ދީޕިކާ އާއި ރަންވީރުގެ ކައިވެނީގެ ފޮޓޯ މިއަދު ފެނިގެންދާނެ
15 ނޮވެމްބަރު 2018 | ބުރާސްފަތި 08:58ހަފްލާގައި ބައިވެރިވި މެހެމާނުންގެ ކިބައިން ވަނީ ސޯޝަލް މީޑިއާގައި ފޮޓޯތައް ހިއްސާނުކުރުމަށް އެދިފައި
ދީޕިކާ ޕަދުކޯން އާއި ރަންވީރު ސިންގް
ދީޕިކާ ޕަދުކޯން އާއި ރަންވީރު ސިންގގެ ކައިވެނީގެ ފުރަތަމަ ފޮޓޯ މިއަދު ހިއްސާކުރާނެ ކަމަށް ރިޕޯޓްތައް ބުނެފިއެވެ.
ބުދަ އަދި ބުރާސްފަތި ދުވަހު އިޓަލީގެ ލޭކް ކޯމޯގައި މި ޖޯޑުގެ ކައިވެނީގެ ހަފްލާ ކުރިއަށް ދާއިރު "ސިންދީ ވެޑިން" އަށް ފަހު ބުރާސްފަތި ދުވަހު ހަވީރު 6:00 ހާއިރު ފޮޓޯތައް ހިއްސާ ކުރުމަށް ވަނީ ހަމަޖެހިފައެވެ.
ހަ އަހަރު ދުވަސް ޑޭޓް ކުރުމަށް ފަހު ސައުތު އިންޑިއަން ސަގާފަތާއި އެއްގޮތަށް މި ޖޯޑު ވަނީ ބުދަ ދުވަހު މެންދުރު ކައިވެނި ކޮށްފައެވެ. ނަމަވެސް މި ހަފްލާގެ އެއްވެސް ފޮޓޯއެއް ސޯޝަލް މީޑިއާގައި ހިއްސާ ނުކުރުމަށް މިޖޯޑުގެ ފަރާތުން ހަފްލާގައި ބައިވެރިވި މެހެމާނުންގެ ކިބައިން ވަނީ އެދިފައެވެ.
މި ހަފްލާގެ ފޮޓޯތައް ނަގާފައިވާ އޮފިޝަލް ފޮޓޯ ގްރާފަރަކީ ވިޝާލް ޕަންޖާބީއެވެ. އަދި ބުރާސްފަތި ދުވަހު އޮންނަ ސިންދީ ވެޑިންނަށް ފަހު ނޫނީ އެއްވެސް ފޮޓޯއެއް ހިއްސާނުކުރުމަށް ނިންމާފައި ކަމަށް ރިޕޯޓްތައް ބުނެއެވެ.
މި ކައިވެނީގެ އެއްވެސް ފޮޓޯއެއް ދީޕިކާ އަދި ރަންވީރުގެ ފަރާތުން ހިއްސާކޮށްފައި ނުވި ނަމަވެސް އެމީހުންގެ ފޭން ކުލަބުން ވަނީ މި ހަފްލާގައި ބައިވެރިވާ ދެ އައިލާގެ މެންބަރުގެ ދުރުންނަގާފައިވާ ބައެއް ފޮޓޯ އާއި ވީޑިއޯ ހިއްސާކޮށްފައެވެ.
އެ ފޮޓޯތަކާއި ވީޑިއޯގައި ފެންނަ ގޮތުން ދެފަރާތުގެ އާއިލާ ތިބީ ހުދާއި ގޯލްޑް ކުލައިގެ ހެދުމުގައެވެ. އަދި އޮރެންޖާއި ގޯލްޑް ކުލައިގެ ސާޅި އެއްގައި ހުރި އަންހެނަކު ވަނީ ދީޕިކާ ކަމަށް ފާހަގަ ކޮށްފައެވެ.
ދެ ފަރާތުގެ އާއިލާ ކައިވެނި ހަފްލާ ބާއްވާ ރިސޯޓަށް ގޮސްފައިވަނީ ބޯޓެއްގައެވެ.
ދީޕިކާ އާއި ރަންވީރު ވަނީ މި މަހުގެ ފަހުކޮޅު ދެ ވެޑިން ރިސެޕްޝަން އިންޑިއާގައި ބޭއްވުމަށް ނިންމާފައެވެ.
