މަޖިލީހުގެ ރައީސްގެ މަގާމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ހޮވިވަޑައިގެންނެވުމުން، ރައްޔިތުންގެ މަޖިލިސް ވަރަށް ރަނގަޅަށް ހިނގާނެ ކަމަށް އުންމީދު ކުރައްވާ ކަަމަށް އިންތިހާބީ ރައީސްގެ ތަރުޖަމާން އަދި މައްޗަންގޮޅީ އުތުރު ދާއިރާގެ މެމްބަރު މާރިޔާ އަހުމަދު ދީދީ ވިދާޅުވެއްޖެއެވެ.

މަޖިލީހުގެ ރައީސަކަށް ގާސިމް ހޮއްވެވި ޖަލްސާ އަށް ފަހު، މަޖިލީހުން ނުކުމެވަޑައިގެން މީޑިއާތަކަށް މައުލޫމާތު ދެއްވަމުން ބުރާސްފަތި ދުވަހުގެ ރޭ މާރިޔާ ވިދާޅުވީ މިހާރު އަމަލު ކުރަމުންދާ ގާނޫނުއަސާސީ އިސްލާހު ކުރެވިގެން ދިޔައީ ރައްޔިތުންގެ ހާއްސަ މަޖިލީހުގެ ރިޔާސަތު ވަރަށް ރަނގަޅަށް ގާސިމް ބެލެހެއްޓެވުމުން ކަމަށެވެ.

މާރިޔާ ވިދާޅުވީ ރިޔާސީ އާ ދައުރާ އެކު ރައްޔިތުންނަށް ލިބުނު މިނިވަންކަމުގައި ރައްޔިތުންގެ މަޖިލީހުގައި ބަހުސްތައް ވެސް ވަރަށް ރަނގަޅަށް ކުރެވިގެންދާނެ ކަމަށް އުންމީދު ކުރައްވާ ކަމަށެވެ.

"އަޅުގަނޑު އުންމީދު ކުރަނީ މި ލިބުނު މިނިވަންކަމުގައި އާ [ރިޔާސީ] ދައުރުގައި، އަޅުގަނޑުމެންގެ މި ޑިބޭޓްތަކާ އެއްޗެހި ރަނގަޅަށް ގޮސް، މަޖިލިސް ވަރަށް ރަނގަޅަށް ހިނގާނެ ކަމަށް،" މާރިޔާ ވިދާޅުވިއެވެ.

މަޖިލީހުގެ ރައީސްގެ މަގާމަށް ގާސިމް އިންތިހާބުވެވަޑައިގެންނެވީ 62 މެމްބަރުންގެ ވޯޓުންނެވެ. ބޮޑު އަގުލަބިއްޔަތަކާއެކު ގާސިމް އެ މަގާމަށް އިންތިހާބުވެވަޑައިގެންނެވިއިރު، މަޖިލީހުގެ ރައީސްގެ މަގާމަށް ގާސިމްގެ ނަންފުޅު ހުށަހެޅުއްވީ ހިންނަވަރު ދާއިރާގެ މެމްބަރު އަދި އިންތިހާބީ ރައީސް އިބްރާހިމް މުހައްމަދު ސޯލިހެވެ. ސޯލިހުގެ އެ ހުށަހެޅުއްވުމަށް ތާއިދު ކުރެއްވީ ކާށިދޫ ދާއިރާގެ މެމްބަރު އަދި އިންތިހާބީ ނައިބު ރައީސް ފައިސަލް ނަސީމެވެ.