ދެ ފަނޑިޔާރުންނާއި، މުހުތާޒާއި، ނިހާން ގޭ ބަންދަށް ބަދަލުކޮށްފި
19 ނޮވެމްބަރު 2018 | ހޯމަ 12:14އެ ހަތަރު ބޭފުޅުން ގޭ ބަދަށް ބަދަލުކުރުމަށް މާލެ ގެނެސްފައި ވަނީ އާދިއްތަ ދުވަހުގެ ހަވީރުގެ ވަގުތެއްގައި
ސުޕްރީމް ކޯޓުގެ ކުރީގެ ދެ ފަނޑިޔާރުންނާއި، ނިހާން އަދި މުހުތާޒް
ކުރީގެ އުއްތަމަ ފަނޑިޔާރު އަބްދުﷲ ސައީދާއި، ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދާއި، މާމިގިލީ ކޯޓުގެ ކުރީގެ އިސް މެޖިސްޓްރޭޓް އަހުމަދު ނިހާނާއި، ކުރީގެ ޕްރޮސެކިއުޓަރ ޖެނެރަލް މުހުތާޒް މުހުސިން ގޭ ބަންދަށް ބަދަލުކޮށްފިއެވެ.
އެ ހަތަރު ބޭފުޅުން ގޭ ބަދަށް ބަދަލުކުރުމަށް މާލެ ގެނެސްފައި ވަނީ އާދިއްތަ ދުވަހުގެ އިރު އޮއްސި 06:20 ހާއިރުއެވެ. ގޭ ބަންދަށް ބަދަލުކުރުމަށް 4 ބޭފުޅުން ވެސް މާލެ ގެނެސްފައި ވަނީ އެކީގައެވެ.
ރައީސް ސޯލިހު ވެރިކަމަށް ވަޑައިގަތުމަށް ކެމްޕެއިން ކުރެއްވި އިރު ވެލެއްވި ވައުދުތަކުގެ ތެރޭގައި ވެރިކަމުގެ ފުރަތަމަ ދުވަހު ސިޔާސީ ކުށްވެރިން އެފަރާތްތަކުގެ އާއިލާ އާއި އެކު ތިއްބެވޭނެ އިންތިޒާމް ހަމަޖައްސަވައި ދެއްވުން ހިމެނެއެވެ. އަދި ނުހައްގުން ޖަލަށް ލާފައިވާ ފަރާތްތައް މިނިވަން ކުރުމަކީ ވެސް އެމަނިކުފާނުގެ ވައުދެކެވެ.
މި ހަތަރު ބޭފުޅުން ގެއަށް ބަދަލުކުރި އިރު، ކުރީގެ އުއްތަމަ ފަނޑިޔާރު އަބްދުﷲ ސައީދާއި، ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދުގެ މައްޗަށް 2 މައްސަލަ އެއް ސާބިތުކޮށް އެ ދެ ބޭފުޅުންގެ މައްޗަށް ވަނީ 3 އަހަރު ދުވަހުގެ ޖަލު ހުކުމެއް އިއްވާފައެވެ. އަދި ހަމަ މިއާއި އެކު ކުރީގެ ރައީސް ޢަބްދުﷲ ޔާމީން ހައްޔަރުކުރުމަށް އަމުރެއް ތައްޔާރުކުރިކަމަށް ބުނާ މައްސަލައަކާއި ގުޅިގެން މާމިގިލީ ކޯޓުގެ ކުރީގެ އިސް މެޖިސްޓްރޭޓް އަހުމަދު ނިހާނާއި، ކުރީގެ ޕްރޮސެކިއުޓަރ ޖެނެރަލް މުހުތާޒް މުހުސިންގެ މައްޗަށް ވަނީ 17 އަހަރުގެ ޖަލު ޙުކުމެއް އިއްވާފައެވެ. އެ މައްސަލައިގެ އިސްތިއުނާފުގެ އަޑުއެހުންތައް މިހާރު ވަނީ ނިންމާލާފައެވެ.
މި ހަތަރު ބޭފުޅުން ގޭބަންދަށް ބަދަލުކޮށްފައިވާ އިރު، މިހާރު ހޮސްޕިޓަލުގައި އެޑްމިޓްކޮށްގެން ފަރުވާދެމުންދާ ކުރީގެ ނާއިބު ރައީސް އަހުމަދު އަދީބް ވެސް ހޮސްޕިޓަލުން ދޫކޮށްލުމުން ގެއަށް ބަދަލުކުރާނެ ކަމަށް ބެލެވެއެވެ.
ނުހައްގުން ޖަލަށްލާފައިވާ ފަރާތްތައް ރައީސް ސޯލިހުގެ ވެރިކަމުގައި މިނިވަން ކުރުމަށް ނިންމަވާފައިވާ އިރު، ޖަލު އެކިއެކި ހުކުމް ކުރެވިފައި ތިއްބެވި ސިޔާސީ ބޭފުޅުންގެ ހުކުމް ރިވިއު ކުރުމަށް ނިންމައި، އެ ބޭފުޅުން މިހާރު ވަނީ މިނިވަންކޮށްފައެވެ. އެގޮތުން ކުރީގެ ރައީސް މުހައްމަދު ނަޝީދާއި އަދާލަތު ޕާޓީގެ ރައީސް ޝައިހް އިމްރާން އަބްދުﷲ އާއި ކުރީގެ ޑިފެންސް މިނިސްޓަރު މުހައްމަދު ނާޒިމާއި ރައްޔިތުންގެ މަޖިލީހުގެ ކުރީގެ ނާއިބު ރައީސް އަހުމަދު ނާޒިމް ވެސް ވަނީ މިނިވަންކޮށްފައެވެ.
