ކޯލިޝަން ރޫޅިއްޖެނަމަ ވޯޓުލީ ރައްޔިތުން މާފެއް ނުކުރާނެ: ޝެއިހް އިމްރާން
1 ނޮވެމްބަރު 2018 | ބުރާސްފަތި 23:51މިނިވަންވިކަމަށް ގަބޫލުކުރާނީ މެއި 1 އެއްވުުމާއި ގުޅިިގެން ހައްޔަރުކުރި އެންމެން މިނިވަންކުރުމުން
އަދާލަތު ޕާޓީގެ އޮފީހުގައި ބޭއްވި ނޫސްވެރިންގެ ބައްދަލުވުމުގެ ތެރެއިން
ކޯލިޝަން ސަރުކާރު ބަދަހިގޮތުގައި ފަސް އަހަރަށް ނުދަމަހައްޓައިފި ނަމަ ރައްޔިތުން ލީޑަރުންނަށް މައާފު ނުކުރާނެކަމަށް އަދާލަތު ޕާޓީގެ ރައީސް ޝެއިހް އިމްރާން އަބްދުﷲ ވިދާޅުވެއްޖެ އެވެ.
ޖަލު ހުކުމުން މިނިވަންވެވަޑައިގެން ފުރަތަމަ ފަހަރަށް ނޫސްވެރިންނާއި ބައްދަލުކުރައްވައި ވާހަކަ ދައްކަވަމުން ޝެއިހް އިމްރާން ވިދާޅުވީ އެންމެ މުހިންމު އިސްކަމެއްދީގެން ކުރާނެ މަސައްކަތަކީ ވެރިކަން ދެމެހެއްޓުމުގެ މަސައްކަތްކަމަށެވެ. އެކަމަށް ޕާޓީތަކުގެ ލީޑަރުން އެކަތިގަނޑެއްގެ ގޮތުގައި ތިބެންޖެހޭކަމަށް އޭނާ ވިދާޅުވި އެވެ.
"ކޯލިޝަން ސަރުކާރު ބަދަހިގޮތުގައި ފަސް އަހަރަށް ނުދަމަހައްޓައިފި ނަމަ އަޅުގަނޑުމެނަށް ވޯޓުލީ ބޭފުޅުން އަޅުގަނޑުމެނަށް މާފެއް ނުކުރާނެ،" ޝެއިޙް ވިދާޅުވި އެވެ.
އިމްރާން ވިދާޅުވީ ނިމުނު ރިޔާސީ އިންތިހާބުގައި އެފަދަ ބޮޑު ކާމިޔާބީއެއް ލިބުނީ ގިނަ ސިޔާސީ ލީޑަރުން އެކުގައި މަސައްކަތްކުރުމުން ކަމަށެވެ. އަދި އެފަދަ ކާމިޔާބީއެއް ލިބުނީ ހުރިހާ ސިޔާސީ ލީޑަރުންގެ ގުރުބާނީ އާއި ކެތްތެރިކަމުގެ ސަބަބުން ކަމަށްވެސް އިމްރާން ވިދާޅުވި އެވެ. އޭނާ ވަނީ ލީޑަރުން ކުރެއްވި މަސައްކަތްތަކަށް ޝުކުރު އަދާކުރައްވާފަ އެވެ.
"އަމިއްލަ މަސްލަހަތާއި، ޕާޓީގެ މަސްލަހަތު ދޫކުރައްވައި، ޤައުމުގެ މަސްލަހަތު އިސްކުރައްވައިގެން އެ ބޭފުޅުން (ހަތަރު ލީޑަރުން) އެކުގައި މަސައްކަތް ފެއްޓެވި ފެއްޓެވުމަކީ ރައްޔިތުންނަށް ލިބިފައިވާ މާޔޫސްކަމާއި ނާއުއްމީދުކަން ފިލުވާލައި، ރައްޔިތުންނަށް ހިތްވަރާއި އެކުވެރިކަން ލިބި، ރައްޔިތުން މި ޤައުމު ސަލާމަތްކުރުމަށް އެކުގައި އަތް ގުޅާލައިގެން ނިކުތް ނިކުތުމުގެ ނާތީޖާ" ޝެިއހް އިމްރާން ވިދާޅުވި އެވެ.
އިމްރާން ވިދާޅުވީ އޭނާ ގަބޫލުކުރާގޮތުގައި އަދި މިނިވަންވެވަޑައި ނުގަންނަވާ ކަމަށެވެ. އެގޮތުން އޭނާ މިނިވަންވިކަމަށްވާނީ މެއި މަހުގެ 1 ވަނަ ދުވަހުގެ މުޒާހަރާ އާއި ގުޅިގެން ޖަލަށްލި ހުރިހާ ރައްޔިތުން މިނިވަންވުމުން ކަމަށް އިމްރާން ވިދާޅުވިއެވެ. އަދި ކުޑަ މިނިވަންކަމެއް ލިބި، ޖަލު ބަންދުން ނިކުމެވުމާއެކު، މެއި 1 ގެ އެއްވުމާއި ގުޅިގެން ހައްޔަރުކުރި މީހުން މިނިވަންކުރުމަށް މަސައްކަތްކުރައްވާނެ ކަމަށްވެސް ޝެއިހް ވިދާޅުވި އެވެ.
"އަޅުގަނޑު އިރާދަކުރެއްވިއްޔާ އެކެއް މެއިގައި ޖަލަށްލެވުނު ހުރިހާ ބޭފުޅުން މިނިވަންކުރުމަށް ކުރަންޖެހުނު ހުރިހާ މަސައްކަތެއް ﷲގެ އިރާދަފުޅާއެކު ކުރަމުންގެންދާނަން" ޝެއިހް ވިދާޅުވި އެވެ.
