އިންޑިއާ އިން ރާއްޖެ އަށް ދިން 2 ހެލިކޮޕްޓަރު ރާއްޖޭގައި ބާއްވާނެކަމަށް އައު ދިފާޢި ވަޒީރު އޛ މާރިޔާ އަހުމަދު ދީދީ ވިދާޅުވެއްޖެއެވެ. 

އިންޑިއާގެ ވިއޯން ނިއުސް އަށް މައުލޫމާތު ދެއްވަމުން މިނިސްޓަރ މާރިޔާ ވިދާޅުވީ "އަވަށްޓެރިން ދޭ އެއްޗެހި އަނބުރާ ދިނުމަކީ އަޅުގަނޑުމެންގެ ސަޤާފަތުގައި އޮންނަ ކަމެއް ނޫން" ކަމަށެވެ. އަދި އިންޑިއާ އިން ދިން ހެލިކޮޕްޓަރތައް ބަލި މީހުން އުފުލުމަށާއި، މީހުން ހޯދާ ސަލާމަތްކުރުމުގެ މަސައްކަތުގައި ބޭނުން ކުރެވޭނެކަމަށް އެކަމަނާ ވިދާޅުވިއެވެ.

ހެލިކޮޕްޓަރުތައް ރާއްޖޭގައި ބަހައްޓާނެ ކަމަށް މިނިސްޓަރ މާރިޔާ ވިދާޅުވެފައި މިވަނީ އިންޑިއާ އިން ދިން 2 ހެލިކޮޕްޓަރ އަނބުރާ ގެންދިޔުމަށް އިންޑިއާ އަށް ރައީސް ޔާމީންގެ ސަރުކާރުން އަންގާފައި ވަނިކޮށެވެ. ހެލިކޮޕްޓަރތައް އަނބުރާ ނުގެންގޮސްގެން ދިވެހި ސަރުކާރާއި އިންޑިއާ ސަރުކާރާއި ދެމެދު އޮންނަ ގުޅުން ކުރީ ސަރުކާރުގައި އިތުރަށް ގޯސްވިއެވެ. އޭރުގެ ސަރުކާރުން ބުނީ ރާއްޖެ އަށް ބޭނުން ވަނީ ޑޯނިއާ މަތިންދާބޯޓެއް ކަމަށާއި، ހެލިކޮޕްޓަރ ބޭނުން ނުވާކަމަށެވެ.

އިންޑިއާ އިން ދިން އެއް ހެލިކޮޕްޓަރ އައްޑޫގައި ބާއްވާފައި ވާއިރު، އަނެއް ހެލިކޮޕްޓަރ އޮންނަނީ ލ. ކައްދޫގައި ހުންނަ ސިފައިންގެ އަސްކަރީ ވައިގެ މަރުކަޒު ކަމަށްވާ އިސްކަންދަރު ވައިގެ ބަނދަރުގައެވެ. މި ހެލިކޮޕްޓަރތައް މިހާރުވެސް މައިގަނޑު ގޮތެއްގައި ބޭނުން ކުރަނީ ބަލި މީހުން އުފުލުމަށާއި، ކަނޑުމަތީގެ ޙާދިސާތަކުގައި ގެއްލޭ މީހުން ހޯދުމަށެވެ.