މާލީ ބަޔާން ހުށަހެޅުމާއި ގުޅޭގޮތުން ރައްޔިތުންނަށް އޮޅޭ ގޮތަށް ރައީސް އޮފީހުގެ ތަރުޖަމާނު އިބްރާހީމް މުއާޒު އަލީ ދެއްކެވި ވާހަކައަށް އޮޑިޓަރ ޖެނަރަލް އޮފީހުން ސާފުކޮށްދީފިއެވެ.
ރައީސް ޔާމީން މާލީ ބަޔާން ހުށަނާޅުއްވާތީ އެކަން ދިފާއުކުރައްވާ މުއާޒު ވިދާޅުވެފައިވަނީ މާލީ ބަޔާން ހުށަނާޅުއްވާން ރައީސުން އެބަ ތިއްބެވިކަމަށާއި އެ ބޭފުޅުންނަށް އެއްވެސް ފިޔަވަޅެއް އަޅާފައި ނުވާކަމަށެވެ. އަދި ރައީސްގެ މަލީ ބަޔާންގެ އެންމެހާ މަޝްވަރާތައް އޮޑިޓަރ ޖެނެރަލްގެ ލަފާފުޅާ އެއްކޮށް ކުރެވިފައިވާ ކަމަށެވެ.
މުއާޒުގެ މިވާހަކަތަކަށް ރައްދުދެއްވައި އޮޑިޓަރ ޖެނަރަލް އޮފީހުން ނެރުނު ނޫސް ބަޔާނެއްގައި ބުނެފައިވަނީ ދައުލަތުގެ ވަކި މަގާމުތަކެއްގައި ތިއްބަވާ ނުވަތަ ދައުލަތުގެ ވަކި މަސްއޫލިއްޔަތުތަކާއި ޒިންމާތަކެއް މަތިކުރެވިފައިވާ ފަރާތްތަކުން، ގާނޫނުއަސާސީގައި ކަނޑައަޅައި ބަޔާންކޮށްފައިވާ ގޮތުގެ މަތިން އެފަރާތެއްގެ މިލްކިއްޔާތުގައިވާ މުދަލާއި ފައިސާ ހިސާބުތަކާއި ވިޔަފާރީގެ މަސްލަހަތުތަކާއި، އަރަންޏާއި ދަރަނި ހާމަކޮށް މާލީ ބަޔާން އޮޑިޓަރ ޖެނަރަލަށް ކޮންމެ އަހަރަކު ހުށަހަޅުއްވަންޖެހޭ ކަމަށެވެ.
މާލީ ބަޔާންތައް ހުށަހަޅުއްވަން ޖެހޭ ފަރާތްތަކުން ހޯދުމަށް އޮޑިޓަރ ޖެނެރަލް އޮފީހުން ކެނޑިނޭޅި އެކި ސިފަސިފަގައި މަސައްކަތް ކުރަމުން އަންނަކަން ފާގަހަކުރައްވައި މިބަޔާނުގައި ބުނެފައިވަނީ މާލީ ބަޔާން އޮޑިޓަރ ޖެނެރަލަށް ހުށަހެޅުމަށް ޤާނޫނުއަސާސީގައި ނުވަތަ ޤާނޫނުގައި ކަނޑައަޅާފައި އޮންނަ ވަގުތު ނުވަތަ މުއްދަތަށް ބަދަލު ގެނެސް، އެމުއްދަތު ކުރުކޮށް، ނުވަތަ ދިގުކޮށްދިނުމަކީ އޮޑިޓަރ ޖެނެރަލަށް ގާނޫނުން ލިބިދީފައިވާ ބާރެއް ނޫން ކަމަށެވެ. އަދި މާލީ ބަޔާން ހުށަހެޅުމަށް އޮންނަ މުއްދަތަށް ބަދަލެއް ގެނައުމަށް އެއްވެސް ފަރާތަކަށް އޮޑިޓަރ ޖެނެރަލް ފުރުސަތު ދީފައެއްނުވާނެ ކަމަށް ވެސް މިބަޔާނުގައި ވަނީ ބުނެފައެވެ.
މީގެ އިތުރަށް މިބަޔާނުގައި ބުނެފައިވަނީ ހުށަހަޅުއްވާ މުއްދަތުގައި މާލީ ބަޔާން ހުށަނާޅުއްވާ ފަރާތްތަކަށް، އެފަރާތެއްގެ މާގަމުގެ ދައުރު ހަމަވުމުގެ ކުރިން މާލީ ބަޔާން ހުށަހަޅުއްވަން ދަންނަވާ ދެންނެވުމަކީ، ޤާނޫނުގައި ކަނޑައަޅާފައިވާ މުއްދަތު ފާއިތުވުމަށް ފަހު ވެސް މާލީ ބަޔާން ހުށަހެޅުއްވުމަކީ މަގާމުގައި ހުންނަވައިގެން ކުރައްވައި ނިންމެވުން ގާނޫނީ ގޮތުން މުހިންމުކަމެއް ކަމަކަށްވާތީ އެކަން އެފަރާތެއްގެ ސަމާލުކަމަށްޓަކައި ދެންނެވުމުގެ ގޮތުން އޮޑިޓަރ ޖެނެރަލްގެ އޮފީހުން އަމަލުކުރާ ގޮތެއް ކަމަށެވެ.
އޮޑިޓަރ ޖެނަރަލަށް މާލީ ބަޔާން ހުށަހަޅުއްވަ ފަރާތްތަކާ އޮޑިޓަރ ޖެނަރަލްގެ އޮފީހުގެ މުއާމަލާތްކުރަމުން ގެންދާނީ އެބޭފުޅަކު ނިސްބަތްވާ އިދާރާގެ މުވައްޒަފުން މެދުވެރިކޮށް ނޫން ކަމަށާއި، މާލީ ބަޔާނާ ބެހޭ އެންމެހައި މުއާމަލާތްތައް ހިންގަމުން ގެންދަނީ ސީދާ އެމާލީ ބަޔާން ހުށަހަޅުއްވާ ފަރާތްތަކާ އެކުގައިކަން ކަމަށް ވެސް އޮޑިޓަރ އޮފީހުގެ މިބަޔާނުގައި ވަނީ ފާހަގަކޮށްފައެވެ.
އަދި އޮޑިޓަރ ޖެނަރަލް މާލީ ބަޔާން ހުށަހަޅަމުންދާ ގޮތާ ބެހޭ ގޮތުން ގާނޫނީ ބާރު ލިބިގެންވާ ތަހުގީގީ އިދާރާއެއް ފިޔަވައި އެހެން އެއްވެސް ފަރާތަކާއެކު އޮޑިޓަރ ޖެނަރަލްގެ އޮފީހުން މައުލޫމާތު ހިއްސާކޮށްފައި ނުވާނެ ކަމަށެވެ.
