔަނަށް ވުރެ މަތިވެދާނެ!

އަންނަ އަހަރަށް ލަފާކުރާ ބަޖެޓް 30 ބިލިޔަނަށް ވުރެ މަތިވެގެން ގޮސްދާނެ ކަމަށް ބަޖެޓް ކޮމިޓީގެ މެމްބަރުން ވިދާޅުވެއްޖެއެވެ.

ބަޖެޓް ބޮޑުވެގެން ދިޔަކަމުގައިވިޔަސް ބަޖެޓް 31 ބިލިޔަނަށް އަރައިގޮސްދާނެ ކަމަށް ލަފާނުކުރެވޭ ކަމަށް ބަޖެޓް ކޮމިޓީގެ މެމްބަރުންވަނީ ވިދާޅުވެފައެވެ.

އަންނަ އަހަރަށް ލަފާކޮށް ރައީސް ޔާމީންގެ ސަރުކާރުން މަޖިލީހަށް ހުށަހަޅުއްވާފައިވަނީ 29 ބިލިޔަން ރުފިޔާގެ ބަޖެޓަކަށްވާއިރު، ބަޖެޓް ބޮޑުވެގެންގޮސްފައިވަނީ ކޮމިޓީ މަރްހަލާގައި ބަޖެޓައް ގެނެވުނު ބަދަލުތަކާއި ގުޅިގެންނެވެ.

މި ގޮތުން މަޖިލީހަށް ބަޖެޓް ހުށަހެޅުނުއިރު ބައެއް ދާއިރާތަކަށް ބަޖެޓް ފޮތުގައި ހިމަނާފައިވާ އަދަދުތަށް މިހާރުވަނީ ކޮމިޓީ މަރްހަލާގައި ކުރެވުނު ބަހުސްތަކުގެ ތެރޭން ބޮޑުވެގެން ގޮސްފައެވެ.

ބަޖެޓްގެ ކޮމިޓީ މަރްހަލާގެ ތެރޭގައި އާމްދަނީ އިތުރުކުރުމަށް 300 މިލިޔަން ބަޖެޓް ކޮމިޓީއިން ފާސްކޮށްފައިވާއިރު، ފޮރިން މިނިސްޓްރީގެ ބަޖެޓްގައި ބޭރުގެ މިޝަންތަކުގެ ބަޖެޓަށް 25 މިލިޔަން އިތުރުކޮށްދިނުމައް ކޮމިޓީން ވަނީ ފާސްކޮށްފައެވެ.

މިނިސްޓްރީ އޮފް ހަޔަރ އެޑިޔުކޭޝަންގެ ފަސްޓް ޑިގްރީ ޕްރޮގްރާމްއަށް 100 މިލިޔަން އިތުރުކޮށްދިނުމަށް ކޮމިޓީން ފާސްކޮށްފައިވާއިރު، ރައީސުލްޖުމްހޫރިއްޔާ ކަންކޮށްފައިވާ ފަރާތްތަކަށް ދޭ އިނާޔަތް 120,000 (އެއްލައްކަ ވިހިހާސް) ބޮޑުކުރުމަށްވެސް ކޮމިޓީއިން ވަނީ ފާސްކޮށްފައެވެ.

މީގެ އިތުރުން ދޫނިދޫގެ ބަނދަރު މަރާމާތު ކުރުމަށް 10 މިލިޔަން އިތުރުކުރަން ފާސްކޮށްފައިވާއިރު، ޖުޑީޝަލް އެޑްމިނިސްޓްރޭޝަންގެ ބަޖެޓަށް 35 މިލިޔަން އިތުރުކުރުމަށް ފާސްކޮށްފައިވެއެވެ.

ހިމެންދޫ ބަނދަރު މަރާމާތުކުރުމުގެ މަސައްކަތަށް ހިނގާ ޚަރަދު ބަޖެޓްގައި އުނިވެފައިވަތީ އެކަމަށް 8 މިލިޔަން އިތުރުކުރުމަށް ކޮމިޓީންވަނީ ފާސްކޮށްފައެވެ.

މީގެ އިތުރުން ފެމިލީ ޕްރޮޓެކްޝަން އޮތޯރިޓީގެ ބަޖެޓަށް 2 މިލިޔަން އިތުރުކުރުމަށްވެސް ކޮމިޓީންވަނީ ފާސްކޮށްފައެވެ.

ބަޖެޓް ކޮމިޓީން ބަޖެޓަށް ގެނެވުނު އިސްލާހުތަކާއި އަދި އެ އިސްލާހުތަކާއި ގުޅިގެން ބަޖެޓަށް އަންނަ ބަދަލުތަކަށް މަޝްވަރާކޮށް ފައިނަލް ބަޖެޓް އެކުލަވާލުމުގެ މަސައްކަތް ހުކުރުދުވަހުގެ ރޭ އޮންނަ ބަޖެޓް ކޮމިޓީގައި އޮންނާނެއެވެ.

ބަޖެޓް ކޮމިޓީގެ މަސައްކަތް ނިންމުމަށްފަހު ފައިނަލް ބަޖެޓް ރިޕޯރޓް އަންނަ ހަފްތާ ތެރޭގައި މަޖިލީހުގެ ތަޅުމަށް ހުށަހެޅުމަށް ވަނީ ނިންމާފައެވެ.

މަޖިލިސް ތަޅުމަށް ބަޖެޓް ފޮނުވުމަށް ނިންމާފައިވަނީ ނޮވެމްބަރުމަހުގެ 25 ވަނަ ދުވަހުއެވެ. އެއަށްފަހު ބަޖެޓަށް މަޖިލިސް ތަޅުމުގައި ބަހުސްކުރުމަށްފަހު، މަޖިލިސް ތަޅުމުގައި ގެނެވޭ އިސްލާހުތަކަށްފަހު، ބަޖެޓް ފާސްކުރުމަށް ނިންމާފައިވަނީ ނޮވްމެބަރު މަހުގެ 29 ވަނަ ދުވަހުއެވެ.