ސަރުކާރުން ހިންގަމުންދިޔަ ދީނާ ހިލާފު ކަންކަމާ ދެކޮޅަށް ޝެއިހު ޒައިދު ކުރެއްވި މަސައްކަތްތައް ތައުރީފް ކުރައްވައިފި
7 ނޮވެމްބަރު 2018 | ބުދަ 13:59ޝެއިހު ޒައިދަކީ ރައީސް ޔާމީންގެ ސަރުކާރުން ހިންގި ދީނާ ހިލާފު ކަންކަމުގައި ފާޅުގައި ބަސްފުޅު ވިދާޅުވި އެއް ދީނީ އިލްމުވެރިޔާ
އަދާލަތު ޕާޓީގެ ރައީސް ޝެއިހް އިމްރާން އަބްދުﷲ (ވ) އާއި ޝެއިހް އަލީ ޒައިދު
ރައީސް އަބްދުﷲ ޔާމީންގެ ސަރުކާރުން ހިންގަމުންދިޔަ ދީނާއި ހިލާފު ފަސާދައިގެ އަމަލުތަކާ މެދު ކެރިވަޑައިގެން ޝެއިހް އަލީ ޒައިދު ބަސް ވިދާޅުވެފައިވާތީ އަދާލަތު ޕާޓީގެ ރައީސް ޝެއިހް އިމްރާން އަބްދުﷲ އޭނާއަށް ތައުރީފް ކުރައްވައިފިއެވެ.
ޝެއިހު އިމްރާން ކުރެއްވި ޓްވީޓެއްގައި ވިދާޅުވެފައި ވަނީ ވޭތުވެދިޔަ ދުވަސްތަކުގައި ދައުލަތުގެ ތެރޭގައި ހިންގަމުންދިޔަ ދީނާ ހިލާފު ފަސާދައިގެ އަމަލުތަކާ މެދު ކެރިވަޑައިގެން ހައްގު ބަސްފުޅު ވިދާޅުވި ހިތްވަރުގަދަ އެއް ބޭފުޅަކީ ޝެއިހު އަލީ ޒައިދު ކަމަށެވެ. އަދި ޝެއިހު ޒައިދުގެ ތަނަވަސް ހިޔާލުފުޅާއި މަޝްވަރާ ލިބޭކަމީ ވަރަށް ބޮޑު އުފަލެއް ކަމަށް ވެސް ޝެއިހު އިމްރާން ކުރެއްވި ޓްވީޓްގައި ވިދާޅުވެފައި ވެއެވެ.
ޝެއިހު އިމްރާން އެ ވިދާޅުވި ގޮތަށް ޝެއިހު ޒައިދު ވަނީ ރައީސް ޔާމީންގެ ސަރުކާރުން ހިންގަމުންދިޔަ ދީނާ ހިލާފު ކަންކަމުގައި ކެރިވަޑައިގެން ކުރިމަތިލައްވާ ސޯޝަލް މީޑިއާގައި ރައްދު ދެއްވާފައެވެ.
އެގޮތުން މޫނު ބުރުގާ އެޅި ޓީޗަރުން ނާއި ފައިކުރި ކުރުކޮށް، ތުނބުޅި ދިގުކޮށްފައި ހުންނަ ބައެއް މުވައްޒަފުން ދައުލަތުގެ ބައެއް އިދާރާތަކުން ވަކިކުރަމުންދިޔަ މައްސަލަތަކުގެ އިތުރުން ދައުލަތުގެ ކޮރަޕްޝަނާއި ފަސާދައިގެ އަމަލުތަކާއި ގުޅިގެން ވެސް ފާޅުގައި ބަސްފުޅު ވިދާޅުވެފައި ވެއެވެ.
ޝައިހް ޒައިދުއަކީ ދީނުގައި އޮންނަ ގޮތް ފާޅުކަން ބޮޑު ގޮތެއްގައި ހާމަކުރައްވާ ޝައިޚެވެ. ދާދި ފަހުން ސަރުކާރުން ވަނީ ޝައިހް ޒައިދު ދީނީ ދަރުސް ދެއްވުމުގެ ހުއްދަ ސަސްޕެންޑްކޮށްފައެވެ. ނަމަވެސް ފަހުން ވަނީ އެސަސްޕެންޝަން އުވާލާފައެވެ.
