ހުވާކުރުމުގެ ރަސްމިއްޔާތަށް ވަޑައިގަންނަވާ ބޭރުގެ އިއްޒަތްތެރިން 200 އަށްވުރެ ގިނަ!
16 ނޮވެމްބަރު 2018 | ހުކުރު 02:23ބައެއް ގައުމުތަކުގެ ވެރިން ހިމެނޭ
އިންތިޚާބީ ރައީސް އިބްރާހިމް މުޙައްމަދު ސޯލިހް އަދި އިންތިޚާބީ ނައިބު ރައީސް ފައިސަލް ނަސީމް
ހޮނިހިރު ދުވަހު ރައީސް އިބްރާހިމް މުހައްމަދު ސޯލިހު ރައީސްކަމުގެ ހުވާ ކުރެއްވުމުގެ ރަސްމިއްޔާތަށް ވަޑައިގަންނަވާ ދުނިޔޭގެ ގައުމުތަކުގެ އިއްޒަތްތެރިންގެ އަދަދު 200 އަށްވުރެ ގިނަ ކަމަށް ރާއްޖެއެމްވީއަށް މައުލޫމާތު ލިބިއްޖެއެވެ.
އިންތިހާބީ ރައީސް އިބްރާހިމް މުހައްމަދު ސޯލިހާއި އިންތިހާބީ ނައިބު ރައީސް ފައިސަލް ނަސީމް ހުވާކުރެއްވުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ އަންނަ ހޮނިހިރު ދުވަހުގެ ހަވީރު 5:00ގައި ގަލޮޅު ދަނޑުގައެވެ.
މި ރަސްމިއްޔާތުގައި ބައިވެރިވުމުގެ ފުރުސަތު ދިވެހިންގެ ތެރެއިންވެސް ގިނަ އަދަދެއްގެ ބަޔަކަށްވަނީ ދީފައެވެ. އަދި މިއީ މިފަދަ ގޮތަކަށް ރައީސުލްޖުމްހޫރިއްޔާ ހުވާކުރައްވާ ރަސްމިއްޔާތު ބާއްވާ ފުރަތަމަ ފަހަރެވެ.
އެނގިފައވާ ގޮތުގައި މި ރަސްމިއްޔާތުގައި ބައިވެރިވެވަޑައިގަންނަވާ ބޭރުގެ ގައުމުތަކުގެ ބޭފުޅުންގެ އަދަދު މަދުވެގެން 250 އަށް އަރައެވެ.
އެގޮތުން ސައުދީ އަރަބިއްޔާ، ފަލަސްތީނު، ޕާކިސްތާނު، ސްރީލަންކާ، ޗައިނާ، ޖަޕާން، މޮރޮކޯ، އެމެރިކާ، ޗައިނާ، ޝީޝެލްސް، މޮރިޝަސް، އަދި ޔޫއޭއީގެ އިސްވެރިން ބައިވެރިވެ ވަޑައިގެންނެވުމަށް ހަމަޖެހިފައިވެއެވެ.
މި ރަސްމިއްޔާތުގައި ބައިވެރިވަޑައިގަންނަވާ ބޭފުޅުން ހުކުރު ދުވަހުގެ ހެނދުނުން ފެށިގެން ރާއްޖެ ވަޑައިގަންނަވާއިރު، އޭގެ ތެރޭގައި އިންޑިއާގެ ބޮޑު ވަޒީރު ނަރެންދްރަ މޯދީ އާއި ސްރީލަންކާގެ ކުރީގެ ރައީސާ ޗަންދުރިކާ ކުމާރަތުންގާ ހިމެނި ވަޑައިގަންނަވައެވެ.
މީގެ އިތުރުން ސައުދީ އަރަބިއްޔާގެ ޕްރިންސް ޑރ. މަންސޫރު ބިން މުތައްއިއްބު ބިން އަބްދުލް އަޒީޒް އަލްސައުދު ބައިވެރިވެ ވަޑައިގަންނަވާނެއެވެ.
