ހެލްތު މިނިސްޓަރ އަބްދުﷲ އަމީން އައިޖީއެމް ހޮސްޕިޓަލަށާއި އޭޑީކޭ ހޮސްޕިޓަލަށް ޒިޔާރަތްކުރައްވައި ބަލިމީހުންގެ ހާލު ބައްލަވާލައްވައިފިއެވެ.
މިނިސްޓަރ އަމީން އައިޖީއެމްއެޗަށާއި އޭޑީކޭ އަށް ވަޑައިގެން އެތަނުގައި އެނދުމަތި ކުރެވިގެން ފަރުވާ ދެމުންދާ މީހުންނާއި އެހެނިހެން ބަލި މީހުންނާ ބައްދަލު ކުރައްވައި އެފަރާތްތަކުގެ ހާލު އަހުވާލު ވަނީ އޮޅުންފިލުއްވާފައެވެ. އަދި ބަލިމީހުންނާއި އެ މީހުންގެ އާއިލާތަކަށް އެމަނިކުފާނު ވަނީ ހިތްވަރު ދެއްވައި ހެޔޮ އެދިވަޑައިގަންނަވާފައެވެ. މީގެ އިތުރުން އެމަނިކުފާނު ވަނީ ހޮސްޕިޓަލްތަކުގެ މަސައްކަތް ކުރިއަށް ދާ ގޮތް ބައްލަވައި އެތަނުގައި މަސައްކަތް ކުރާ މުވައްޒަފުންނަށް، ކުރާ މަސައްކަތަށް ހިތްވަރު ދެއްވާފައެވެ.
މިއީ އެ މަނިކުފާނު ވަޒީރު ކަމާއި ހަވާލުވެ ވަޑައިގަތް ފަހުން ހޮސްޕިޓަލްތަކަށް ޒިޔާރަތް ކުރެއްވި ފުރަތަމަ ފަހަރެވެ. މިނިސްޓަރކަމާއި ހަވާލުވެ ވަޑައިގެންނެވުމަށް ފަހު އަމީން ވަނީ ސިއްހީ ދާއިރާގެ އެކިއެކި ފަރާތްތަކާއި މިނިސްޓްރީގައި ބައްދަލުކުރައްވައި، ބައެއް ރަށްރަށުގައި ހިންގާ ހޮސްޕިޓަލްތަކުގެ ވެރިންނާއި ވެސް ފޯނުން ގުޅުއްވައި ވާހަކަ ދައްކަވާފައެވެ.
