ކޯޓުތަކުން ކުރާ ހުކުމްތަކަށް އީސީން އިހުތިރާމް ކުރާނެ: ޝަރީފް
24 ގަނޑިއިރުގެ ތެރޭގައި ކޮންގްރެސްއިން އައްޔަން ކުރި މަގާމުތައް އަނބުރާ ދޭންޖެހޭ
އިލެކްޝަން ކޮމިޝަންގެ ރައީސް ރައީސް އަޙްމަދު ޝަރީފް
ރާއްޖޭގެ ޝަރުއީ ކޯޓުތަކުން ކުރާ ހުކުމްތަކަށް އިލެކްޝަންސް ކޮމިޝަނުން އިޙްތިރާމްކުރާނެ ކަމަށް އެކޮމިޝަންގެ ރައީސް އަޙްމަދު ޝަރީފް ވިދާޅުވެއްޖެއެވެ.
ޕީޕީއެމްގެ ކޮންގްރެސް ބަލައިނުގަންނަން އިލެކްޝަންސް ކޮމިޝަނުން ނިންމީ ގާނޫނާ ހިލާފަށް ކަމަށް ހައިކޯޓުން ހުކުމް ކުރުމާއި ގުޅިގެން ޝަރީފް ކުރެއްވި ޓުވީޓެއްގައި ވިދާޅުވީ އެކޮމިޝަނުން ހުކުމްތަކަށް އިހްތިރާމްކުރާނެ ކަމަށާއި އަދި ހުކުމާއި މެދު ހިތްހަމަނުޖެހޭ ނަމަ ދެން އޮތް މަރުހަލާއަކަށްވެސް ދާނެ ކަމަށެވެ.
ހައިކޯޓުން ކޮށްފައިވާ ހުކުމްގައި ބުނެފައިވަނީ ކުރިއަށް އޮތް 24 ގަޑިއިރުގެ ތެރޭގައި އެ ޕާޓީގެ ކޮންގްރެސްއިން އައްޔަން ކުރި މަގާމުތައް އަނބުރާ ދިނުމަށް އިލެކްޝަންސް ކޮމިޝަންގެ މައްޗަށް އަމުރު ކުރާކަމަށެވެ.
ޕީޕީއެމްގެ ހިންގުމުގެ ބާރުތައް ރައީސް މައުމޫންގެ އަތްޕުޅުން ނެންގެވުމަށްފަހު، އެޕާޓީ ހިންގުމުގެ ބާރު ހަވާލުކޮށްފައި ވަނީ ޕީޕީއެމްގެ މުސްތަޝާރު, ކުރީގެ ރައީސް އަބްދުﷲ ޔާމީނަށެވެ. ސިވިލް ކޯޓުގެ ހުކުމަކުން 2016 ވަނަ އަހަރު ރައީސް ޔާމީނަށް ޕީޕީއެމް ހިންގުމަށް ހަވާލު ކުރި ހުކުމްގައި ބުނެފައި ވަނީ ރައީސް ޔާމީންގެ ބެލުމުގެ ދަށުން އެ ޕާޓީގެ ގައުމީ ޖަލްސާ އެއް ނުވަތަ ކޮންގްރެސް އެއް ބޭއްވުމަށެވެ. ނަމަވެސް އެ ޕާޓީން ކޮންގްރެސް ބާއްވާފައި ވަނީ ރައީސް ޔާމީނާއި ކޯޓުން, ޕީޕީއެމް ހަވާލުކުރިތާ ދެ އަހަރު ފަހުން މިދިޔަ ސެޕްޓެމްބަރު މަހުގައެވެ.
ޕީޕީއެމްގެ ކޮންގްރެސް ބަލައިނުގަންނަން ނިންމީ ގާނޫނާ ހިލާފަށް ކަމަށް ހައިކޯޓުން ހުކުމް ކޮށްފައިވާއިރު ޕީޕީއެމްގެ ކޮންގްރެސްގައި އެޕާޓީގައި ނުހިމެނޭ މީހުންވެސް ބައިވެރިވެފައިވާ ކަމަށް އީސީއިން ވަނީ ބުނެފައެވެ. އަދި ޕީޕީއެމްގެ އަސާސީ ގަވާއިދުގައި އެޕާޓީގެ މަގާމުތަކަށް ކުރިމަތިލެވޭނީ އެޕާޓީގެ މެންބަރުންނަށް ވާތީ ކަނޑައެޅިފައިވާ މުއްދަތެއް ހަމަވުމުން ކަމަށާއި, ޕާޓީގެ އެފަދަ އަސާސްތަކާ ހިލާފުވެފައިވާ އިރު ކޮންގްރެސްގެ ނިންމުންތައް ބަލައިގަނެވޭނެ ޖާގައެއް ނެތް ކަމަށް އީސީން މީގެ ކުރިން ވަނީ ބުނެފައެވެ.
