ހިބަޅިދޫގައި އަދިވެސް ފުލުހުން. ބިޒްނާސް މޯލްޑިވްސްއަށް އެތައް މިލިއަނެއްގެ ގެއްލުމެއް!
8 ނޮވެމްބަރު 2018 | ބުރާސްފަތި 14:52ހިނބަޅިދޫ އަނބުރާ ސަރުކާރަށް ނެގީ ގާނޫނާ ހިލާފަށް ކަމަށް ކޯޓުން ހުކުމްކޮށްފައިވޭ
ބ. ހިނބަޅިދޫ: ހަތިޔާރު ފެނިގެން ކަމަށް ބުނެ އެރަށަށް ފުލުހުން އެރީ 2016 ވަނަ އަހަރު
ބ. ހިނބަޅިދޫން ހަނގުރާމަވެރި ހަތިޔާރު ފެނުނު އިރު އެ ރަށް ހިންގުމާ ހަވާލުވެ ތިބި ބިޒްނާސް މޯލްޑިވްސް ކުންފުނި އަތުން އެރަށް ނަގައި، ގޮތެއް ނުނިމި އޮންނަތާ ގިނަ ދުވަސްތަކެއް ވެފައިވަތީ ކުންފުނިން ކަންބޮޑުވެއްޖެއެވެ.
ހިނބަޅިދޫގައި އަދި ވެސް ދެ ފުލުހަކު ފޯރިމަރަމުންދާ އިރު އެ މީހުން އެތަން ބަލަހައްޓަމުން ދަނީ ކޮން އަމުރެއްގެ ދަށުން ކަމެއް ސާފެއް ނުވެއެވެ.
ބިޒްނާސް މޯލްޑިވްސްގެ މެނޭޖިން ޑިރެކްޓަރ މުހައްމަދު ރިޔާޒް ވިދާޅުވި ގޮތުގައި އެރަށުގެ މަސައްކަތް ބަޔަކާ ޙަވާލުކުރެވިފައި ނުވާތީ އެކުންފުންޏަށް ބޮޑެތި ގެއްލުންތަކެއް ދަނީ ލިބެމުންނެވެ. އެގޮތުން މިހާތަނަށް ވެސް އެތަނަށް ލިބުނު ގެއްލުމުގެ އަދަދު 11 މިލިއަން ޑޮލަރަށް އަރާ ކަމަށް ރިޔާޒް ވިދާޅުވިއެވެ.
"ރިޒޯޓްގެ ކޮންސެޕްޓާއި އީއައިއޭ ހަދާފައި ވަނީ ކުންފުނިން ބޮޑެތި ހަރަދުތަކެއް ކޮށްގެން. އަދި ރިޒޯޓްގެ ޑީޓެއިލް ޑްރޯވިން ހެދުމަށް ވެސް މި ކުންފުނިން ވަނީ ބޮޑެތި ހަރަދުތައް ކޮށްފައި. އޭގެ އިތުރުން ރިޒޯޓް ޑިވްލޮޕް ކުރުމަށްޓަކައި އެކި ޓްއަރ އޮޕަރޭޓަރުންގެ އަތުން އެޑްވާންސްކޮން ފައިސާ ނަގާފައިވާ އިރު ރިޒޯޓް ޑިވްލޮޕް ނު ކުރެވި ގިނަ ދުވަސްތަކެއް ދާތީ އެ ފަރާތްތަކުން އެބަ ދޭ ސުވާލު އުފައްދަމުން،" ރިޔާޒް ވިދާޅުވި އެވެ.
ރިސޯޓް ހަދަން ހިނބަޅިދޫ ދޫކޮށްފައި ވަނިކޮށް އެތަނުން ހަނގުރާމަވެރި ހަތިޔާރާއި ގޮވާތަކެތި ފެނުނީ ސެޕްޓެމްބަރު، 2015 ގައި ރައީސް އަބްދުﷲ ޔާމީން ދަތުރުކުރެއްވި ރިޔާސީ ލޯންޗްކޮޅުގައި އެއްޗެއް ގޮއްވާލި މައްސަލައިގެ ތަހުގީގު ތެރެއިން 2016 ވަނަ އަހަރުއެވެ. އޭރުއް ސުރެ އެތަން އޮންނަނީ ފުލުހުންގެ ބެލުމުގެ ދަށުގައެވެ. ހަތިޔާރު ފެނުނު ކަމަށް ބުނެ ސަރުކާރުން އެރަށް ދޫކުރުމަށް ބިޒްނާސް މޯލްޑިވްސްއާ އެކު ހަދާފައިވާ އެއްބަސްވުން އުވާލުމާ އެކު އެ ކުންފުނިން ސިވިލް ކޯޓަށް މައްސަލަ ހުށައެޅިއެވެ. އަދި 2017 ޖެނުއަރީ ގައި އެ ކޯޓުން ނިންމީ އެރަށުގެ އެއްބަސްވުން ބާތިލްކުރީ ގާނޫނާ ހިލާފަށް ކަމަށާއި އެރަށް ބިޒްނާސް މޯލްޑިވްސްއާ ހަވާލުކުރަން ޖެހޭ ކަމަށެވެ.
