ރައީސް ނަޝީދުގެ މައްސަލަ ހޯމަ ދުވަހަށް ތާވަލްކޮށްފި
13 ނޮވެމްބަރު 2018 | އަންގާރަ 15:37މައްސަލަ ބައްލަވާނީ ތިންފަނޑިޔާރުންގެ ބެންޗަކުން
ރައީސް މުޙައްމަދު ނަޝީދު ޖަލްސާއެއްގައި ތަގްރީރު ކުރައްވަނީ
ކުރީގެ ރައީސް މުހައްމަދު ނަޝީދުގެ މައްޗަށް އިއްވާފައިވާ ޖަލު ހުކުމުގެ މައްސަލަ ރިވިއުކުރުމަށް ޕްރޮސެކިއުޓަރ ޖެނެރަލް ހުށަހަޅާފައިވާ މައްސަލައިގެ ޝަރީއަތް އަންނަ ހޯމަ ދުވަހަށް ސުޕްރީމްކޯޓުގައި ތާވަލްކޮށްފިއެވެ.
ދައުލަތުގެ ފަރާތުން އެ މައްސަލަ ސުޕްރީމްކޯޓަށް ހުށަހަޅާފައިވާއިރު، ނަޝީދުގެ މައްޗަށް ކްރިމިނަލް ކޯޓުން އިއްވާފައިވާ 13 އަހަރުގެ ޖަލު ހުކުމުގެ މައްސަލަ އަލުން ބަލައި ނިމެންދެން، ހުކުމް ތަންފީޒު ކުރުން ފަސްކުރަން ސުޕްރީމް ކޯޓުންވަނީ އަމުރުކޮށްފައެވެ.
ނަޝީދުގެ މައްޗަށް 13 އަހަރުގެ ހުކުމެއް އިއްވާފައިވަނީ ކްރިމިނަލް ކޯޓުގެ އިސްގާޒީ އަބްދުﷲ މުހައްމަދު ގާނޫނާ ޚިލާފަށް ބަންދުކުރި ކަމަށްބުނެ އުފުލާފައިވާ ދައުވާއެއް ސާބިތުވާ ކަމަށް ނިންމާފައެވެ.
އެ ހުކުމް ރިވިއު ކުރުމަށް ދައުލަތުގެ ފަރާތުން ހުށަހެޅުމުން ސުޕްރީމް ކޯޓުން ބަލައިގެންފައިވާއިރު، ކުރިން ސުޕްރީމްކޯޓުން ވަނީ އެ ހުކުމަށް ތާޢީދުކޮށްފައެވެ.
އެ މައްސަލާގެ ޝަރީއަތް ހޯމަ ދުވަހުގެ ހެނދުނު ފަށަން ހަމަޖައްސާފައި ވާއިރު، އެ މައްސަލަ ބައްލަވަނީ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ހިމެނިވަޑައިގަންނަވާ ގޮތަށް ފަނޑިޔާރު އަބްދުﷲ އަރީފާއި ފަނޑިޔާރު އާދަމް މުހައްމަދު ހިމެނިވަޑައިގަންނަވާ ތިން ފަނޑިޔާރުންގެ ބެންޗަކުންނެވެ.
ނަޝީދުގެ އިތުރުން އަދާލަތު ޕާޓީގެ ރައީސް ޝައިހް އިމްރާން އަބްދުﷲ އާއި ކުރީގެ ދެ ޑިފެންސް މިނިސްޓަރުން ކަމަށްވާ މުހައްމަދު ނާޒިމާއި ތޮލްހަތު އިބްރާހިމް ކަލޭފާނާއި ރައްޔިތުންގެ މަޖިލީހުގެ ކުރީގެ ނައިބު ރައީސް އަހުމަދު ނާޒިމްގެ ޖަލު ހުކުމުގެ މައްސަލަ ވެސް ރިވިއު ކުރަން ސުޕްރީމް ކޯޓުން ވަނީ ނިންމައިފައެވެ.
