ސުއަރޭޒް އަށް ފަސް އަހަރުގެ އެއްބަސްވުމެއް ހައްގު: ބާސާގެ ކުރީގެ ރައީސް

ބާސެލޯނާ އަށް ކުޅެމުން އަންނަ އުރުގުއޭގެ ފޯވާޑް ލުއިސް ސުއަރޭޒް އަށް އިތުރު ފަސް އަހަރުގެ އެއްބަސްވުމެއް ހައްގު ކަމަށް އެ ކްލަބުގެ ކުރީގެ ރައީސް ޖޯއާން ގަސްޕާޓް ވިދާޅުވެއްޖެއެވެ.

ލިއޮނެލް މެސީ ބާސާ އަށް ގެނައުމުގައި އެހީތެރިވެދެއްވި ގަސްޕާޓް ގޯލްޑޮޓްކޮމް އަށް ދެއްވި އިންޓަވިއުއެއްގައި ވިދާޅުވީ، ސުއަރޭޒް އަކީ ވަރަށް ތަފާތު ކުޅުންތެރިޔެއް ކަމަށާއި، ރައީސަކަށް ހުންނެވި ނަމަ ސުއަރޭޒް އަށް ފަސް އަހަރުގެ އާ އެއްބަސްވުމެއް ހުށަހަޅާނެ ކަމަށެވެ.

ގަސްޕާޓް ވިދާޅުވީ، އުމުރުން 31 އަހަރުގެ ސުއަރޭޒް ނުކުޅެން ނިންމިޔަސް އެއީ މައްސަލައެއް ނޫން ކަމަށާއި، އެހެން ނަމަވެސް އާ އެއްބަސްވުމެއް ހުށަހެޅުމަކީ ބުއްދިވެރިކަމެއް ކަމުގައި ދެކޭ ކަމަށެވެ.

މީގެކުރިން ލިވަޕޫލް އަދި އަޔަކްސް އަށް ވެސް ކުޅެފައިވާ ސުއަރޭޒް ބާސާ އަށް ބަދަލުވީ 2014 ވަނަ އަހަރުގެ ސީޒަނުގައެވެ. އޭނާ ވަނީ އެ ކްލަބަށް މި ސީޒަނުގައި މިހާތަނަށް ކުޅުނު 15 މެޗުގައި ނުވަ ލަނޑު ކާމިޔާބު ކޮށްދީފައެވެ.

މިހާތަނަށް ބާސާ އަށް ޖުމްލަ ކުޅުނު 213 މެޗުގައި 161 ލަނޑު ކާމިޔާބު ކޮށްފައިވާ ސުއަރޭޒް ވަނީ އެ ކްލަބާއެކު ލަލީގާ ތިން ފަހަރު، ކޮޕާޑެލްރޭ ހަތަރު ފަހަރު، ސްޕެނިޝް ސުޕާ ކަޕް ދެ ފަހަރު، ޔުއެފާ ޗެމްޕިއަންސް ލީގު އެއް ފަހަރު، ޔުއެފާ ސުޕާ ކަޕް އެއް ފަހަރު އަދި ފީފާ ކްލަބް ވޯލްޑް ކަޕް އެއްފަހަރު ކާމިޔާބު ކޮށްފައެވެ.

އުރުގުއޭއާއެކު 2011 ވަނަ އަހަރު ކޮޕާ އެމެރިކާ ކާމިޔާބު ކުރި ސުއަރޭޒް ވަނީ ގައުމީ ޓީމަށް ކުޅުނު 104 މެޗުގައި 55 ލަނޑު ކާމިޔާބު ކޮށްފައެވެ.