އަބުރުގެ ގާނޫނު އުވާލަން ރައްޔިތުންގެ މަޖިލީހަށް ހުށަހަޅާފައިވާ ބިލް ބަލައިގަންނަން މަޖިލީހުން ފާސްކޮށްފިއެވެ.

ހޯމަ ދުވަހު ރައްޔިތުންގެ މަޖިލީހުން ބޭއްވި ޖަލްސާގައި "އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ގާނޫނު" އުވާލުމަށް ހުށަހަޅާފައިވާ ބިލް މަޖިލީހަށް ބަލައިގަންނަން ފާސްކޮށްފައި ވަނީ 48 މެމްބަރުންގެ އަޣްލަބިއްޔަތުންނެވެ. އެބިލް ބަލައި ނުގަންނަން 17 މެމްބަރަކު ވޯޓު ދެއްވިއިރު، ވަކި ގޮތަކަށް ވޯޓު ދެއްވަން ބޭނުންނުވާ ދެ މެމްބަރަކު ތިއްބެވިއެވެ. 

އެބިލް ދިރާސާކުރުމަށް މިނިވަން މުއައްސަސާތަކާ ބެހޭ ކޮމެޓީއަށް ވަނީ ފޮނުވާފައެވެ. 

ގުޅިފައިވާ ޕާޓީތަކުގެ ފަރާތުން އަބުރު ގާނޫނު އުވާލަން ކުރަން ހުށަހެޅުއްވީ ރައްޔިތުންގެ މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދުއެވެ.

އަބުރުގެ ގާނޫނު އުވާލަން ރައްޔިތުންގެ މަޖިލީހުގެ އިދާރާއަށް ހުށަހެޅުއްވުމަށް ފަހު މީޑިޔާތަކަށް މައުލޫމާތު ދެއްވަމުން ޝާހިދު ވިދާޅުވީ މި ވައުދަކީ އިންތިޚާބީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދުތަކުގެ ތެރެއިން އެންމެ އިސްކަމެއް ދެއްވި އެއް ވައުދު ކަމަށެވެ.

އަބުރު ރައްކާތެރިކުރުމާއި ޚިޔާލުފާޅުކުރުމުގެ މިނިވަންކަމުގެ ގާނޫނު އުވާލަން ހުށަހެޅުއްވި ސަބަބަކީ ގާނޫނު އަސާސީގެ 27 ވަނަ މާއްދާގެ ދަށުން ލިބިދޭ ޚިޔާލުފާޅުކުރުމުގެ މިނިވަންކަމާއި ގާނޫނު އަސާސީގެ 33 ވަނަ މާއްދާގެ ދަށުން މީހުންގެ ނަމާއި އަބުރު ރައްކާތެރިކުރުމުގެ ހައްގާއި އަދި ބައިނަލްއަގްވާމީ އިންސާނީ ހައްގުތަށް ރައްކާތެރިކޮށް ދިނުމުގެ ހައްގާއި އުސޫލްތަކާއި ތައާރުޒުވާތީ ކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ އަނެއް ސަބަބަކީ ޔޫޑީއެޗްއާރް އަދި މަދަނީ ސިޔާސީ ހައްގުތަކާ ބެހޭ ބައިނަލްއަގްވަމީ އަހްދު, އައިސީސީޕީއާރް ދަށުން ލިބިދޭ ޚިޔާލުފާޅުކުރުމުގެ މިނިވަންކަން ލިބިދޭ ހަމަތަށް ދިވެހިރާއްޖޭގައި އިންތިޒާމްވާ ގޮތް ކަމަށް ބުނެދިނުމަށް އަބުރު ރައްކާތެރިކޮށްދިނުމާއި ހިޔާލުފާޅުކުރުމުގެ މިނިވަންކަމުގެ ގާނޫނުގެ ނަމުގައި 11 އޮގަސްޓް 2016 ވަނަ ދުވަހުން ފެށިގެން އަމަލްކުރަމުން އައިސްފައިވާ ގާނޫނުގެ ސަބަބުން, ޤާނޫނު އަސާސީ އިން ކަށަވަރުކޮށްދީފައިވާ އަސާސީ ބައެއް ހައްގުތަކާއި މިނިވަންކަން ނިގުޅައިގެންފައިވާތީ ނުވަތަ އުނިކަން ލިބިފައިވާތީ ކަމަށެވެ.

އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ގާނޫނަށް އަމަލްކޮށް ތަންފީޒްކުރުމުގެ ސަބަބުން ޤާނޫނީ ގޮތުން ފުށުއަރާ ކަންތައްތަކާއި މައްސަލަތަކާއި ކުރިމަތިލާންޖެހިފައި ވާތީ ޤާނޫނު އަސާސީގައި ބަޔާންކޮށްފައިވާ ދުސްތޫރީ އުސޫލްތަކާއި ދިވެހިރާއްޖެ ބައިވެރިވެފައިވާ ބައިނަލްއަގްވާމީ އިންސާނީ ހައްގުތަކާއި މިނިވަންކަން ލިބިދޭ މުއާހަދާތަކާއި އެއްބަސްވުންތަކުގައި ބަޔާންކޮށްފައިވާ ބައިނަލްއަގްވާމީ ގާނޫނީ ހަމަތަކާއި އުސޫލްތަކާއި މި ގާނޫނުގެ ސަބަބުން ތައާރަޒްވާ ކަމަށް ޝާހިދު ވިދާޅުވިއެވެ.

އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ގާނޫނަކީ ގާނޫނު އަސާސީގެ 20 ވަނަ މާއްދާ އާއި 24 ވަނަ މާއްދާ 27 ވަނަ މާއްދާ 28 ވަނަ މާއްދާ 37 ވަނަ މާއްދާ 43 ވަނަ މާއްދާ 56 ވަނަ މާއްދާ އަދި 61 ވަނަ މާއްދާ ދަށުން ލިބިދޭ ހައްގުތަކާއި މިނިވަންކަމުގެ ބާރުކެޑިދާ ގޮތަށް ހެދިފައިވާ ޤާނޫނެއް ކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ގާނޫނަކީ  ގާނޫނު އަސާސީގެ 29 ވަނަ މާއްދާ  އަދި 30 ވަނަ މާއްދާ އާއި 31 ވަނަ މާއްދާ އާއި 32 ވަނަ މާއްދާގެ ދަށުން ލިބިދޭ ހައްގުތަކާއި މިނިވަންކަން އުނިކަން ލިބޭ ގޮތަށް ކަންކަން ބަޔާންކޮށްފައިވާ ގާނޫނެއް ކަމަށެވެ.

މިހާރު ހުށަހަޅުއްވާފައިވާ ގޮތަށް އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނު އުވިއްޖެ ނަމަ އާއްމު ގަވާއިދުތަކާއި ބެހޭ ގާނޫނުގެ ދަށުން 2 ވަނަ ޖަދުވަލުގެ 10 ވަނަ ނުކުތާއަށް އަބުރާއި ބެހުމުގެ ސަބަބުން ލިބޭ ގެއްލުމަށް ބަދަލު ނަގައިދިނުމާއި ބެހޭ ގަވާޢިދު އަލުން ހިމަނައި އެ ގަވާޢިދުގެ ބެލެނިވެރިކަން ގާނޫނެއް ކަމުގައި ހަމަޖެހިގެންދާނެ ކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ މި ބިލް ބާތިލްކުރަން ހުށަހެޅުއްވީ ރައްޔިތުންގެ ތެރެއިން ޚިޔާލުފާޅުކުރުމުގެ މަސައްކަތުގައި މަސައްކަތް ކުރައްވަމުން ގެންދެވި އެތައް ބޭފުޅުންނަކަށް ލިބިފައިވާ އަނިޔާތަކާއި ދުއްތުރާތަކާއި ނިގުޅައިގެންފައިވާ ހައްގުތަށް ހަދާންކުރަމުން ކަމަށެވެ.

"އަހްމަދު ރިލްވާނާއި ޔާމީން ރަޝީދުގެ މަތިން ހަދާންކުރަމުން. ބިލް ހުށަހަޅާފައިވަނީ ރާއްޖޭގެ ނޫސްވެރިންނަށް ރާއްޖޭގެ ރިޕޯޓަރުންނަށް މަސައްކަތް ކުރައްވާ ބޭފުޅުންނަށް މި ދިޔަ އަހަރުތަކުގައި ލިބެމުން ދިޔަ އަނިޔާތަކާއި ދުއްތުރާތަކާއި ހިތްދަތިކަން ތަހައްމަލް ކުރަމުން. ރާއްޖޭގެ މިނިވަން ނޫސްވެރިކަމުގައި އެޅުވިފައިވާ ހިލިހިލާތައް ބުރިބުރިކޮށްލުމުގެ ބޭނުމުގައި" ޝާހިދު ވިދާޅުވިއެވެ.