މެންބަރު މުހައްމާ އެމްޑީޕީ އަށް ސޮއިކުރައްވައިފި

ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު މުޙައްމަދު ޢަބްދުﷲ (މުހައްމާ) މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި ގުޅިވަޑައިގެންފިއެވެ.

މުހައްމާ އެމްޑީޕީ އާއި ގުޅިވަޑައިގަތީ އެ ޕާޓީގެ ރައީސް، އަދި ކުރީގެ ރައީސް މުޙައްމަދު ނަޝީދާއި، ޕާޓީގެ ޗެއާޕަރސަން ޙަސަން ލަތީފްގެ ހާޒިރުގައެވެ.

ޖުމްހޫރީ ޕާޓީގެ ޓިކެޓެއްގައި ރައްޔިތުންގެ މަޖިލީހަށް ހޮވިވަޑައިގަތް މުހައްމާ ފަހުން ވަނީ އޭރު ސަރުކާރު ހިންގަމުން ދިޔަ މައި ޕާޓީ، ޕީޕީއެމް އާއި ގުޅިވަޑައިގެންފައެވެ. އެ ޕާޓީގައި ހުންނަވަނިކޮށް، ރައްޔިތުންގެ މަޖިލީހުގެ އޭރުގެ ރައީސް، ޢަބްދުﷲ މަސީހުގެ އިތުބާރު ނެތްކަމަށް ބުނެ މަޖިލީހަށް ހުށަހެޅި މައްސަލައިގައި ބައިވެރިވުމާއި ގުޅިގެން ޕާޓީ އާއި މުހައްމާ އާއި ދެމެދު ނުތަނަވަސްކަން އުފެދިގެން ދިޔައެވެ. އެ ނުތަނަވަސްކަމުގެ ތެރޭގައި މުހައްމާ ޕާޓީ ދޫކުރެއްވިއިރު، އޭގެ ފަހުން ޕީޕީއެމް އިން ވަނީ އެންޓި ޑިފެކްޝަން ޤާނޫނުގެ ނަމުގައި ޤާނޫނެއް ފާސްކޮށް، އެ ޤާނޫނުގެ ނާޖާއިޒު ފައިދާ ނަގައިގެން ރައްޔިތުންގެ މަޖިލީހުގެ މެންބަރުކަން މުހައްމާ އަށް ގެއްލިފައިވާ ކަމަށް ނިންމާފައެވެ. ނަމަވެސް ފަހުން ސުޕްރީމް ކޯޓުން ވަނީ މުހައްމާ އާއި، ޕީޕީއެމް އިން ވަކިވެ ވަޑައިގަތުމުން ޕާޓީއިން ވަކިކުރި އިތުރު 11 މެންބަރެއްގެ ގޮނޑި ނުގެއްލޭ ކަމަށް ނިންމާފައެވެ.

ޕާޓީއަށް ސޮއިކުރައްވައި، ފޯމް އެމްޑީޕީގެ ޗެއަރޕާސަނާއި ހަވާލުކުރައްވަނީ -- ފޮޓޯ: އެމްޑީޕީ

މެންބަރު މުހައްމާ އެމްޑީޕީ އަށް ސޮއިކުރައްވާ އެ ޕާޓީ އާއި ގުޅިވަޑައިގަތް އިރު، ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ވާދަކުރައްވާނެކަން މުހައްމާ އަދި ރަސްމީކޮށް ހާމަކުރައްވާފައެއް ނުވެއެވެ.