މަޖިލީހުގެ ރައީސް ކަމަށް ގާސިމާއި އަބްދުއްރަހީމް ނަން ހުށަހަޅައިފި
1 ނޮވެމްބަރު 2018 | ބުރާސްފަތި 17:17ގާސިމްގެ ނަންފުޅު ހުށަހެޅުއްވީ އިބޫ ސޯލިހު
މަޖިލީހުގެ ރައީސް ކަމަށް ހުށަހެޅުއްވި ގާސިމާއި އަބްދުއްރަހީމް
ރައްޔިތުންގެ މަޖިލީހުގެ ރައީސްގެ މަގާމަށް ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމާއި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ނަން ހުށަހަޅައިފިއެވެ.
މަޖިލީހުގެ ރައީސްގެ މަގާމަށް ގާސިމްގެ ނަން ހުށަހެޅުއްވީ އިންތިހާބީ ރައީސް އަދި ހިންނަވަރު ދާއިރާގެ މެންބަރު އިބްރާހިމް މުހައްމަދު ސޯލިހު (އިބޫ) އެވެ. ގާސިމްގެ ނަންފުޅަށް ތާއިދު ކުރެއްވީ ކާށިދޫ ދާއިރާގެ މެމްބަރު އަދި އިންތިހާބީ ނައިބު ރައީސް ފައިސަލް ނަސީމެވެ.
މަޖިލީހުގެ ރައީސްގެ މަގާމަށް އަބްދުއްރަހީމްގެ ނަން ހުށަހެޅުއްވީ ކެލާ ދާއިރާގެ މެމްބަރު އަލީ އާރިފެވެ. ތާއީދުކުރެއްވީ އިނގުރައިދޫ ދާއިރާގެ މެމްބަރު އިބްރާހީމް ފަލާހެވެ.
އަށާރަ ވަނަ ރައްޔިތުންގެ މަޖިލީހަށް މެމްބަރުން ހުވާ ކުރެއްވުމަށް ފަހު، 2014 ވަނަ އަހަރުގެ މެއި މަހުގެ 28 ވަނަ ދުވަހު ބޭއްވި ޖަލްސާގައި ވެސް މަޖިލީހުގެ ރައީސްގެ މަގާމަށް ގާސިމް ކުރިމަތިލެއްވިއެވެ. އެފަހަރު އަބްދުﷲ މަސީހާ ވާދަ ކުރައްވައި ގާސިމަށް ނާކާމިޔާބީއާ ކުރިމަތިވެވަޑައިގެންނެވީ ހަތަރު ވޯޓުގެ ތަފާތުންނެވެ. ގާސިމަށް ލިބިވަޑައިގެންނެވީ 39 ވޯޓެވެ. މަސީހަށް އެ ވޯޓުގައި ލިބިވަޑައިގެންނެވީ 43 ވޯޓެވެ.
މަޖިލީހުގެ އާ ރައީސަކު ހޮވަނީ އެ މަގާމުގައި ހުންނެވީ މަސީހްގެ އިތުބަރު ނެތްކަމުގެ މައްސަލައެއް 51 މެންބަރުންގެ ސޮޔާ އެކު ހުށަހަޅައި މިރޭ ވޯޓަށް އެހުމަށް އެޖެންޑާކޮށްފައި ވަނިކޮށް މިއަދުގެ ވަގުތެއްގައި އިސްތިއުފާ ދެއްވުމުންނެވެ.
