ދިރާގު މޯލްޑިވްސް ރޯޑް ރޭސް މެދުވެރިކޮށް އެންޖީއޯ ތަކަށް 600،000 ރުފިޔާ

ދިރާގު މޯލްޑިވްސް ރޯޑް ރޭސް މެދުވެރިކޮށް ދިރާގާއި ދުވުންތެރިންގެ ފަރާތުން މި އަހަރު ރޭހުގައި ބައިވެރިވި އެންޖީއޯ ތަކަށް 600،000 ރުފިޔާ ހަދިޔާ ކޮށްފިއެވެ.

މިއީ ކުޑަކުދިން ހިމާޔަތްކޮށް ރައްކާތެރިކުރުމަށް މަސައްކަތް ކުރާ ޖަމިއްޔާތަކަށް ފައިސާ ހޯދޭނެ ވަސީލަތެއް ޤާއިމްކޮށްދިނުމުގެ ގޮތުންނާއި އެ ޖަމިއްޔާއަކާއި ބެހޭގޮތުން އާންމުން ހޭލުންތެރިކުރުވުމުގެ ފުރުސަތުވެސް ހޯދައިދިނުމުގެ މަޤްސަދުގައި ދިރާގުން ކޮންމެ އަހަރަކު ބާއްވާ ހަރަކާތެކެވެ.

Advertisement

2007 ވަނަ އަހަރު ދިރާގުން ތައާރަފްކުރި ރޯޑް ރޭސް ޖެހިޖެހިގެން ބާއްވާތާ މިއީ 12 ވަނައަހަރެވެ. ވޭތުވެދިޔާ 7 އަހަރު ދިރާގު ރޯޑް ރޭހުގެ ޝިޔާރަކީ ކުޑަކުދިން ހިމާޔަތް ކުރުމާއި ރައްކާތެރިކުރުމެވެ. މިހެން ކަމުން ދިރާގު ރޯޑް ރޭސް ވެގެން ދިޔައީ ކުޑަކުދިންގެ ހައްގުތަކާއި އެކުދިންގެ ކުރިއެރުވުމަށް މަގުފަހި ކުރުމުގެ ގޮތުން ފައިސާ ހޯދާނެ ހަރަކާތަކަށް ކަމަށާއި ގިނަ ބައެއްގެ ތަރުހީބު ކޮންމެ އަހަރަކުވެސް މިހަރަކާތަކަށް ލިބިގެންދާ ކަން ފާހަގަކުރެވެއެވެ.

އެގޮތުން މިއަހަރު އެކަނިވެސް ހަތަރު ހާހަށް ވުރެ ގިނަ ފަރާތްތަކުން ވަނީ ބައިވެރިވެފައެވެ.

ކޮންމެ އަހަރަކުވެސް ދިރާގު ރޯޑް ރޭހުގައި ދުވުންތެރިން ބައްލަވައިގަންނަވާ ޓީޝާޓު ވިއްކައިގެން ލިބޭ ފައިސާގެ 100 އިންސައްތަ ރޯޑް ރޭހުގައި ބައިވެރިވާ ޖަމިއްޔާތަކަށް ކުޑަކުދިންގެ ހައްގުގައި ހަދިޔާ ކުރެއެވެ. އަދި މީގެ އިތުރުން ދުވުންތެރިން ރޭހުގައި ބައިވެރިވުމަށް ރެޖިސްޓަރ ކުރައްވާ ވަގުތު ވެބްސައިޓްގައި ޝާއިއުވެފައިވާ ޖަމިއްޔާތަކުގެ ތެރެއިން އެމީހެއްގެ ދުވުން ހާއްސަކުރާނީ ކޮން ޖަމިޔާއަކަށްކަން ކަނޑައަޅާ، އެންމެ ގިނަ ދުވުންތެރިން ހިޔާރުކުރައްވާ 5 ޖަމިއްޔާ ތަކަށް ދިރާގުން އިތުރު 200،000 ރުފިޔާ ހަދިޔާ ކުރެއެވެ.

ޓައިނީ ހާޓްސްގެ ކޯ ފައުޑަރ އަލީ މުއާޒް ވިދާޅުވެފައިވަނީ ރޭސް ނިންމާލުމަށް ފަހު ޖަމިއްޔާތަަަކަށް ބަހާ ފާއިސާއަކީ ޖަމިއްޔާތަށް ހިންގުމަށް ވަރަށް ބޮޑު އެހީތެރިކަމެއް ލިބިގެންދާ ކަމެއް ކަމަށެވެ.

ރޯޑް ރޭސްގެ ސަބަބުން އާންމު ދިރިއުޅުމުގައި ވެސް ކަސްރަތު ކުރުމަށް މީހުން ޝައުގުވެރިވެ ހާއްސަކޮށް ރޭހެއް އޮތުމުން އެވާ ތައްޔާރިތައް ވެސް ގިނަވެ ދެން އަންނަ ރޭހަކަށް ތައްޔާރުވުމަށް މީހުން ނިންމާކަން ފާހަގަކުރެވޭ ކަމަށް މުއާޒް ވިދާޅުވިއެވެ.

ތެލަސީމިއާ ސޮސައިޓީގެ މެމްބަރ ފާތުމަތު ވަރުދާ ވަލީދު ވިދާޅުވީ އެޖަމިއްޔާއިން ރޯޑްރޭސްގައި ބައިވެރިވާތާ ތިން އަހަރު ވެއްޖެ ކަމަށާއި އެގޮތުން ވޭތުވެދިޔަ 2 އަހަރު ވެސް ލިބުނު ފައިސާއިން ތެލެސީމިއާ ޕޭޝަންޓުންނަށް ވަރަށް ގިނަ އެހީތެރިކަން ފޯރުކޮށްދީފައިވާނެ ކަމަށެވެ. އެގޮތުން ރާއްޖެއިން ލިބެން ނުހުންނަ ފަރުވާ ހޯދުމަށް ރާއްޖެެއިން ބޭރަށް ދިއުމަށް ރޯޑު ރޭހުން ލިބުނު ފައިސާއިން އެކުންދިންނަށް އެހީތެރިކަން ފޯރުކޮށްދީފައިވާނެ ކަމަށް ވަރުދާ ވިދާޅުވިއެވެ.