ޚަޝޯގީ މަރާލަން އެންގީ ވަލީ އަހުދު މުހައްމަދު ބިން ސަލްމާނެއް ނޫން، އަސީރީ: ސައުދީ

ތުރުކީގައި ހުންނަ ސައުދީ ކޮންސިއުލޭޓަށް ވަންތަނާ މަރާލާފައިވާ ނޫސްވެރިޔާ ޖަމާލް ޚަޝޯގީ މަރާލަން އެންގީ ވަލީ އަހުދު މުހައްމަދު ބިން ސަލްމާނެއް ނޫން ކަމަށާއި އޭނާ މަރާލަން އެންގީ ޑެޕިއުޓީ އިންޓަލިޖެންސް ޗީފް، ޖެނެރަލް އަހުމަދު އަލް އަސީރީ ކަމަށް ސައުދީން ބުނެފިއެވެ.

ސައުދީގެ ޑެޕިއުޓީ ޕްރޮސެކިއުޓަރު ޝަލާން ބިން ރަަޖީހް ޝަލާން ނޫސްވެރިންނާ ބައްދަލުކޮށް ވިދާޅުވީ ޚަޝޯގީ މަރާލަން އެންގީ އަސީރީ ކަމަށެވެ. އަދި އެކަމާއި ވަލީ އަހުދު މުހައްމަދު ބިން ސަލްމާނާއި އެއްވެސް ގުޅުމެއް ނެތް ކަމަށް އޭނާ ވިދާޅުވިއެވެ.

ތުރުކީގައި ހުންނަ ސައުދީ ކޮންސިއުލޭޓަށް ވަތްތަނާ ޚަޝޯގީ މަރާލާފައިވާވަގުތު ރެކޯޑްކޮށްފައިވާ ކަމަށް ބުނާ އޯޑިއޯ އެއް ތުރުކީން ވަނީ ބައެއް ގައުމުތަކާ ހިއްސާ ވެސް ކޮށްފައެވެ. އޯޑިއޯ ހިއްސާކޮށްފައި ވަނީ ސައުދީ އަރަބިއްޔާ، އެމެރިކާ، ޖަރުމަން އަދި ފްރާންސްގެ އިތުރުން އިނގިރޭސިވިލާތާއެވެ.

ޝަލާން ވިދާޅުވީ ޚަޝޯގީ މަރާލަން އެންގީ އޭނާއާއި މަޝްވަރާ ކުރަން ފޮނުވި ޓީމުގެ ވެރިއަކަށް ހުރި މީހާ ކަމަށެވެ.އަދި އެއީ އަސީރީކަމަށް އޭނާ ވިދާޅުވިއެވެ. ޝަލާން ވިދާޅުވީ ޚަޝޯގީ މަރާލުމަށްފަހު އޭނާގެ ހަށިގަނޑު ވަނީ ކޮންސިއުލޭޓް ތެރޭ ކޮށާލައި ހަށިގަނޑު ނައްތާލުމަށް ތުރުކީ މީހަކާއި ހަވާލު ކޮށްފައިވާކަމަށެވެ.

ޚަޝޯގީގެ މަރުގެ މައްސަލާގައި ސައުދީން ވަނީ 11 މީހެއްގެ މައްޗަށް ދައުވާ ކުރުމަށް ނިންމާފައެވެ. އޭގެ ތެރޭގައި ފަސް މީހަކަށް މަރުގެ އަދަބު ދޭނެކަމަށް ސައުދީން ބުނެއެވެ. ސައުދީން ބުނީ އެ ފަސް މީހުންނަކީ ޚަޝޯގީ މަރާލުމުގައި އަމަލީ ގޮތުން ބައިވެރިވި މީހުން ކަމަށެވެ.