މުދާ އުފުލާ ދޯންޏަކާއި ތެޔޮ ބާޖެއް ޖެހި އެކްސިޑެންޓެއް ހިނގައިފި
މިހާދިސާ ހިނގާފައިވަނީ ބުރާސްފަތި ދުވަހުގެރޭ ފަތިހު 4:45 ހާއިރު
އެކްސިޑެންޓްވި ދޯނި އަޑިއަށް ދަނީ
ބ. މާމަޑުއްވަރީން ފުރައިގެން މާލެ ދަތުރުކުރި މުދާ އުފުލާ ދޯންޏަކާއި ތެޔޮ ބާޖެއް ޖެހި ކަނޑުމަތީގެ އެކްސިޑެންޓެއް ހިނގައިގެން އެމްއެންޑީއެފް މާލެ އޭރިއާ ކޯސްޓްގާޑް ސްކޮޑްރަން އިން ހަރަކާތްތެރިވާން ފަށައިފިއެވެ.
އެމްއެންޑީއެފުން ބުނީ ސަމަރ އައިލެންޑް މޯލްޑިވްސް ރިސޯރޓް ކައިރިން ހިނގި މިހާދިސާގެ ރިޕޯރޓް އެމްއެންޑީއެފް ކޯސްޓްގާޑް މެރިޓައިމް ރެސްކިއު ކޯރޑިނޭޝަން ސެންޓަރަ (އެމްއާރުސީސީ) އަށް ލިބިފައިވަނީ ބުރާސްފަތި ދުވަހުގެ ރޭ ފަތިހު 4:45 ހާއިރު ކަމަށެވެ. އެކްސިޑެންޓްވީ "ރަމްކޮ" ނަމަކަށް ކިޔާ މުދާ އުފުލާ ދޯންޏަކާއި "ހޯކް" ނަމަކަށް ކިޔާ ބާޖެއް ޖެހިގެންނެވެ.
މި ހާދިސާގެ ރިޕޯރޓް ލިބުމާ އެކު އެ ސަރަހައްދަށް އެމްއެންޑީއެފް މާލެ އޭރިއާ ކޯސްޓްގާޑުގެ ޓީމެއް ގޮސް ވަނީ ހަރަކާތްތެރިވާން ފަށާފައެވެ.
ދިގުމިނުގައި 23 މީޓަރު ހުރި މި ދޯނި ތެޔޮ ބާޖުގައި ޖެހުމުގެ ސަބަބުން ދޯނީގެ ކޮޅު މައްޔާ ފަޅައިގެންގޮސް ދޯނީގެ ބޮޑުބައެއް ވަނީ އަޑިއަށްގޮސްފައި ކަމަށް އެމްއެންޑީއެފުން މައުލޫމާތު ދެއެވެ.
މި އެކްސިޑެންޓް ހިނގިއިރު އެ ދޯނީގައި ތިން ދިވެހިންނާއި އެއް ބިދޭސީއަކު ތިބި ކަމަށާއި އެ މީހުން ވަނީ ތެޔޮ ބާޖަށް ނަގާފައި ކަމަށް އެމްއެންޑީއެފް އިން ބުނެއެވެ. މި ހާދިސާއާ ގުޅިގެން އެއްވެސް މީހަކަށް ގެއްލުމެއް ލިބިފައި ނުވާ ކަމަށް އެމްއެންޑީއެފުން މައުލޫމާތު ދެއެވެ.
މި ހާދިސާ ހިނގަން މެދުވެރިވި ސަބަބު ތަހުގީގްކުރުމުގެ މަސައްކަތް މޯލްޑިވްސް ޕޮލިސް ސަރވިސް މިހާރު ދަނީ ކުރަމުންނެވެ.
