މުހުތާޒަށް ކުރި ހުކުމް ހައިކޯޓުން ބާތިލުކޮށްފި

ރައީސް އަބްދުﷲ ޔާމީން ހައްޔަރު ކުރަން ފޭކް ކޯޓު އަމުރެއް ތައްޔާރުކުރި މައްސަލައިގައި ކުރީގެ ޕްރޮސެކިއުޓަރ ޖެނެރަލް މުހުތާޒްގެ މައްޗަށް ކްރިމިނަލް ކޯޓުން ކުރި 17 އަހަރު ދުވަހުގެ ޖަލު ހުކުމް ހައިކޯޓުން ބާތިލްކޮށްފިއެވެ.

ބުރާސްފަތި ދުވަހު އޮތް ހުކުމްކުރުމުގެ މަޖިލީހުގައި ފަނޑިޔާރު ނިންމެވީ މުހުތާޒުގެ މައްޗަށް ދަށު ކޯޓުން ކޮށްފައިވާ ހުކުމަކީ އުސޫލަތަކާއި ހިލާފަށް ކޮށްފައިވާ ހުކުމަކަށް ވާތީ އެ ހުކުމް ބާތިލް ކުރެއްވުމަށެވެ.

މުހުތާޒު 17 އަހަރަށް ޖަލަށް ލުމަށް ކްރިމިނަލް ކޯޓުން ހުކުމްކުރީ 2016 ވަނަ އަހަރުގެ ޖޫން މަހުގެ ތެރޭގައެވެ.

ދައުލަތުގެ ފަރާތުން މުހުތާޒްގެ މައްޗަށް އުފުލާފައިވަނީ ސައްހަ ނޫން ކޯޓު އަމުރެއް ނެރެ ރައީސް އަބްދުﷲ ޔާމީން ހައްޔަރުކޮށް ރަހީނުކުރަން އުޅުނު ކަމަށް ބުނާ މައްސަލައިގައި ކުށުގެ ދައުވާއެވެ.

މުހުތާޒްގެ މައްޗަށް ކްރިމިނަލް ކޯޓުން އިއްވި ހުކުމް ބާތިލުކޮށްފައިވާއިރު، އޭނާގެ މައްޗަށް އުފުލުނު އިތުރު ދައުވާތަކެއް ކްރިމިނަލް ކޯޓުން ދާދިފަހުން ބާތިލުކޮށްފައިވެއެވެ.

އެގޮތުން ވަކި އަސްލެއް އޮތް އެއްޗެއް ސައްހަ ނޫން ގޮތެއްގައި ދެއްކުމަށް ލިޔުމެއް އުފެއްދުމުގެ ދައުވާ އާއި ވަކި އުސޫލަކުން ދޫކޮށްފައިވާ ލިޔުމެއް ސައްހަ ނޫން ގޮތެއްގައި ދެއްކުމުގެ ދައުވާ ބާތިލުކޮށްފައިވަނީ ކްރިމިނަލް ކޯޓުންނެވެ.

މުހުތާޒަށް ދަށުކޯޓުން ކޮށްފައިވާ ހުކުމް ބާތލްކޮށް ހައިކޯޓުން ކުރި ހުކުމުގައި ވަނީ މުޙްތާޒު މުޙްސިންގެ މައްޗަށް ދައުލަތުން އުފުލާފައިވާ ޓެރަރިޒަމްގެ ޢަމަލެއްކުރަން އުޅުމާއި ބައިވެރިވުމުގެ ކުށުގެ މާއްދީ ރުކުނާއި މަޢުނަވީ ރުކުން ޝަރީޢަތަށް ސާބިތުވާ މިންވަރަށް ހެކިޤަރީނާ ލިބިފައިނުވާ ކަމަށެވެ.

އެގޮތުން ކްރިމިނަލް ކޯޓުމް މުޙްތާޒުގެ މައްޗަށް ޓެރަރިޒަމްގެ ޢަމަލެއްކުރަން އުޅުމާއި ބައިވެރިވުމުގެ ކުށް ސާބިތުވާކަމަށް ކުރައްވާފައިވާ ޙުކުމަށް ބަދަލު ގެންނަންޖެހޭކަމަށް ހައިކޯޓުގައި މައްސަލަ ބެއްލެވި ފަނޑިޔާރުން އިއްތިފާޤުވެފައިވާކަމަށް ޙުކުމުގައި ވެއެވެ.

މުހްތާޒުގެ މައްޗަށް ޓެރަރިޒަމްގެ އަމަލެއް ކުރަން އުޅުމާއި ބައިވެރިވުމުގެ ދައުވާ ސާބިތުވާ ކަމަށް ކަނޑައަޅާފައި ވަނީ 2016 ވަނަ އަހަރުގެ ފެބްރުއަރީ މަހުގެ ހަ ވަނަ ދުވަހުގެ ރޭ ދަންވަރުގެ ވަގުތެއްގައި އދ. މާމިގިއްޔަށް ގޮސް އެރަށު ކޯޓު ހުޅުވައިގެން ރައީސް ޔާމީން ހައްޔަރުކުރަން ސައްހަ ނޫން ކޯޓު އަމުރެއް ތައްޔާރުކުރަން މަސައްކަތްކޮށްފައިވާކަން ޝަރީއަތަށް ސާބިތުވުމުން ކަމަށް ބުނެއެވެ.

މިމައްސަލައިގައި ދެން ހުކުމް ކުރި އދ. މާމިގިލީ ކޯޓުގެ އިސް މެޖިސްޓްރޭޓް އަހުމަދު ނިހާންގެ މައްޗަށް އިއްވި 17 އަހަރަށް ޖަލަށްލުމުގެ ހުކުމްވެސް ހައި ކޯޓުންވަނީ ބާތިލްކޮށްފައެވެ.

ނިހާންގެ މައްޗަށް ކްރިމިނަލް ކޯޓުން އިއްވި ހުކުމް ބާތިލްކޮށް، ހައި ކޯޓުން ކުރި ހުކުމްގައި ވަނީ ނިހާންގެ މައްޗަށް ހުކުމް ކުރީ ޝަރުއީ އުސޫލުތަކާ ހިލާފަށް ކަމަށެވެ.