އިލްހާމް ޕީޕީއެމަށް ދިޔައީ އަޅުގަނޑު ކުރެން އަހައި، ހުއްދަ ހޯދައިގެން: ގާސިމް

ދަނގެތި ދާއިރާގެ މެމްބަރު އިލްހާމް އަހުމަދު ޖުމްހޫރީ ޕާޓީ (ޖޭޕީ) ދޫކުރައްވައި، 2016 އަހަރު ޕީޕީއެމާ ގުޅިވަޑައިގެންނެވީ ޖޭޕީގެ ލީޑަރު ގާސިމް އިބްރާހިމް ހުއްދަ ދެއްވައިގެން ކަމަށް، ގާސިމް އަމިއްލަފުޅަށް ވިދާޅުވެއްޖެއެވެ.

ޖުމްހޫރީ ޕާޓީގެ ޓިކެޓުގައި 2014 ވަނަ އަހަރު މަޖިލިސް އިންތިހާބުގައި ވާދަ ކުރައްވައި، އެ ދާއިރާގެ ގޮނޑި ކާމިޔާބު ކުރެއްވި އިލްހާމް، ޖޭޕީ ދޫކުރައްވައި ޕީޕީއެމާ ގުޅިވަޑައިގެންނެވީ 2016 ވަނަ އަހަރުގެ އޮކްޓޯބަރު މަހުގެ 20 ވަނަ ދުވަހުއެވެ.

އިލްހާމް އަނެއްކާވެސް ޖޭޕީއާ ގުޅިވަޑައިގެންނެވުމަށް މ. ކުނޫޒުގައި ބުދަ ދުވަހު ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން ގާސިމް ވިދާޅުވީ އިލްހާމް ޕީޕީއެމާ ގުޅިވަޑައިގެންނެވީ ދަނގެތި ދާއިރާއަށް ކަންތައްތަކެއް ކޮށްދިނުމަށާއި އާއިލާއަށް ނުރައްކާތެރިކަން އޮތުމުން ކަމަށެވެ.

"އެމަނިކުފާނު ވަޑައިގެންނެވީ ދާއިރާއަށް ކަންތައްތަކެއް ކޮށްދިނުމުގެ ބޭނުމުގައި. އަޅުގަނޑު ކުރެން އައްސަވާފައި، އަޅުގަނޑުގެ ހުއްދަ ލިބިގެން. އަޅުގަނޑު އެކޮޅަށް ވަޑައިގަންނަވާށޭ ނޫނިއްޔާ މަނިކުފާނާއި މަނިކުފާނުގެ އާއިލާއަށް ވެސް އޮތް ނުރައްކާތެރިކަން ވިސްނާފައި، އިންސާފެއް ނެތި ކަންތައްތަކެއް ކުރާނެކަން ޔަގީންކަން އެމަނިކުފާނަށާއި އަޅުގަނޑަށް ކަށަވަރުކަމާއެކީގައި އޮތީމަ އަޅުގަނޑު ދެންނެވީ ވަޑައިގަންނަވާށޭ. އެ އަނިޔާވެރިކަމުން ސަލާމަތްވުމަށް،" ގާސިމް ވިދާޅުވިއެވެ.

ރައީސް އަބްދުﷲ ޔާމީނާ ގާތްގުޅުމެއް އޮންނަ ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފު ޖޭޕީއާ ގުޅިވަޑައިގެންނެވުމުން ގާސިމް ވަނީ އޭނާއަށް ވެސް ތައުރީފު ކުރައްވައި ވާހަކަފުޅު ދައްކަވާފައެވެ.

ގާސިމް ވިދާޅުވީ މެމްބަރު ހުސައިނަކީ އޭނާއާ އަބަދުވެސް ގާތް ގުޅުމެއް ބާއްވަމުން އަންނަ މެމްބަރެއް ކަމަށާއި ޖޭޕީއާ ގުޅުމަށް ކުރިން ފެށިގެން މެމްބަރު ހުސައިން އޭނާއާ ވާހަކަ ދައްކަމުންދާ ކަމަށެވެ.

"...އެމަނިކުފާނު އަޅުގަނޑަށް ޖާސޫސްކޮށްދެއްވީކީ ނޫނޭ މި ދަންނަވަނީ. އެހެން ނަމަވެސް ވަރަށް ކްލޯޒް ކަނެކްޝަނެއް، ވަރަށް ގާތް ގުޅުމެއް އޮތް. މިދަންނަވަނީ ހަގީގަތް. އެބޭފުޅާއަށް އެނގިވަޑައިގަންނަވާނެ. ކޮންމެހެން އަޅުގަނޑު ތިބޭފުޅުންނަށް އޮޅުވާކަށެއް ނޫން. ކޮންވެސް ސަބަބުން އޮވެގެން ނަމަވެސް އަޅުގަނޑާ ގާތް ގުޅުމެއް ބާއްވާ،" ގާސިމް ވިދާޅުވިއެވެ.