ޖޭޕީގެ ޕާލަމެންޓްރީ ގްރޫޕުގެ ލީޑަރަކަށް ރިޔާޒު އައްޔަންކޮށްފި
12 ނޮވެމްބަރު 2018 | ހޯމަ 15:25ގާސިމް ވަނީ ޖޭޕީގެ ޕީޖީ ލީޑަރުކަން ދޫކޮށްލައްވާފައި
ކިނބިދޫ ދާއިރާގެ މެމްބަރު އަބްދުﷲ ރިޔާޒު
ޖުމްހޫރީ ޕާޓީގެ ޕާލަމެންޓްރީ ގްރޫޕުގެ ލީޑަރުގެ މަގާމުން ގާސިމް އިބްރާހިމް އިސްތިއުފާ ދެއްވުމުން، އެ މަގާމަށް ކިނބިދޫ ދާއިރާގެ މެމްބަރު އަބްދުﷲ ރިޔާޒު އައްޔަން ކުރައްވައިފިއެވެ.
ޖޭޕީގެ ޕާލަމެންޓްރީ ގްރޫޕުގެ ލީޑަރުގެ މަގާމުން ގާސިމް އިސްތިއުފާ ދެއްވީ މަޖިލީހުގެ ރައީސްގެ މަގާމަށް ވަޑައިގެންނެވުމުންނެވެ. ގާސިމް އެ މަގާމުން އިސްތިއުފާ ދެއްވުމުން، އަބްދުﷲ ރިޔާޒު އެ މަގާމަށް އައްޔަންކޮށްފައި ވަނީ އެ ޕާޓީގެ ޕާލަމެންޓްރީ ގްރޫޕުގެ މެމްބަރުންގެ މެދުގައި ނެގި ވޯޓުގެ އިއްތިފާގުންނެވެ.
ޖުމްހޫރީ ޕާޓީގެ ޕާލަމެންޓްރީ ގްރޫޕުގެ ޑެޕިއުޓީ ލީޑަރަކީ ކެންދޫ ދާއިރާގެ މެމްބަރު އަލީ ހުސައިންނެވެ.
ޖުމްހޫރީ ޕާޓީގެ ޕާލަމެންޓްރީ ގްރޫޕުގައި ހިމެނިވަޑައިގަންނަވަނީ ހަތް މެމްބަރުންނެވެ. ދެހާސްދާސަ ވަނަ އަހަރު ބޭއްވި މަޖިލިސް އިންތިހާބުގައި ޖުމްހޫރީ ޕާޓީން މަޖިލީހުގެ 15 ގޮނޑި ކާމިޔާބު ކުރިއެވެ. ނަމަވެސް އެ ޕާޓީގެ ޓިކެޓުގައި އިންތިހާބު ކާމިޔާބު ކުރެއްވި އަށް މެމްބަރަކު ވަނީ ސަރުކާރު ހިންގާ ޕާޓީ، ޕީޕީއެމާ ގުޅިވަޑައިގެންފައެވެ.
