ޕީޕީއެމްއާއި ގުޅޭގޮތުން ބުރާސްފަތި ދުވަހުގެ ރޭ ކުރަން އުޅުނު ހުކުމް ފަސްކޮށްފި
އަޑުއެހުން ކެންސަލް ކުރީ އިދާރީ މައްސަލައަކާ ހުރެ
ޕީޕީއެމްގެ ކޮންގްރެސް: ކޮންގްރެސް ނިންމުންތައް ވަނީ ބަލައިނުގަންނަން ވަނީ ނިންމާފައި
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ކޮންގްރެސް ބަލައި ނުގަތުމަށް އިލެކްޝަންސް ކޮމިޝަން (އީސީ) އިން ނިންމި ނިންމުން ބާތިލު ކުރުމަށް އެޕާޓީން ހައި ކޯޓަށް ހުށަހަޅާފައިވާ މައްސަލައިގައި ހުކުމް ކުރަން އޮތް ޝަރީއަތް ކެންސަލް ކޮށްފިއެވެ.
ހައި ކޯޓުގެ މީޑިއާ އޮފިޝަލް އަމީން ފައިސަލް "ރާއްޖެއެމްވީ" އަށް ވިދާޅުވީ އެ މައްސަލާގައި ހުކުމް ކުރުމަށް ބުރާސްފަތި ދުވަހުގެ ރޭ 8:30 އަށް ތާވަލުކޮށްފައިވާ އަޑުއެހުން ކެންސަލް ކުރީ އިދާރީ މައްސަލަ އެއް ކުރިމަތިވެގެން ކަމަށެވެ. ދެން އެ މައްސަލައިގެ ހުކުމް ކުރުމުގެ އަޑުއެހުން ބާއްވާނެ ތާރީޚެއް ފަހުން ޝެޑިއުލް ކުރާނެ ކަމަށް އަމީން ވިދާޅުވިއެވެ.
އެ މައްސަލާގައި މިދިޔަ އަންގާރަ ދުވަހު ބޭއްވި އެންމެ ފަހު އަޑުއެހުމުގައި ފަނޑިޔާރުންގެ ބެންޗުން ބުނީ ދެން އިތުރު ކަމެއް ސާފު ކުރަން ނެތްނަމަ ދެން އޮންނާނީ ހުކުމް ކުރުން ކަމަށެވެ.
ޕީޕީއެމްގެ ހިންގުމުގެ ބާރުތައް ރައީސް މައުމޫންގެ އަތްޕުޅުން ނެންގެވުމަށްފަހު، އެ ޕާޓީ ހިންގުމުގެ ބާރު ހަވާލުކޮށްފައި ވަނީ ޕީޕީއެމްގެ މުސްތަޝާރު ރައީސް އަބްދުﷲ ޔާމީނަށެވެ. ސިވިލް ކޯޓުގެ ހުކުމަކުން 2016 ވަނަ އަހަރު ރައީސް ޔާމީނަށް ޕީޕީއެމް ހިންގުމަށް ހަވާލު ކުރި ހުކުމްގައި ބުނެފައި ވަނީ ރައީސް ޔާމީންގެ ބެލުމުގެ ދަށުން އެ ޕާޓީގެ ގައުމީ ޖަލްސާ އެއް ނުވަތަ ކޮންގްރެސް އެއް ބޭއްވުމަށެވެ. ނަމަވެސް އެ ޕާޓީން ކޮންގްރެސް ބާއްވާފައި ވަނީ ރައީސް ޔާމީނާއި ކޯޓުން, ޕީޕީއެމް ހަވާލުކުރިތާ ދެ އަހަރު ފަހުން މިދިޔަ ސެޕްޓެމްބަރު މަހުގައެވެ.
އިލެކްޝަންސް ކޮމިޝަނުން ބުނީ ޕީޕީއެމް ކޮންގްރެސްގައި އެހެން ޕާޓީތަކުގެ ބައެއް މެމްބަރުން ބައިވެރިވި ކަމަށެވެ.
މީޑިއާތަކަށް އާންމުކޮށް ހުޅުވާ ނުލައި ކުރިއަށް ގެންދިޔަ އެ ކޮންގްރެސްގައި ޕާޓީގެ ރައީސަކަށް ރައީސް ޔާމިނާއި ތިން ނާއިބު ލީޑަރުން ވަނީ ހޮއްވަވާފައެވެ. އީސީން ބުނީ ޕީޕީއެމްގެ ނިންމުންތައް ވެސް ބަލައި ނުގަތީ ފުރިހަމަ ކުރަންޖެހޭ އިޖުރާއަތްތަކާ ހިލާފަށް ކޮންގްރެސް ބާއްވައި، ކަންކަން ފުރިހަމަކޮށްފައި ނުވާތީ ކަމަށް އީސީން ބުންޏެވެ.
ޕީޕީއެމްގެ އަސާސީ ގަވައިދުގައި ބުނަނީ އެ ޕާޓީގެ މަގާމުތަކަށް ކުރިމަތިލެވޭނީ އެޕާޓީގެ މެންބަރުންނަށް ވާތާ ކަނޑައެޅިފައިވާ މުއްދަތެއް ހަމަވުމުން ކަމަށެވެ. ޕާޓީގެ އެފަދަ އަސާސްތަކާ ހިލާފަށް ކޮންގްރެސް ކުރިއަށް ގެންގޮސްފައިވާއިރު، ކޮންގްރެސްގެ ނިންމުންތައް ބަލައިގަނެވޭނެ ޖާގައެއް ނެތް ކަމަށް އެ ކޮމިޝަނުން ވަނީ ކަނޑައަޅާފައެވެ.
އިލެކްޝަންސް ކޮމިޝަނުން ޕީޕީއެމްގެ ކޮންގްރެސް ބަލައި ނުގަތުމަށް ނިންމާފައި ވަނީ އޮކްޓޫބަރު މަހުގެ 3 ވަނަ ދުވަހުއެވެ.
