ފުރަތަމަ ބޮޑު ހަނގުރާމަ ނިމުނުތާ 100 އަހަރު ފުރުން ފާހަގަ ކޮށްފި
11 ނޮވެމްބަރު 2018 | އާދީއްތަ 18:37ފްރާންސް، ޖަރުމަނު، އެމެރިކާ އަދި ރަޝިޔާގެ ވެރިން ބައިވެރިވެފައިވޭ
ފްރާންސްގެ ރައީސް، އެމެނުއެލް މެކްރޮން
ދުނިޔޭގެ ފުރަތަމަ ބޮޑު ހަނގުރާމަ ނިމުމަށް 100 އަހަރު ފުރުން، ފްރާންސްގެ ވެރިރަށް ޕެރިހުގައި ފާހަގަ ކޮށްފިއެވެ. މަޝްހޫރު "އާކް ޑި ތްރިއޯމްފް" ބިނާގައި ބޭއްވި މި ހަފްލާގައި، ދުނިޔޭގެ އެކި ކަންކޮޅު ތަކުން 70 އަށް ވުރެން ގިނަ ވެރިން ވަނީ ބައިވެރިވެފައެވެ. މީގެ ތެރޭގައި ފްރާންސް، ޖަރުމަނު، އެމެރިކާ އަދި ރަޝިޔާގެ ވެރިން ހިމެނެއެވެ.
1914 ވަނަ އަހަރުން ފެށިގެން، ހަތަރު އަހަރަށް ދިގު ދެމިގެން ދިޔަ މި ހަނގުރާމައިގައި 16 މިލިއަނަށް ވުރެން ގިނަ މީހުން ވަނީ މަރުވެފައެވެ. މި ހަނގުރާމަ ނިމުމަކަށް އައީ 1918 ވަނަ އަހަރުގެ ނޮވެމްބަރު 11 ވަނަ ދުވަހު ޖަރުމަނާއި، ގުޅިފައިވާ ދައުލަތްތައް ކަމުގައިވާ އިނގިރޭސިވިލާތް، ފްރާންސް، އިޓަލީ އަދި ރަޝިޔާ އިން ހަތިޔާރު ބަހައްޓަން އެއްބަސް ވުމުންނެވެ.
މި ހަފްލާގައި ވާހަކަ ދައްކަވަމުން ފްރާންސްގެ ރައީސް، އެމެނުއެލް މެކްރޮން ވިދާޅުވީ، މިހާރު ގައުމިއްޔަތުކަމަށް ވުރެން ބޮޑު އަޙައްމިއްޔަތްކަމެއް ދޭންވީ ސުލްހަ ގާއިމު ކުރުމަށްކަމަށެވެ. އެކުގައި މަސައްކަތް ކޮށްގެން މި މަގްސަދާއި ހަމައަށް ވާސިލްވުމަށް އެއްބާރުލުންދެެއްވުމަށް ތިއްބެވި ވެރިންނަށް މެކްރޮން ގޮވާލެއްވިއެެވެ.
