ކުރީގެ އުއްތަމަ ފަނޑިޔާރާއި ފަނޑިޔާރު އަލީ ހަމީދު މިނިވަން ކުރުމަށް ރައީސް ނަޝީދު ގޮވާލައްވައިފި
8 ނޮވެމްބަރު 2018 | ބުރާސްފަތި 14:30ރިޔާސީ އިންތިހާބަށް ފަހު، ސިޔާސީ ގިނަ ބަޔަކު ވަނީ މިނިވަން ކޮށްފަ
ކުރީގެ އުއްތަމަ ފަނޑިޔާރު އަބްދުﷲ ސައީދު އާއި ފަނޑިޔާރު އަލީ ހަމީދު
ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދު މިނިވަން ކުރުމަށް ކުރީގެ ރައީސް މުހައްމަދު ނަޝީދު ގޮވާލައްވައިފިއެވެ.
ކުރީގެ އުއްތަމަ ފަނޑިޔާރު އަބްދުﷲ ސައީދުގެ އުފަން ރަށް ކަމަށްވާ އައްޑޫ ސިޓީ ހުޅުމީދޫ އަށް ވަޑައިގެން އެރަށުގެ ރައްޔިތުންނާ ބައްދަލު ކުރައްވައި ރައީސް ނަޝީދު ވިދާޅުވީ އައްޑޫ ސިޓީ އަށް ނިސްބަތްވާ ކުރީގެ އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު ވެސް ޖަލަށް ލާފައި ވަނީ އިންސާފުން ނޫން ކަމުގައެވެ. ރައީސް ނަޝީދު ވިދާޅުވީ އެ ދެބޭފުޅުން ވެސް ޖަލަށް ލާފައިވަނީ ބޭއިންސާފުން ހިންގި ޝަރީއަތަކުން ކަމަށެވެ. އަދި އެއްވެސް މީހަކަށް ނުހައްގުން އަނިޔާ އެއް ލިބެން ބޭނުންވެ ވަޑއި ނުގަންނަވާކަމަށާއި އަބްދުﷲ ސައީދާއި އަލީ ހަމީދަށް މިނިވަންކަމާއެކު އާއިލާ އާއި އެކު އުޅެވޭނެ ގޮތް ހައްދަވައި ދެއްވުމަށް ރައީސް ނަޝީދު ވަނީ ގޮވާލައްވާފައެވެ. ކުރީގެ އުއްތަމަ ފަނޑިޔާރު އަބްދުﷲ ސައީދާއި ސްޕްރީމް ކޯޓްގެ ކުރީގެ ފަނޑިޔާރު އަލީ ހަމީދު ހައްޔަރުކުރީ ފެބްރުއަރީ އެކެއްގައި ނެރުނު އަމުރަށް ފަހު، ކުއްލި ހާލަތު އިއުލާނުކޮށް ފެބްރުއަރީ ފަސް ވަނަ ދުވަހުގެ ރޭއެވެ. ހަމަ އެރޭ ކުރީގެ ރައީސް މައުމޫން އަބްދުލްގައްޔޫމް ވެސް ހައްޔަރުކޮށްފައި ވެއެވެ. ނަމަވެސް ރައީސް މައުމޫން ހުންނެވީ މިނިވަންވެ ވަޑައިގެންފައެވެ. މިއަހަރުގެ ސެޕްޓެމްބަރު 23 ވަނަ ދުވަހު ބޭއްވި ރިޔާސީ އިންތިހާބުން ރައީސް ޔާމީން ބޮޑުތަނުން ބަލިވިފަހުން ސިޔާސީ ގިނަ ބޭފުޅުންތަކެއް ކޯޓްތަކުން ވަނީ ދޫކޮށްލާފައެވެ.
