ބައިނަލަޤްވާމީ ގޮތުން ދުނިޔޭގެ ހަކުރުބަލީގެ ދުވަސް ފާހަގަކުރަނީ ނޮވެމްބަރު 14 ވަނަ ދުވަހުއެވެ. ދުނިޔޭގެ ނިސްބަތަށް ބަލާއިރު ހަކުރުބަލި ހުންނަ މީހުން ދުވަހެއް ދުވަހަކަށް އަންނަނީ އިތުރުވަމުންނެވެ. ރާއްޖޭގެ ނިސްބަތުން ބަލާއިރު ދިވެހި އާބާދީގެ ހަތް އިންސައްތަ މީހުންނަކީ މިހާރުވެސް ހަކުރު ބަލި ހުރިކަން ދެނެގަނެވިފައިވާ ފަރާތްތަކެވެ.

ދިރިއުޅުމުގައި ގެންގުޅެވޭ ވަރަށް ގިނަ އާދަތަކެއްގެ ސަބަބުން ކޮންމެ ދުވަހަކުވެސް މި ބައްޔާއި ގާތަށް، ނޭނގި ނަމަވެސް ފިޔަވަޅު އަޅަމުންދާ ދިވެހިންގެ އަދަދު މަދެއް ނޫނެވެ. އެގޮތުން ކެއުން ބައްޓަން ކުރާ ގޮތުންނާއި ކަސްރަތު ނުކޮށް ހުރުމުގެ ސަބަބުންނާއި ދިރިއުޅުމުގެ ބައެއް ކަންކަމުގައި ފަރުވާކުޑަ ވުމަކީވެސް މި ބައްޔަށް މަގު ފަހިވެގެންދާ ބައެއް ކަންތައްތަކެވެ.

މި ޒަމާނަށް ބަލައިފިނަމަ ދިވެހިންގެ ކެއުން ބައްޓަން ކުރުމުގައިވެސް މި ދެންނެވުނު ފަދައިން ފަރުވާ ކުޑަކުރާކަން ފާހަގަ ކުރެވެއެވެ. އެގޮތުން ގަޑިން ގަޑިއަށް ނުކެއުމާއި، ހަށިގަނޑަށް ފައިދާވާ ކާނާގެ ބަދަލުގައި ތައްޔާރީ، ލުއި ކާނާ ކެއުންވެސް ހިމެނެއެވެ.

ހަކުރު ބަލި ޖެހޭ މީހުންގެ އަދަދު އިތުރުވެފައިވާއިރު ޑޮކްޓަރުން ވިދާޅުވާ ގޮތުގައި މި ބައްޔަކީ ކުރިން ފިޔަވަޅު އެޅިއްޖެނަމަ އެ ބަލިން ރައްކާތެރިވެވޭނެ ބައްޔެކެވެ.

ހަކުރު ބަލީގެ ބައެއް އަލާމާތްތަކުގެ ތެރޭގައި ލޯ ފުސްވުމާއި ގިނައިން ކުޑަކަމުދިއުމުގެ އިތުރުން އާދަޔާ ޚިލާފަށް ކަރު ހިއްކުން ހިމެނެއެވެ.

އެތެރެހަށީގެ ޑޮކްޓަރު އަޙުމަދު ޝަހީދު ވިދާޅުވީ، ކުރިއާ އަޅާބަލާއިރު ރާއްޖޭގައި ހަކުރު ބަލި ހުންނަ ކުޑަކުދިންގެ އަދަދު އިތުރުވަމުންދާ ކަމަށާއި ދިރާސާތަކުން ދައްކާ ގޮތުގައި ކުރިއަތް އޮތް ތާނގައި ރާއްޖޭގައި ހަކުރު ބަލި އިތުރުވެގެންދާނެ ކަމަށެވެ. ބެލެނިވެރިން ކުޑަކުދިންނަށް ކޭކު، ޗޮކްލެޓް، މެޓާ އަދި ބިސްކޯދު ފަދަ ތަކެތި ކާންދިނުމުގެ ބަދަލުގައި ސިއްހަތަށް ފައިދާ ހުރި މޭވާ އާއި ތަރުކާރީ އެންމެ ތުއްތު އިރުއްސުރެ ދިނުމަށް ޑރ. ޝަހީދު ވަނީ އިރުޝާދު ދެއްވާފައެވެ.

ހަކުރު ބައްޔަކީ ހަށިގަނޑުގެ އެހެން ނިޒާމުތަކަށް އޭގެ އަސަރު ކުރާ ބައްޔެކެވެ. އެގޮތުން ހަކުރު ބަލީގެ ސަބަބުން އާންމު ގޮތެއްގައި ހިތުގެ ބައްޔާއި، ސްޓްރޯކް އަދި ވާގިނެތޭ ބައްޔަށްވެސް މަގުފަހިވެގެންދެއެވެ. މީގެ އިތުރުން ހަކުރު ބަލި ހުންނަ މީހުންގެ ލޭނާރުތަކަށް ގެއްލުންވުމާއި، ކިޑްނީ ފެއިލްވުމަށް މަގުފަހިވުމާއި، ހަމުގެ އެކި ބަލިތައް ޖެހުން އާންމުވުން ހިމެނެއެވެ.

ކަންމިހެން ހުރުމާއެކު، ދިވެހިންގެ ދިރިއުޅުމުގެ ވައްޓަފާޅީގައި ހުރި ނުރަނގަޅު އާދަތަކާއި، މިފަދަ ބޮޑެތި ބަލިތަކަށް މަގުފަހިވާފަދަ ސަބަބުތަކުން ދުރުހެލިވެ، ދުޅަހެޔޮ ސިއްހަތެއްގެ ވެރި ބަޔަކަށް ވާން މަސައްކަތް ކުރުމަކީ މުހިއްމު ކަމެކެވެ.