ނިމިދިޔަ ރިޔާސީ އިންތިޚާބުން ބޮޑުތަނުން ބަލިވެވަޑައިގެންނެވި ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް އިތުރު ސިޔާސީ ޕާޓީއެއް ހައްދަވަން ނޫޅުއްވާ ކަމަށް އެމަނިކުފާނުގެ ސަރުކާރުގެ ރައީސް އޮފީހުގެ ލީގަލް އެފެއާޒް މިނިސްޓަރު އާއިޝަތު އާޒިމާ ޝުކޫރު ވިދާޅުވެއްޖެ އެވެ.
އާޒިމާ ޝަކޫރު މިހެން ވިދާޅުވެފައި މިވަނީ ރައީސް ޔާމީން އިތުރު ސިޔާސީ ޕާޓީއެއް އުފައްދަވަން އުޅުއްވާކަމަށް ބައެއް މީޑިއާތަކުން ރިޕޯޓް ކޮށްފައިވާތީ އެކަމަށް ރައްދު ދެއްވަމުންނެވެ.
ފޭސްބުކް ގައި އާޒިމާ ވިދާޅުވެފައިވަނީ ޕީޕީއެމްގެ ކޮންގްރެސް ބާއްވާފައިވަނީ އިލެކްޝަންސް ކޮމިޝަންގެ މަންދޫބުން ތިބެގެން ޕާޓީގެ އަސާސީ ޤަވާއިދާ އެއްގޮތަށް ކަމަށެވެ. އަދި ރައީސް ޔާމީން އިތުރު ސިޔާސީ ޕާޓީއެއް ހެއްދެވުމުގެ މަސައްކަތެއް ނުކުރައްވާ ކަމަށް އާޒިމާ ވިދާލުވިއެވެ.
އާޒިމާ މިހެން ވިދާޅުވެފައިވާއިރު ޕީޕީއެމްގެ ލިޑަރ ޝިޕްއާ ގުޅޭ މައްސަލައެއް މިހާރު ކޯޓުގައި އެބައޮތެވެ. އަދި އާޒިމާ މިހެން ވިދާޅުވެފައިވާއިރު ރައީސް ޔާމީން އިތުރު ސިޔާސީ ޕާޓީއެއް ހައްދަވަން އުޅުއްވާކަމުގެ އަޑުތަކެއް ވަނީ ފެތުރިފައެވެ.
މީގެ އިތުރުން ރައީސް ޔާމީންގެ ތަރުޖަމާނު އިބްރާހިމް މުއާޒް އަލީ ކުރެއްވި ޓްވީޓެއްގައި ވިދާޅުވީ ރައީސް ޔާމީން އިސްވެ ހުންނަވައިގެން ސިޔާސީ ޕާޓީއެއް ހައްދަވަން ނޫޅުއްވާކަމަށެވެ.
Raees Yameen isve hunnavaigen siyaasee aa party eh haddhavaakah noolhuvvaa. Baeh faraaiythakun egothah e vaahaka dhakkavany emanikufaanu nisbaiyvevadaigannavaa party ge membarunge medhugai baibaivun ufeddhumah!
— ɪʙʀᴀʜɪᴍ ᴍᴜᴀᴢ ᴀʟɪ (@SpokespersonMV) November 22, 2018
އަދި ބައެއް ފަރާތްތަކުން އެގޮތަށް ވާހަކަ ދައްކަވަނީ އެމަނިކުފާނު ނިސްބަތްވެވަޑައިގަންނަވާ ޕާޓީގެ މެމްބަރުންގެ މެދުގައި ބައިބައިވުން އުފެއްދުމަށްކަމަށްވެސް މުއާޒް ތުހުމަތުކުރެއްވިއެވެ.
ރައީސް ޔާމީންގެ އަރިސް ބޭފުޅެއްކަމަށްވާ، ކުރީގެ ސަފީރު މުހައްމަދު ހުސައިން ޝަރީފްވެސް ވަނީ ރައީސް ޔާމީން ޕާޓީއެއް ހައްދަވަން ނޫޅުއްވާކަމަށް ވިދާޅުވެފައެވެ. އަދި ޕާޓީއެއް ހެއްދެވުމަށް ޕީޕީއެމްގެ އިސްވެރިޔަކު ފޯމެއް ނެންގެވިކަމަށް ބުނާ ވާހަކައާއި ގުޅޭ ގޮތުން އޭނާ ވިދާޅުވީ އޭނާއަކީ ޕާޓީގެ ސެކްރެޓަރީ ޖެނެރަލްކަމަށާއި، އެފަދަ ކަމެއް ނުކުރައްވާކަމަށެވެ.
