މޯލްޑިވްސް އޮސްޓްރޭލިޔާ އެލުމްނައި އިން ދިރާސާ މަހާސިންތާއެއް ބާއްވައިފި
10 ނޮވެމްބަރު 2018 | ހޮނިހިރު 10:02މި މަހާސިންތާ ބާއްވާފައިވަނީ ގައުމީ ޔުނިވާރސިޓީއާ ގުޅިގެން "އެކެޑެމިކް ހޮޅުއަށި"ގެ ނަމުގައި
މޯލްޑިވްސް އޮސްޓްރޭލިޔާ އެލުމްނައިގެ އިސްބޭފުޅުން
ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ)އާ ގުޅިގެން "އެކެޑެމިކް ހޮޅުއަށި" ނަމުގައި، މޯލްޑިވްސް އޮސްޓްރޭލިޔާ އެލުމްނައި އިން ދިރާސާ މަހާސިންތާއެއް ބާއްވައިފިއެވެ.
ރާއްޖެއެމްވީ ދެއްވި އިންޓަވިއުއެއްގައި އެ ޖަމިއްޔާގެ ވައިސް ޗެއާޕަރސަން، ޒީނަތު ޝާކިރު ވިދާޅުވީ، މި މަހާސިންތާގެ މައިގަނޑު މަގްސަދަކީ އޮސްޓްރޭލިޔާ އިން މަތީ ތަޢްލީމް ހާސިލް ކޮށްފައިވާ ދިވެހި ދަރިވަރުން ފުރިހަމަ ކޮށްފައިވާ ދިރާސާ އާއި ހުށައެޅުންތަކާ ބެހޭ މައުލޫމާތު އާންމުންނާއި ހިއްސާ ކުރުން ކަމުގައެވެ.
ޒީނަތު އިތުރަށް ވިދާޅުވި ގޮތުގައި މި މަހާސިންތާއަށް އޮސްޓްރޭލިޔާ އެވާރޑްސްގެ ފަރާތުންނާއި އެހެން ގައުމުތަކުން ތަޢްލީމް ފުރިހަމަ ކޮށްފައިވާ ދިވެހި ދަރިވަރުންގެ ފަރާތުން ވެސް އެދެވިގެންވާ ވަރުގެ ތަރުހީބެއް ލިބިފައިވެއެވެ.
އެ ޖަމިއްޔާގެ ޗެއާޕަރސަން އިބްރާހިމް އަންވަރު ވިދާޅުވީ ، މުސްތަގްބަލުގައި އެހެން ޔުނިވަރސިޓީތަކާއި ކޮލެޖްތަކާއި ގުޅިގެން އަހަރަކު އެއް ފަހަރު މި މަހާސިންތާ ބާއްވަން ގަސްތުކުރައްވާ ކަމަށެވެ.
"މިހާރު ވެސް ހަގީގަތުގައި އަޅުގަނޑުމެން ގައުމީ ޔުނިވަރސިޓީއާ ގުޅިގެން މި ބާއްވާ ފޯރަމް ބޭއްވުމުގެ އިންތިޒާމްތަކުގެ ތެރެއިން ވެސް އަޅުގަނޑުމެންނަށް އެހެން ބައެއް ޔުނިވަރސިޓީތަކާ ކޮލެޖުތަކުން ވެސް ޝައުގުވެރިކަން ފާޅުކޮށްފައި އޮތީ،" އަންވަރު ވިދާޅުވިއެވެ.
މޯލްޑިވްސް އޮސްޓްރޭލިޔާ އެލުމްނައި އަކީ އޮސްޓްރޭލިޔާއިން މަތީ ތައްލީމް ހާސިލްކޮށްފައިވާ ދިވެހި ދަރިވަރުން ޖެނުއަރީ 2015 ގައި، އުފެއްދި އަމިއްލަ ޖަމިއްޔާއެކެވެ. މި ޖަމިއްޔާގެ މައިގަނޑު މަގްސަދަކީ އެދަރިވަރުންނަށް ލިބިފައިވާ އިލްމީ އަދި ފަންނީ މައުލޫމާތާއި ތަޖުރިބާގެ އަލީގައި ގައުމުގެ ކުރި އެރުމަށާއި ތަރައްގީއަށް މަސައްކަތްކުރުން ކަމުގައެވެ.
