ރާއްޖޭގައި މިހާރު ގައުމީ ރޫހު ކުޑަ: ކަމާލުއްދީން
އަނެކަކަށް އިތުބާރުކުރުން އެއީ މިހާރު މުޖުތަމައުން ގެއްލިދާ ކަމެއް
އަބްދުﷲ ކަމާލުއްދީން
ރާއްޖޭގައި މިހާރު ގައުމީ ރޫހު ކުޑަކަމަށާއި މިހާރަށް ވުރެ ބޮޑަށް ގައުމިއްޔަތު އަނބުރާ އިޔާދަ ކުރަންޖެހޭ ކަމަށް ރައީސް މައުމޫން ވެރިކަމުގައި ވަޒީރުކަން ކުރެއްވި އަބުދުﷲ ކަމާލުއްދީން ވިދާޅުވެއްޖެއެވެ.
ގައުމީ ދުވަހުގައި ރާއްޖެޓީން ގެނެސްދިން ޕްރޮގްރާމެއްގައި ވާހަކަ ދައްކަވަމުން އަބްދުﷲ ކަމާލުއްދީން ވިދާޅުވީ ގައުމިއްޔަތުގެ އެންމެ މުހިއްމު ރުކުނަކީ ދީނާއި ނަސްލު ކަމަށެވެ. އެހެން ނަމަވެސް މި ޒަމާނަށް ވިސްނާއިރު އެކަކު އަނެކަކަށް ކުރާ އިތުބާރާއި އެކަކު އަނެކަކާއި ދޭތެރޭ ދެކޭ ގޮތްތައް ކުރިއަށްވުރެ ތަފާތުވެފައިވާ ކަމަށެވެ. އެކަކު އަނެކަކަށް އިތުބާރުކުރުން އެއީ މިހާރު މުޖުތަމައުން ގެއްލިދާ ކަމެއް ކަމަށާއި އެކަން ރަނގަޅު ކުރެވޭނީ އެންމެން އެކުގައި މަސައްކަތް ކޮށްގެންކަމަށް ކަމާލުއްދީން ވިދާޅުވިއެވެ.
"ތެދުވެރި ކަމާއި އެކަކު އަނެކަކަށް އިތުބާރު ކުރުމާއި ތިމާއަށް ނޫން ކަން ކަންކަން އެނގޭނީ އަނެއް މީހުންނަށްވެސް ކަންތައް އެނގޭނެކަމާއި ދެންތިބި މީހުންނަށްވެސް ކަންތައްތައް އެނގޭނެ ކަމާއި މިކަހަލަ ވެލިއުތަކެއް އެބަހުރި ދެއްތޯ އަޅުގަނޑުމެން ގައުމީ ގޮތުން އަޅުގަނޑުމެން ބަލައިގަންނަންޖެހޭ ވެލިއުތަކެއް." އަބްދުﷲ ކަމާލުއްދީން ވިދާޅުވިއެވެ.
އަބްދުﷲ ކަމާލުއްދީން ވިދާޅުވީ ސިޔާސީ ކަންތައްތަކަށްވުރެ ބޮޑަށް ގައުމީ ކަންތައްތައް އިސްކުރަންޖެހޭކަމަށެވެ. ޚިޔާލު ތަފާތު ވުމަކީ މައްސަލައެއް ނޫންކަން ފާހަގަ ކުރައްވާ ކަމާލުއްދީން ވިދާޅުވީ ގައުމުގެ ފިތުނަވެރިކަން ނައްތާލަން ޖެހޭކަމަށެވެ. ގައުމުގައި ހުރި މައްސަލަތައް ސުލްހަވެރިކަމާއެކު ނިންމައި ގޮތްތަކެއް ހޯދުމަށް ކޮންމެ މީހަކު މަސައްކަތް ކުރަންޖެހޭ ކަމަށާއި ތަފާތު ޚިޔާލުތަކުގައި ހުރި މައްސަލަތަކަށް ހައްލު ހޯދުން އެއީ ގައުމުގެ ކޮންމެ މީހެއްގެ މަތިވެރި އަޒުމަށްވާން ޖެހޭ ކަމަށް އަބްދުﷲ ކަމާލުއްދީން ވިދާޅުވިއެވެ.