ހަތިޔާރު ފެނުން ކަމަށް ބުނެ ފުލުހުން އެރި ހިބަޅިދޫ:- އެރަށް ދީފައި އޮތް ކުންފުންޏަށް އެރަށް ނޭރޭތާ ދެ އަހަރުވަނީ ވެފައި
ނަމަވެސް އެ ހުކުމް ދައުލަތުން ހައިކޯޓުގައި އިސްތިއުނާފު ކޮށްފައިވާ އިރު ސިވިލް ކޯޓުގެ ހުކުމާ އެއްގޮތަށް އަލުން އެރަށް ބިޒްނާސް މޯލްޑިވްސްއާ ހަވާލު ކޮށްފައެއް ނުވެއެވެ. އަދި ސިވިލް ކޯޓުގެ ހުކުމް ސަރުކާރުން ތަންފީޒު ނު ކުރާތީ އެ ކުންފުނިން ސިވިލް ކޯޓަށް މައްސަލަ ހުށައެޅުމުން އެ ކޯޓުން ނިންމީ ހައިކޯޓުގައި އެ މައްސަލަ އިސްތިއުނާފުކޮށްފައި އޮންނަތީ އަމުރު ތަންފީޒު ކުރުމުގެ އަމުރެއް އެ ކޯޓަށް ނުނެރެދެވޭނެ ކަމަށެވެ. ބިޒްނާސް މޯލްޑިވްސްއަށް އެ ރަށް އަނބުރާ ހަވާލު ކުރަން ސިވިލް ކޯޓުން ކުރި ހުކުމް ހައި ކޯޓަށް ހުށައެޅި ފަހުން ވެސް އަހަރަކަށް ވުރެ ގިނަ ދުވަސް ވަނީ ފާއިތުވެފައެވެ.
ފުލުހުން އަދިވެސް އެރަށުގައި ތިބޭތީ އާއި އެރަށަށް އަރާ ކަމުގައިވާ ނަމަ ހުއްދަ ހޯދަން ޖެހޭތީ ބިޒްނާސް މޯލްޑިވްސް އިން ވަނީ އެރަށުގައި ފުލުހުން ތިބެނީ ކޯޓު އަމުރެއް ހޯދައިގެންތޯ ސާފުކޮށްފައެވެ. ހިނބަޅިދޫގައި ފުލުހުން ތިބެނީ ކޯޓު އަމުރެއްގެ ދަށުންތޯ ސާފު ކޮށްދިނުމަށް ކްރިމިނަލް ކޯޓަށް އެ ކުންފުނިން ފޮނުވި ސިޓީގެ ޖަވާބުގައި ބުނެފައި ވަނީ ހިނބަޅިދޫ އަށް އެރުމަށް 10 އޮކްޓޯބަރ 2016 ގައި ދިން އަމުރުގެ މުއްދަތު 10 އޭޕްރިލް 2017ގައި ހަމަވެފައިވާ ކަމަށެވެ. އެކަން އެ ކުންފުންޏަށް އެންގީ މިދިޔަ ހޯމަ ދުވަހުއެވެ.
ހިބަޅިދޫއަށް އަރަން ދިން ކޯޓު އަމުރު 2017ގައި ހަމެވެފައިވާކަން އަންގައި ކްރިމިނަލް ކޯޓުން ފޮނުވާފައިވާ ސިޓީ.
ހަނގުރާމަވެރި ހަތިޔާރު ހިނބަޅިދޫ އިން ފެނުނު މައްސަލައިގެ ތަހުގީގަށް ހޯދަމުންދާ މުހައްމަދު އައްލާމް ލަތީފް (މޮހޯ) ގެ ހިއްސާ މީގެ ކުރިން އެކުންފުނީގައި އޮތެވެ. ނަމަވެސް ފަހުން އޭނާގެ އެއްވެސް ހިއްސާއެއް ނޯވެއެވެ.
